I le Aoao o le Ekalesia

Ua Faapaia e le Aposetolo le NAF Fou i Filipaina

O le Nofoaga Autu e Aoaoina ai Faifeautalai i Filipaina, lea sa faapaiaina e Elder Russell M. Nelson o le Korama a Aposetolo e Toasefululua i le aso 20 o Me, 2012, e mafai ona faofale ai faifeautalai e oo atu i le 144 mai Filipaina, Kemupotia, Hong Kong, Initia, Initonesia, Monokolia, Pakisitana, Sri Lanka, Taiuani, ma Taialani. O nei faifeautalai e aoaoina i gagana a o latou lava atunuu.

O fale e lua o le nofoaga autu fou e i ai se falefaafiafia, potu mo faaliliuga, ma se potu o komepiuta, o se eria e fai ai tagamea, ma potu o aoaoga ua fausia ai i totonu masini otiovisio, potu moe mo faifeautalai, potuaoga ma ofisa.

I le fofogaina o le tatalo o le faapaiaga o le fale fou, sa faailoa atu ai e Elder Nelson le agaga faafetai mo le Togiola a Iesu Keriso ma mo faifeautalai faamaoni ma tagata o le Ekalesia i le lalolagi atoa o e alolofa ma auauna atu i le Alii. Sa ia talosagaina se faamanuiaga i luga o le Malo o Filipaina ina ia “tumau le tatalaina o faitotoa o le faafeiloai” i auauna uma a le Alii ma tatalo ina ia faamanuiaina tagata o le atunuu i le “saoloto ma le tali atu ina ia ola i le amiotonu, i le faaletino ma le faaleagaga.”

O le Malumalu o Manaus Pasila o le Malumalu Lona 138 a le Ekalesia i le Lalolagi Atoa ma o le Malumalu Lona Ono i Pasila

Sa faapaiaina e Peresitene Dieter F. Uchtdorf, Fesoasoani Lua i le Au Peresitene Sili, le Malumalu o Manaus Pasila—o le malumalu lona 138 a le Ekalesia i le lalolagi atoa ae o le malumalu lona ono i Pasila—i le aso 10 o Iuni, 2012.

O le faatuatua ma le tautino atu o le Au Paia o Aso e Gata Ai o loo nonofo i Pasila, lea e silia ma le tasi miliona ia tagata o le au paia, e mafai ona faatusaina i le Vaitafe o le Amasone, na saunoa Peresitene Uchtdorf—e tau fai tafe loloto ma malosi.

Mo le toeitiiti 20 tausaga, o le au paia a le Ekalesia mai Manaus, o se aai e motu ese e ala i vaitafe tetele ma togavao, sa malaga atu e ala i karaveni ina ia auai i le malumalu i São Paulo, Pasila—o se malaga e 15 aso e alu ai ma toe foi mai i le vaa ma le pasi—ma mulimuli ane ai i le malumalu o Caracas, Venesuela—o se malaga e 8-aso i le pasi.

Sa avea Elder Claudio R. M. Costa o le Fitugafulu, o se peresitene o le Misiona a Pasila Manaus ina ua tatalaina i le 1990.

“Ou te talitonu o le a matuai pisi lava le Malumalu o Manaus, i aso uma lava, aua o nei tagata e ese le fiafia i le malumalu,” o le saunoaga lea a Elder Costa. “Latou te aoaoina a latou fanau ia fiafia i le malumalu. E matuai pele le malumalu ia i latou.”

Ua Faamanatu e Tagata o le Ekalesia i Samoa le 50 Tausaga o le Tutoatasi, [ma le] Uluai Siteki

I le Aso Faraile, 1 o Iuni, 2012, sa faatasi ai le pe a ma le 350 o le Au Paia o Aso e Gata Ai i Samoa ma isi tagata Samoa e savavali i se solo o le faamanatuga o le tutoatasi i alatele o Apia. O le limasefulu tausaga ua mavae, i le 1962, sa maua ai le tutoatasi o le atunuu mai ia Niu Sila.

Sa auai faalapotopotoga, aoga, ma ekalesia i le lotoifale ma faalapotopotoga mai fafo. Sa faafiafiaina e tamaiti aoga o le Au Paia o Aso e Gata Ai le faitau afe o le au maimoa i la latou faili pu.

Ae o le faaiuga o le vaiaso sa aofia ai se tasi itu taua o le faamanatuga mo tagata o Samoa o le Au Paia o Aso e Gata A; ua 50 ai foi tausaga talu ona faavaeina le uluai siteki i le atunuu, i Apia.

I le Aso Sa, 3 o Iuni, sa saunoa atu ai Elder James J. Hamula ma Elder Kevin W. Pearson o le au Fitugafulu, ma o i laua uma foi o ni sui o le Au Peresitene o le Eria a le Pasefika, i le Au Paia o Aso e Gata Ai ma malo valaaulia i se sauniga faapitoa sa faasalalauina i falelotu o le AAG i le atunuu atoa.

O le tagai atu i luma, ua tulimatai atu ai le Au Paia o Aso e Gata Ai i Samoa e faaauau ona auauna atu ma faamalolosia o latou aiga, afioaga, ma le atunuu, o le saunoaga lea a Elder Hamula, o le o loo avea ma Peresitene o le Eria. “O loo manaia lava lo tatou tuputupu ae o se Ekalesia iinei, ma o loo tatou tuputupu ae i o tatou aiga ma olaga patino a o tatou saili e mulimuli i aoaoga ma faataitaiga a Iesu Keriso,” na ia saunoa ai.

I le Nofoaga Autu Fou e Aoaoina Ai Faifeautalai i Filipaina, e oo i le 144 faifeautalai mai Filipaina, Kemupotia, Hong Kong, Inita, Initonisia, Monokolia, Pakisitani, Sri Lanka, Taiuani ma Taialani e aoaoina i gagana o o latou lava atunuu moni.

Ata na pueina e Noel Maglaque