Le Pele Amiga
Talofa mai Mekisiko! Na ou fiafia lava ua maua lau tusi ma iloa ai lou aso fanau ua lata mai. E foliga mai ua fai si ou popole i le tuua o le Peraimeri Pe mafai ona ou tau atu ia te oe le taimi na ou alu ai i Tamaitai Talavou?
Na ou popole foi i le tuua o le Peraimeri. Na ou popole nei le maua ni au uo. Na ou fefe i le avea ai ma teine e aupito laitiiti nai lo le avea ma teine e aupito matua.
Ae na matuai lelei lava mea uma. Na faatalanoa au e le epikopo a o lei oo i lou aso fanau ma tau mai ia te au o le suiga o se mea lelei. I le Aso Sa, na ou lagonaina pea le fefe ma nofo ai i le potu o le Peraimeri. O le mea na laki ai, na maua au e se tasi o taitai o Tamaitai Talavou iina. Na ia fai mai, “Na ou iloaina lava o le a ou mauaina oe ii! Sau loa, ua oo i le taimi e alu ai i le vasega.”
Na faafeiloai au e Sister Diaz i le amataga, ma na ia tuuina mai ia te au tusi e tolu ua ou fiafia tele i ai: Mo Le Malosi o le Autalavou, Alualu i Luma o le Tagata Lava ia a Tamaitai Talavou, ma se api o talaaga. Ao ou tilotilo solo i le potu, na ou iloaina ai ou te masani i nisi o teine mai le Peraimeri. O nisi o teine ou te le’i iloaina na faatalofa mai. Na vave ona ou lagonaina le filemu nai lo le fefe.
Na faasolo ina sili atu ona lelei mea uma mai lena taimi. Na faapitoa lava gaoioiga o le Mutuale ia te au ona latou te aoaoina au pe faapefea ona ola i le talalelei ma fesoasoani i lou aiga ma uo. Ma o le o i tolauapiga i tausaga taitasi o se matua fiafia lava! O lenei ua avea au ma Lora, ou te faamoemoe e faauma vave le Alualu i Luma o le Tagata Lava ia. Ua le mafai ona ou faatali e fai la’u asoa a Tamaitai Talavou e faamanatu mai ai ia te au ua ou latalata atu i lo’u Tama Faalelagi i nei tausaga.
O le mea la lea, aua e te fefe, la’u uo. Faamafola ou apaau ma lele mai i Tamaitai Talavou. Ou te folafola atu o le a e le faanoanoa.
Alofaaga,
Maribel
Ata na tusia e Brad Clark