O Le Nofoaga Mo Au
Dorota Musiał, Polani
Na faatumuina lou olaga i le faanoanoa, ae ou te lei auai i le Ekalesia. Ina ua tatala le faaipoipoga a ou matua i le fitu o ou tausaga, na falepuipui lou tama. Na fai ma vaisu a lo’u tina le inu ava malosi, ma sa galoma uma atu mea na taua ia te ia. Na ave a’u e nonofo ma se aiga e tausia au.
Ona o nei mea, na televave ai lou matua nai lo au tupulaga. Sa ou le manatu ou te maua so’u avanoa i le olaga, ma na iu ai ina ou i ai i se tulaga o le faatautee i taimi uma. Ao ou talavou lava, na amata ona ou ulaula ma fai isi mea ua ou malamalama nei e feteenai ma le Upu o le Poto. Na ou mautinoa ua faasalaina au ia toilalo i le olaga.
Pau le mea na ou maua ai le fiafia o le fesoasoani lea i tagata—pe faamamaina ni mea faatasi ma latou po o le faalogologo ia latou tala o latou olaga. Na ou matua manao lava i tagata ia iloa e mafai ona latou faalagolago ia te au. O se tasi tausaga na ou alu ai mo se malologa ma feiloai ai ma se tina matua na ou filifili e auauna i ai i le faalogologo lea ia te ia. O ia o se Kerisiano ma na amata ona talanoa mai ia te au i mea tau lotu.
Ou te lei matuai talitonu lava i le Atua. O nisi taimi, pe a ou mafaufau masalo e i ai se Atua, ou te tuuaia o Ia mo mea faigata na oo mai ia te au. Ae peitai ina ua faamatala mai e lenei fafine le taua o le faatuatua i le Atua, na amata ona ou fiafia i ai. Ae ou te lei alu ese, na ia fai mai se mea na faapitoa lona taua: “O Mamona e mulimuli i poloaiga a le Atua.”
Ou te lei faalogo muamua i Mamona, o lea na ou alu ai i le fale, alu i le initoneti, ma saili. Na ou maua le Mormon.org ma okaina se kopi o le Tusi a Mamona. Na momoli mai e faifeautalai i ni nai aso mulimuli ane.
Ou te lei mautinoa pe o le a ou amata ona talitonu i le Atua, ae na fesoasoani mai faifeautalai ia ou iloaina e le gata ina mafai ona ou talitonu ia te Ia ae mafai foi ona iloa o Ia. Ao amata ona ou tatalo ma suesue i le Tusi a Mamona, na ou lagonaina lou i ai i se malaga matagofie i le mauaina o le fiafia. Na tuu lo’u ulaula. Na tuu lou tuuaia o le Atua ma amata ona faafetai ia te Ia mo mea lelei i lou olaga. Na oo ina ou iloa na puapuagatia Lona Alo mo au agasala faapea foi tiga uma na ou lagonaina. I le aso 28 o Oketopa, 2007, na ou papatiso ai i Lana Ekalesia.
Ana ou le aafia lava faaletagata i le suiga mai le leai o se faamoemoe i le fiafia, ou te le talitonu e mafai. Ua ou fiafia nei i lou valaauga i le Peraimeri ma ou te faafetai ua maua le avanoa e fesoasoani ai e faatulaga se auaunaga faatino i se konafesi a le autalavou nofofua matutua i Polani. Ina ia mafai ona fesoasoani atu pea i isi i auaunaga a le Ekalesia, ua faaopoopo ai le fiafia ua ou maua i le talalelei a Iesu Keriso. O mea uma ua ou faia nei, ua ou faia i le alofa mama ona o Iesu Keriso. Ou te talitonu e matagofie le olaga ma e tusa lava pe i ai ni o tatou luitau, afai tatou te mulimuli i le Faaola, o le a tatou le gotouga lava.
E sao le fafine na ou feiloai i ai: O le mauaina o le faatuatua i le Atua e matuai taua lava. Tatou te le mauaina lo tatou tulaga i lenei lalolagi pe afai tatou te le iloa o Ia. Ou te faafetai ua iu lava ina i ai se nofoaga ou te iloa e mo au.