Ofu ma Foliga Vaaia

I le lalolagi i lenei vaitaimi, o le toatele lava e le o malamalama pe faaaloalo foi i tulaga paia o o tatou tino. Ua tu matilatila ai le Au Paia o Aso e Gata Ai i se auala o loo faaalia ai tatou te iloa le taua o o tatou tino (tagai i le [tamaitusi, 2011] Mo Le Malosi o le Autalavou, 6–8). O le itulau e 52 o lenei lomiga, o loo talanoa mai ai, Mary N. Cook, fesoasoani muamua i le au peresitene aoao o Tamaitai Talavou, e uiga i lenei tulaga faatonuina:

“Afai ae fausia se malumalu, e matuai vaavaai lelei lava ma faamautinoa o loo malupuipuia ma matagofie le teuteuina, i totonu ma fafo. O le ki i le fuafuaina o malumalu o le iloaina lea o le malumalu o le faatusa o le Alii-o Lona maota lea. Tatou te faaaloalo i malumalu o ni nofoaga paia lea ua na o i latou e agavaa e mafai ona ulu atu i ai. Tatou te maua le agaga migao i totonu o malumalu aua o sauniga ma feagaiga paia ia sa tatou faatinoina o le a mafai ai ona tatou toe foi atu i lo tatou Tama Faalelagi.

“Ua sili atu le taua o lou tino nai lo le malumalu e sili ona matagofie i luga o le fogaeleele. O oe o se atalii po o se afafine faapelepele o le Atua! Ua faatatau atili nei mataupu faavae—faatusa, faaaloalo, ma le migao—i le tausiga ma le puipuiga e te tuuina atu i lou tino.”

O le a mafai ona fesoasoani ia te oe nei fautuaga i le aoaoina o lau fanau i mataupu faavae sao e uiga i ofu ma foliga vaaia. Ia manatua foi o au faataitaiga i le ofuina o ofu talafeagai o le a aoao ai lau fanau i le taua o le ofuina o ofu e tatau ai.

Fautuaga mo le Aoaoina Atu o le Autalavou

Faitau faatasi ma lau fanau talavou le vaega o ofu ma foliga vaaia i le Mo Le Malosi o le Autalavou. O le faia o lena mea o le a e maua ai le avanoa e talanoa ai i aoaoga faavae, faamanuiaga, ma lapataiga o lenei tulaga faatonuina ma tali ai soo se fesili a lau tama tama po o lau tama teine.
Mafaufau e fai se afiafi faaleaiga i le taua o ofu ma foliga vaaia. E mafai ona e fesili i lou aiga, Afai o loo outou faatasi ma le Alii i le lotu, o le a le ituaiga ofu e te fia ofu ai? E faapefea ona e fia faaali atu oe lava ia te Ia? O le a sou lagona pe afai o fai ou ofu talafeagai? E mafai foi ona outou talanoa i ofu e talafeagai mo isi tulaga, e pei o le aoga, galuega, po o nisi foi gaoioiga faaagafesootai.

Fautuaga mo le Aoaoina o Tamaiti

O o tatou ofu e tau atua mea e taua ia i tatou. Ina ia faapupula atu lenei mataupu faavae, mafaufau e fai se afiafi faaleaiga e oofu ai tagata uma e pei o se faifeautalai pe fai ni ofu lelei o le Aso Sa.
E tusa lava pe laitiiti, e mafai lava e tamaiti ona fai ni ofu talafeagai. Iloilo faatasi ma lau fanau le taiala lea o loo i le itulau e 7 o le Mo Le Malosi o le Autalavou ma ia saunia ni ofu e ogatusa ma na taiala.

Ata na tusia e Scott Greer