Faamalosia e le Upu
Ata na pueina e Josué A. Pena ma faaaloaloga mai ia Gloria Hiatt
Ua molimau talavou laiti i taimi na aoaoina ai i latou, faamafanafanaina i latou, ma taitaiina i latou e tusitusiga paia,
Na matou fesili atu i talavou e tau mai ni taimi na fesoasoani ai ia te i latou se mau na latou taulotoina, e pei ona saunoa i ai Elder Richard G. Scott o le Korama a Aposetolo e Toasefululua ia Oketopa 2011 i le konafesi aoao (tagai i le tulimanu). O nisi nei o a latou tali mai.
Filemu i Lo’u Agaga
“Lo’u atalii e, ia filemu lou agaga; o lou tiga ma ou puapuaga o le a na o sina minute laitiiti; (MF&F 121:7).
O le mau na aumaia ia te au le mafanafana i le tele o tausaga o le Mataupu Faavae ma Feagaiga 121:7, ao i ai le Perofeta o Iosefa Samita i le Falepuipui o Liperate ma tagi atu i le Tama Faalelagi mo le fesoasoani. Na ou taulotoina lenei fuaiupu i le seminare ma e tauloto pe a ou manaomia le faamafanafanaga. Na te faamanatuina maia ia te au e alofa lou Tama o i le Lagi ia te au ma na te silafia ou puapuaga. Ou te faaaogaina lenei fuaiupu e aumaia ai le filemu i taimi o le popole ma le vaivai.
Na fesoasoani lenei fuaiupu ia te au ao ou i ai i se pati na liua i se siosiomaga na ou iloa e le tatau ona ou i ai. Na ou fai atu ma le faaaloalo i au uo e leai, ina ua latou fai mai ia te au e inu pia ma ulaula. Na aumaia e lenei fuaiupu ia te au le malosi na ou manaomia e tu atu ai mo ou talitonuga.
Na fesoasoani foi lenei fuaiupu ia te au e faia se filifiliga faigata. Ma te lei o eseese lava ma lau uo mo le lima tausaga. Na ma taaalo faatasi, o faatasi i malaga, ma tafafao i faaiuga o vaiaso. Ae na amata ona latou tafafao ma ni uo e matutua atu ou te le’i manao e faatasi atu i ai. I le faaiuga na ia tuu mai ia te au e filifili pe avea ia ma au uo pe tumau pea i ou talitonuga i le Upu o le Poto ma le tulafono o le ola mama. Na ou mafatia. Ou te lei iloaina e mafai ona matua faigata tele le tu atu mo le mea ou te talitonu i ai. Ae na ou filifili e fai ni uo fou, ma teuina pea i le mafaufau le folafolaga a le Tama Faalelagi ia Iosefa Samita o le a lelei mea uma.
E leai se mea e sili atu e suia ou talitonuga, ma ou te mauaina le fiafia moni ma tumau pe a ou filifilia le mea sao. Na faamalosia e lenei mau lau molimau ma tuuina mai ai le fesoasoani ina ua ou manaomia.
Lauren J. 16 tausaga, Arkansas, ISA
O Mea Vaivai e Avea ma Mea Malolosi.
Ua toe oni masina fai le suega ulufale mo le aoga maualuga, na ou lagonaina lou le saunia. Na ou mautinoa e matua le mafai lava ona manuia le suega. O lea na ou liliu atu ai i lou Tama Faalelagi i le tatalo. Ao ou tatalo, na oo mai nei upu i lou mafaufau: “Afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalo ai i latou; ma ua lava lo’u alofa tunoa mo tagata uma o e latou te faalotomaualaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua ia te au, ona ou faia lea o mea vaivai ia avea ma mea malolosi ia te i latou” (Eteru 12:27).
Na ou iloaina afai ou te tatalo i le Tama Faalelagi mo le malosi e feagai ai ma luitau ma tofotofoga, Na te faamanuiaina au ma fesoasoani ia te au e manumalo i ou vaivaiga. O le tuuina atu o lou popolega i le Alii o le filifiliga sili lea na mafai ona ou faia. O Ia o le faiaoga sili, ma ou te iloa na fesoasoani o Ia ia te au.
Irvin O. 16 tausaga, El Salvador
Tatalo E Le Aunoa
“Tatalo e le aunoa, ina ia mafai ona e sau ai o le ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega” (MF&F 10:5).
E fesoasoani lenei fuaiupu ia te au e feagai ai ma faaosoosoga. Pe afai o le a ou faia se mea ou te iloa e sese, e oso mai lenei fuaiupu ma lana savali i lou mafaufau. O taimi uma lava ou te tatalo ai pe a ou mauaina lena uunaiga, ou te mauaina ai le fesoasoani ou te manaomia e manumalo ai i faaosoosoga o loo ma feagai.
Jesse F. 17 tausaga, Utah, ISA
O Loo Ta Faatasi ma Oe
“Onosai i puapuaga, ona o le a tele o le a oo mai ia te oe; ae ia e onosaia i latou, aua faauta, ua ou faatasi ma oe, e oo lava i le iuga o ou aso” (MF&F 24:8).
O se faamanuiaga le taulotoina o lenei mau, ae maise lava pe a ou lagonaina le fefe ma le tuuatoatasi. Soo se taimi lava ou te manatua ai, ou te mauaina le toa ma se faalogoga sili atu. I le avea ai ma ni alii ma tamaitai talavou, matou te manaomia le taitaiga ma le lagolago, ae maise lava pe a feagai ma tofotofoga ma luitau faigata. E ui lava o nisi taimi e foliga le mautinoa ma faavaivai loto le lumanai, ou te iloa e mafai ona ou faalagolago i le Alii ma mauaina Lana opo mafanafana.
Ao ou laitiiti, na aoaoina au i le aiga ma le Peraimeri o le a faatasi mai pea le Alii ia te au pe afai ou te faia lau vaega. Ona o na aoaoga faapea foi ma lenei mau, ou te iloa e mafai ona ou faalagolago ia te Ia e le aunoa.
Sofia I. 15 tausaga, Uruguay
Ata na pueina e Welden C. Andersen ma Christian Ibanez