O Le Ola Fuafua Lelei e Saunia ai i Tatou mo le Lumanai

E talitonu le Au Paia o Aso e Gata Ai i le saunia ma le ola faalagolago o le tagata ia te ia lava. Matou te talitonu ina ia saunia faaleaoaoga mo galuega, ia saunia mea tau tupe mo se aso timu, ma ia saunia faaletino mo faalavelave faalenatura po o nisi luitau. O le mea e sili ona taua, matou te talitonu i le saunia faaleagaga mo le Toe Afio Mai Faalua o Iesu Keriso ma mo le toe nonofo ai faatasi ma lo tatou Tama o i le Lagi. O lenei taumafaiga ina ia saunia ua taua o le ola fuafua lelei.

O le ola fuafua lelei o loo atagia ai lo tatou tulaga moni faalenatura e faavavau: tatou te “faia mo i [tatou lava] ae le faamalosia” (2 Nifae 2:26). E finagalo le Alii ina ia faamoemoeina i tatou ma tu lē faalagolago (tagai i le MF&F 78:14). E finagalo o Ia ina ia tatou ola fuafua lelei ona o le ituaiga tagata ua avea ai i tatou: faamoemoeina, agaalofa, faatagata matua, agalelei. O le tele o lo tatou ola faalagolago ia i tatou lava, o le lelei atili ai foi lea o lo tatou fesoasoani i o tatou aiga ma isi. E faapefea ona tatou fafagaina e o fiaaai pe afai o tatou fiaaai foi? E faapefea ona tatou faasoa atu le malamalama pe afai e le o lava foi so tatou malamalama? E faapefea ona tatou fausia le faatuatua o isi pe afai e le o lava foi lo tatou faatuatua?

O mataupu faavae o le ola fuafua lelei e aofia ai mea nei:

Sauniuniga. “Ina outou saunia ia, ina outou saunia ia mo mea o le a oo mai, ona ua latalata mai le Alii” (MF&F 1:12).
Galue. “Aua e te paie” (MF&F 42:42).
“Saili i le aoaoina, e ala lava lea i le suesue ma le faatuatua foi” (MFF 88:118).

A faia e tagata o le Ekalesia mea uma e mafai ona latou faia e tausi ai i latou lava ae le gafataulimaina ai mea taua latou te manaomia, e tatau ona latou liliu muamua atu i o latou aiga mo se fesoasoani. Afai e le lava, e mafai ona fesoasoani le Ekalesia. E mafai e epikopo ma peresitene o paranesi ona faaaoga ni punaoa mai “le faleteuoloa o le Alii” e fesoasoani ai i tagata o le ekalesia (tagai i le MF&F 82:18–19). O le faamoemoega o soo se fesoasoani mai le Ekalesia o le fesoasoani lea i tagata o le ekalesia ina ia latou fesoasoani ia i latou lava ma uunaia le galulue i o latou olaga.

E mafai ona tatou galulue ina ia ola faalagolago le tagata ia te ia lava i eria nei:

Malosi faaleagaga: Faalagolago i le Alii; usitai i poloaiga; tatalo ma suesue i tusitusiga paia i aso uma; auauna atu i isi.
Soifua maloloina faaletino: Usitai i le Upu o le Poto; faamalositino; ia lava le moe; faia ni faataitaiga lelei o le mama ma le tumama.
Aoga: Ia iloa tusitusi ma faitau tusi; ia maua ni tomai faalegaluega; suesue “i tusi sili ona lelei” (MF&F 88:118).
Faigaluega: Faigaluega e saunia mo lou lava aiga faapea ma manaoga o lou aiga.
Mea e teu i le fale: Teu ni vaiinu mama ma ia teu auauai se sapalai o meaai e te taumafaina i se tulaga masani ai ma ni sapalai meaai e umi ona teu, e pei o sana ma pi.
Mea Tautupe: Totogi le sefuluai ma taulaga; aloese mai le faia o ni aitalafu e le talafeagai; ia teu auauai se tupe faaleoleo.

Mai le agavale: O Le Toe Afio Mai Faalua, saunia e Grant Romney Clawson © IRI; ata na tusia e Craig Dimond, Christina Smith, John Luke, ma Robert Casey © IRI; ata o vine na saunia e David Stoker © 2008