Siʻi Kaungāmeʻa
Mālō e lelei mei Mekisikou! Naʻá ku fiefia he maʻu hoʻo tohí mo ʻilo kuo vave mai ho ʻaho fāʻeleʻí. Hangē ʻokú ke kiʻi manavasiʻí he ʻai ke ke ʻosi mei he Palaimelí. ʻE lava nai ke u fakahā atu kau ki he taimi ne u hū ai ki he Kau Finemuí?
Ne u kiʻi manavasiʻi he ʻai ke u hiki mei he Palaimelí. Ne u hohaʻa naʻa ʻikai ke ʻi ai haku ngaahi kaungāmeʻa. Ne u tailiili heʻeku hoko ko e taha ʻo e fānau fefine iiki tahá kae ʻikai ko e taha ʻo e kau taʻu lalahí.
Ka naʻe lelei pē e meʻa kotoa. Naʻe fakaʻekeʻeke au ʻe he pīsopé kimuʻa ʻi hoku ʻaho fāʻeleʻí peá ne fakahā mai ʻe hoko ʻa e liliú ko ha meʻa lelei. ʻI he Sāpaté, ne u kei ongoʻi mā peá u nofo pē he loki ʻo e Palaimelí. Meʻa mālié, ne ʻilo au ai ʻe he taha ʻo e kau taki ʻo e Kau Finemuí. Naʻá ne pehē mai, “Ne u fakakaukau pē te u ʻilo koe heni! Haʻu, kuo taimi ke ta ō ki he kalasí.”
Naʻe talitali lelei au ʻe Sisitā Tiasi ʻi he ʻekitivitī kamatá, peá ne ʻomai kiate au ha tohi ʻe tolu ne u saiʻia ai: Ki Hono Fakamālohia ʻo e Toʻu Tupú, Fakalakalaka Fakatāutaha ʻa e Kau Finemuí, mo ha tohinoa. ʻI heʻeku sio takai holo he lokí, ne u fakatokangaʻi ne u maheni mo ha tamaiki fefine ʻe niʻihi ai mei he Palaimelí. Ne lea fakafeʻiloaki mai e tamaiki fefine ʻe niʻihi ne ʻikai ke u ʻilo. Ne vave ʻeku ongoʻi nongá kae ʻikai ilifia.
Hili ia ne fakaʻau ke lelei ange e meʻa kotoa. Naʻe makehe kiate au ʻa e ngaahi ʻekitvitī ʻa e Mutualé koeʻuhí he ne nau akoʻi mai kiate au ʻa e founga ke u moʻui ʻaki ʻa e ongoongoleleí mo e founga ke u tokoni ai ki hoku fāmilí mo e ngaahi kaungāmeʻá. Pea ʻoku fuʻu fakafiefia ʻa e ʻalu ki he kemí ʻi he taʻú takitaha! Ko e Loumaile au he taimí ni, ʻoku ou ʻamanaki ke fakaʻosi vavé ni pē ʻa e kiʻi tohi Fakalakalaka Fakatāutahá. ʻOku ʻikai ke u faʻa tatali ke tui ʻa e mētali ʻa e Kau Finemuí koeʻuhí ke ne fakamanatu mai kiate au ʻa e lahi ʻo ʻeku ofi ange ki heʻeku Tamai Hēvaní ʻi he ngaahi taʻu kuo hilí.
Ko ia ʻoua te ke manavasiʻi, ʻe hoku kaungāmeʻa. Loto-toʻa peá ke ʻalu ki he Kau Finemuí. ʻOku ou palōmesi atu he ʻikai te ke ongoʻi fakameʻapangoʻia.
ʻOfa Atu,
Malepolo
Tā fakatātaaʻi ʻe Brad Clark