Fesili & Tali

“O le a le uiga o le faamamalu i le perisitua a le Atua?”

O le perisitua o le mana lea e fai ai e Tama Faalelagi ma Iesu Keriso a La’ua galuega. O le Perisitua o le mana silisili ese i luga o le fogaeleele.O le perisitua, e fai ai sauniga, tuuina atu ai faamanuiaga, faataunuu ai galuega i le malumalu, talai ai le talalelei, ma fai ai vavega.

O e umia le perisitua e fai ma sui o le Faaola, o lea latou te faamamaluina ai le perisitua i le faia o mea semanu e fai e le Faaola pe ana i ai o Ia iinei. Latou te faamamaluina le perisitua i le ola agavaa lea. Latou te faamamaluina le perisitua i o latou ofu, amio, upu, auaunaga, ma mafaufauga foi.

O tamaitai talavou e mafai foi ona faamamaluina le perisitua i le tausia o a latou feagaiga o le papatisoga ma le auai ma le migao i sauniga o le perisitua e pei o le faamanatuga po o galuega o le malumalu. E mafai ona latou lagolagoina o latou tama, tuagane, ma isi perisitua i le tausia o poloaiga ma ola agavaa e faia o latou tiute faaleperisitua.

E mafai ona tatou faamamaluina uma le perisitua i le auauna atu lea ma le faamaoni i o tatou valaauga, i le ava lea ia i latou e umia le perisitua, i le ava lea i galuega a le perisitua, ma le faaaloalo lea i sauniga ma feagaiga e fesoasoani le perisitua ia tatou mauaina.

Ia Amio e Pei o se Sui o le Atua

A mafai ona tatou amata malamalama i le ofoofogia o le tuuina mai e le Atua o lenei meaalofa ia i tatou, ona faigofie lea ona faamamaluina le perisitua. Ia faaalia le lotofaafetai ma le faaaloalo i le mana ua faameaalofaina ai outou. Fesili ia te oe lava ia, afai e iloa uma e i latou o siomia au o loo ia te au le mana o le Atua, pe o le a sili atu ea pe itiiti lo latou manatu ia te Ia? O le faamamaluina lena o le perisitua—o le iloaina lea o oe o se sui o le Atua ma le faia o le mea sili ia amio i se auala e faaalia ai le faaaloalo i le faatuatuaga ua Ia tuuina mai ia te oe.

Mason R., 19 tausaga, Colorado, ISA

Ia Amio Mama

I le avea ai ma se tamaitai talavou e mafai ona ou faapea e le tau manaomia fua lou faamamaluina o le perisitua. Ae o tamaitai talavou uma lava e manaomia le faia o lea. Tatou te faamamaluina le perisitua e ala i le amio mama. Tatou te faamamaluina le perisitua i le fesoasoani lea i alii talavou ia maua mafaufauga mama. E fai o tatou ofu talafeagai ma tautala i le gagana mama. O le faia o lea, tatou te fesoasoani ai i alii talavou e faamamalu le perisitua, ona tatou faamamaluina foi lea o le perisitua.

Marisa B., 14 tausaga, Arizona, ISA

Fai Lou Tiute i le Atua

O le auala sili e faamamalu ai le perisitua i lo’u manatu, o le faia o mea semanu e fai e le Alii pe ana fai e i ai o Ia i le lalolagi, ona o loo tatou sui ia Iesu Keriso. O lona uiga o le faataunuuina lea o tautinoga uma, tiute, ma folafolaga na tatou faia ma le Atua ina ua faauuina i tatou i le perisitua. O le faamamaluina o Lana Perisitua, o lo tatou mulimuli lea i Lana poloaiga ia “tutulai ia ma susulu atu, ina ia avea lo [tatou] malamalama ma tagavai mo atunuu” (MF&F 115:5). Tatou te fesoasoani i isi ia iloa e tele auauna faauuina a le Atua i le lalolagi.

