Ua Faavaeina le Uluai Siteki i Initia
Sa i ai se lagona manino o le fiafia ma le agaga faafetai a o faapotopoto le silia i le 1,500 o le au paia ma uo i le Maota Autu o le Novotel Convention i Hyderabad, Initia, mo le faavaeina o le Siteki a Hyderabad Initia, o le uluai siteki lea i le atunuu, i le aso 27 o Me, 2012. Sa pulefaamalumalu ai Elder Dallin H. Oaks o le Korama a Aposetolo e Toasefululua ma sa auai faatasi ma Elder Donald L. Hallstrom o le Au Peresitene o Fitugafulu ma Elder Anthony D. Perkins o le Fitugafulu, o le o loo tautua ai o se Peresitene o le Eria i Asia. Sa auai faatasi faletua o nei taitai taitoatasi i le konafesi.
Sa lagolagoina John Gutty o se peresitene o le siteki faapea ma Suresh Natarajan o le fesoasoani muamua ma Rajaratnam Bushi o le fesoasoani lua. O le uluai peteriaka a Initia o le sa avea muamua ma peresitene o le paranesi o le itu o Prasad Rao Gudey.
I lana saunoaga i le faapotopotoga aupito toatele o le Au Paia i Initia, sa saunoa ai Randy D. Funk, peresitene o le Misiona a India Bangalore, “O se vaaiga mamalu lenei i lenei aso iloga, o se aso o le a tatou manatuaina pea. O le a tatou manatua pea sa i ai se Aposetolo a le Alii iinei.”
Sa faailoa atu e Elder Perkins alofaaga mai le Au Peresitene o le Eria i Asia i le au paia i Initia ma saunoa faapea, “Ua tatou vaaia le amataga o se galuega matagofie i lenei laueleele. O le tuputupu ae o le Ekalesia ma le fausia o siteki ua faia e tusa ai ma mataupu faavae e faavavau o le talalelei ma mamanu ua faatulagaina o le perisitua.”
I le taua o ia o se molimau lona lua i le valaauina o le au peresitene fou o le siteki, sa faamatalaina ai e Elder Hallstrom le faagasologa faavaloaga o le filifilia o le au taitai o le siteki fou. I le avea ai o se sui o Fitugafulu, na tofia ai o ia ma taunuu atu e aunoa ma se faaituau po o se faailoga tagata, o lana faamatalaga lea. Sa sau o ia i le ala a le Alii, e faalagolago i Lona Agaga e maua ai faaaliga. “O le finagalo o le Alii o Peresitene Gutty e avea ma peresitene o le siteki,” o le saunoaga lea a Elder Hallstrom.
O Kristen Oaks, o le sa malaga atu faatasi ma lana tane, sa saunoa i le aoaoina o fanau ina ia latou talitonu “sa mautinoa lena mea e o latou tina” (tagai i le Alema 56:48).
I le avea ai ma tootoo mulimuli i le sauniga, sa faailoa atu ai e Elder Oaks le agaga faafetai i le malo o Initia, o se atunuu e saoloto i mea tau tapuaiga lea e faatagaina ai le au paia a le Ekalesia “e faatasitasi ma talanoa i mataupu faavae o lo tatou faatuatuaga.”
Sa molimau atu Elder Oaks i le i ai o se molimau i le Agaga o le Alii na saunia ma filifilia ai taitai na filifilia. Sa saunoa foi Elder Oaks e uiga i tiutetauave fou o se siteki.
I le Feagaiga Tuai sa faatusa ai e le perofeta o Isaia ia Isaraelu i se faleie lea e faamalumalu ai le fanauga a Isaraelu, fai mai o ia. “O le Ekalesia i aso nei o le faleie. Ua tatou iloa uma lava o se faleie e tatau ona lagolagoina i ni taofi. O le avea ai la o Hyderabad ma se siteki o Siona, o le a faamoemoe ai ia outou agai atu i luma ma tuuina atu le lagolago sili atu e ala i le sefuluai ma faifeautalai.”
O se taunuuga o le faavaeina o se siteki, o le a mafai ai e le au paia i Hyderabad ona maua faamanuiaga faapeteriaka. Sa faamalamalama atu e Elder Oaks mea e i ai i se faamanuiaga faapeteriaka, i le faatatau atu i se faamanuiaga o ni “tusitusiga paia patino.”
“O se faamanuiaga faapeteriaka e folafola mai ai lou tupuaga i ituaiga o Isaraelu lea e ala ai ona maua faamanuiaga maoae,” o le saunoaga lea a Elder Oaks. “O se faamanuiaga faapeteriaka e tautino mai ai foi faamanuiaga ma folafolaga e mafai ona tatou maua pe afai tatou te faamaoni.”
“A o tuputupu ae le Ekalesia i Initia, o le a oo mai le taimi o le a musuia ai le perofeta e fausia se malumalu i Initia,” sa ia faaauau ai. “Soo se siteki lava e faavae, e faateleina ai le avanoa e i ai se malumalu. A o faaali atu e tagata le agavaa ma le naunautai, o le a mulimuli mai ai se malumalu.”
I le faaiuga sa fofogaina ai e Elder Oaks se faamanuiaga: “I lenei uluai siteki i le atunuu maoae o Initia, ou te faamanuia outou ia manatua aoaoga o lenei itula. Ou te faamanuia outou ia manatua feagaiga na outou osia ina ua outou papatiso. Ou te faamanuia outou i se manatua ma se naunautai e tausi poloaiga a le Atua ina ia outou olioli i Ana faamanuiaga.”
O le au peresitene o le siteki o le Siteki fou na faatoa faavaeina o Hyderabad Initia (agavale i le taumatau): Suresh Natarajan, fesoasoani muamua; John Gutty, peresitene; Rajaratnam Bushi, fesoasoani lua.
Na toeitiiti 600 le autalavou nofofua matutua mai Initia, Nepal, ma Sri Lanka sa faapotopoto mo se konafesi a o loma le faavaeina o le uluai siteki i Initia.
Credit: ???
A o asiasi atu i Hyderabad, Initia, sa feiloai ai Elder Oaks ma isi taitai o le Ekalesia ma le faitau selau o le au paia mai Initia, Nepal, ma Sri Lanka.
Credit: ???
Ata na pueina e James Dalrymple