Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.

“O Le Ola Fuafua Lelei E Saunia Ai i Tatou mo le Lumanai,” itulau 12: Faitau eria e ono o loo taua i le tusiga lea e mafai ona tatou faalagolago ai ia i tatou lava. O a nisi o mea e tutupu faafuasei po o ni faafitauli e mafai ona alofia e ala i le atinaeina o le faalagolago o le tagata ia te ia lava i nei eria? Valaaulia tagata o le aiga e mafaufau ma le agaga tatalo po o le fea o eria e tatau ona latou faaleleia ma ia faatutu ni sini e faateleina ai lo latou faalagolago ia i latou lava i na eria.

“O Le Ola Mama i se Lalolagi Lē Mama,” itulau e 42: Ia talanoaina ma tagata o le aiga ia fesili o loo fesiligia i le tusiga. Mafaufau e faasoa atu mataupu faavae ma aafiaga ua faamalosia ai lau molimau e uiga i le ola mama. Ia talanoaina auala e faaaoga ai le fautuaga mai le tusiga.

“Ia Atamai ma Ia Avea ma se Uo,” itulau e 48: Amata i le faitauina o le suega a Elder Hales mo le iloaina o uo lelei. Mafaufau e talanaoaina le taua o le avea ma se uo lelei. Ia valaaulia tagata taitasi o le aiga e mafaufau i ni auala se tolu e mafai ona avea ai o ia ma se uo lelei atu.

“Le Pele Amiga,” itulau e 60, ma le “Faafeiloai Atu i se Vaitau Fou o le Olaga,” itulau e 61: Faitau e uiga i nei tamaiti Peraimeri ma le ala o loo latou sauniuni ai e ulufale atu i Tamaitai Talavou ma Alii Talavou. I le avea ai o se aiga, mafaufau e talanoaina mea na fai e nei tamaiti e saunia ai. Ia valaaulia tagata o le aiga e faitau tamaitusi o le Alualu i Luma o le Tagata Lava Ia po o le Tiute i le Atua ma sue nisi o gaoioiga latou te fiafia e faamaeaina i le lumanai.

Tasi le Afiafi Faaleaiga, Lua Lesona

I se tasi afiafi sa o mai ai o’u matua ma matua o lo’u tina e asiasi mai mo le afiafi faaleaiga. E fiafia uma la’u fanau e toatolu e auai, ma i lenei po o le avanoa lea o la’u tama tama e fitu tausaga le matua e fai ai le lesona. Sa matou saunia se faaaliga laitiiti, tuu i luga ni ata e faatatau i le Foafoaga, ma suesueina ma faamanatu mea o le a ia aoaoina mai. Sa saunia ma sa fiafia lo’u atalii.

I le taimi o le lesona, sa matou faalogologo uma ma le totoa i mea sa faamatala mai e lo’u atalii. Ina ua uma, sa filifili foi Samuelu, o le sa tusa ma le tolu ona tausaga, e manao foi o ia e tuuina mai se lesona. O lea sa ia aveina ai ata ma le faaaliga ma toe faatulaga i luga o le laulau.

I si ona leo malie ma ana upu o ni isi taimi sa le lelei ai le faaleoga, sa tuuina mai ai e Samuelu se lesona o le afiafi faaleaiga. Ma e ui lava ina sa le’i saunia o ia, ae sa faalogologo lelei. Sa ia faamatala mai ia i matou le ala na foafoaina ai le lalolagi ma ta’u mai ia i matou le alofa o Iesu Keriso ia i matou taitoatasi.

Sa matou tetei i le vaaia o le faigofie ona ia aoaoina mai o le lesona— sa faia e pei ona faia e lona uso. Sa faateia ma fiafia o’u matua ma matuamatutua. Sa mafai ona matou iloaina uma le alolofa o nei fanau laiti i le talalelei—ma le alofa o Iesu Keriso mo i latou.

Lizbeth Sánchez Fajardo, Mekisiko