Bismarck B., 18 tausaga, Santo Domingo, Dominican Republic

Faaalia le Faaaloalo mo le Perisitua

Ou te manatu o le faamamaluina o le perisitua o le mauaina lea o le faaaloalo ma le talitonu i le faaaogaina o le perisitua. Pe afai o i ai ni Perisitua Arona e faaaloalo i le perisitua ma le faamanatuga e pei ona matou faia i la matou uarota, ona outou maua lea o ni aafiaga maoae i le tufaina ma le saunia o le faamanatuga. E fai o tatou ofutino papae ma fusiua. Ua tatou iloa e faia ai se aafiaga maoae i le uarota, ma ua i ai foi se aafiaga ia te au. Ou te iloa o le umiaina o le perisitua o le mea silisili lea ua tupu ia te au.

Hansen B., 15 tausaga, Texas, ISA

Aua Nei Faia se Fetuunaiga i Ou Tulaga Faatonuina

O le faamamaluina o le perisitua o lona uiga o le le tuuina lea o oe i tulaga e te iloa e fai ai se fetuunaiga o ou tulaga faatonuina. Ina ua matou aoaoina le Feagaiga Tuai i le seminare, na matou maua i le Kenese 39 le faataitaiga a Iosefa i Aikupito i le faamamaluina o lona perisitua i le sola ese lea mai le ava a Potifara.

O le tasi auala mo tamaitai talavou e fesoasoani ai ia i matou e faamamalu le perisitua o le mulimuli lea i tulaga faatonuina ma ofu talafeagai o loo i le Mo Le Malosi o le Autalavou.

Iosefa B., 16 tausaga, Texas, ISA

Lagolago le Perisitua

O le faamamaluina o le perisitua ia te au o le faaaloalo lea o alii talavou ma lagolago le meaalofa ua tuuina mai e le Alii ia i latou. Pe a ou vaai i se alii talavou o faaaloalo i le perisitua, ou te lagonaina le filemu sili atu ma sili atu ai lou faaaloalo i alii talavou. Ua faamoemoeina ma tuuina atu e le Tama Faalelagi ia te ia le perisitua, ma ou te lagona o le tiute lea o le alii talavou e le gata i le umia o le perisitua a ia puipuia foi.

Melinda B., 16 tausaga, Washington, ISA

Manatua le Faaola

O le perisitua e na o le pau lea o le mana moni o le Atua i le lalolagi ma ua faailoa mai ai ia i tatou le ala e toe foi atu ai ia te Ia. Pe afai tatou te mafaufau i le faamamaluina o le perisitua, ua tatou mafaufau i le mulimuli i aoaoga mai ia Peresitene Thomas S. Monson ma isi Aposetolo. O le auala sili e faamamalu ai le perisitua o le faia lea o mea ua aoaoina ai i tatou, lena e mafai ai ona tatou manatua le Faaola. Pe afai tatou te manatua o Ia, o le a faatasi Lona Agaga ma i tatou. O le mauaina o le Agaga e mafai ai ona tatou tumau i le ala sao ma avea ma faataitaiga o tulaga faatonuina o le talalelei.

Vasega o le Aoga Sa: Kylie E., Jaiten B., Joseph E., Alexandra R., Kaylie V., Alisha F., ma Haylee W. (e leo pueina); Idaho, ISA

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

E Paia

“O alii ma tamaitai talavou … e tatau ona faamamalu [le perisitua] ma ia iloa o se mea paia, … aua o le mana o lenei pule e faataunuuina ai sauniga o le talalelei i le lalolagi atoa ma nofoaga paia uma, ma a aunoa ma lea e le mafai ona faataunuuina. O i latou ua umia lenei pule e ao ona latou faamamalu i ai ia i latou lava. Ia ola i latou ina ia agavaa mo le pule ua tuuina atu ia i latou.”

Peresitene Iosefa F. Samita (1838–1918), Aoaoga a Peresitene o le Ekalesia: Iosefa F. Samita (1998), 144.

O Le Isi Fesili

“O le a lau tali i tagata lotu ese e fesili mai pe aisea e le ola ai nisi tagata o le Ekalesia i o tatou tulaga faatonuina?”

Auina mai lau tali ao le’i oo ia Novema 15 i le [e-mail] po o le:

Liahona, Questions & Answers 11/12

50 E. North Temple St., Rm.2420

Salt Lake City, UT 84150-0024, USA

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.