Manatua ʻo ha Ngaahi Moʻui Maʻongoʻonga
Niueli K. Uitenī (1795–1850)
Naʻe fāʻeleʻi ʻa Niueli Kimipolo Uitenī ʻi Veamoniti, USA, ʻi he ʻaho 5 ʻo Fēpueli 1795. Ko ha tangata pisinisi mohu talēnitiʻia pea kamata fakakaungāmeʻa mo fokotuʻu haʻana pisinisi mo Sitenei Kilipati. Naʻe lahi ʻena fefonongaʻakí he kamata ʻena pisinisí. ʻI he taha ʻo e ngaahi fononga fakapisinisi ko ʻení, naʻe feʻiloaki ai ʻa Niueli mo ʻElisapeti ʻAna Sāmita ʻi Ketilani, ʻi ʻOhaiō. Naʻe kaumeʻa ʻa ʻAna mo Niueli ʻi ha taʻu ʻe tolu peá na toki mali ʻi he 1823.
Naʻe fekumi leva ʻa Niueli mo ʻAna ki he moʻoní pea ne ʻi ai e taimi naʻá na kau ai ki he kautaha lotu Kamipelité, ʻa ē naʻa nau tala kuo toe fakafoki mai ai e siasi faka-Kalisitiane ʻo e kuonga muʻá. Naʻe lotu ʻa Niueli mo ʻAna ʻi ha pō ʻe taha “ke ʻilo mei he ʻEikí ʻa e founga [te na] lava ke maʻu ai e meʻafoaki ʻo e Laumālie Māʻoniʻoní.” Naʻe fakamatalaʻi ʻe ʻAna ʻa e vīsone naʻá na maʻu ko e tali ki heʻena lotú: “Naʻe ʻiate kimaua ʻa e Laumālié pea fakapūlouʻi e falé ʻe ha konga ʻao. … Pea naʻá ma fanongo ki ha leʻo mei he ʻaó, ʻoku pehē mai: ‘Teuteu ke maʻu e folofola ʻa e ʻEikí, he ʻoku teu ke hoko mai.’”1
ʻI ha taimi nounou mei hono tali e lotu ko ʻení, naʻe aʻu mai e kau faifekau ʻa e Siasí ki Ketilani ʻi ʻOkatopa ʻo e 1830. Naʻe papitaiso ʻa Niueli mo ʻAna ʻi Nōvema. Hili ha ngaahi māhina siʻi mei ai, naʻe tukituki atu ʻa Siosefa mo ʻEma Sāmita ʻi he matapā ʻo e fāmili Uitenií. ʻI he ui atu ʻe Siosefa e hingoa ʻo Niuelí, naʻe ʻikai ke ʻiloʻi ʻe Niueli ia ʻa e hingoa ʻo e Palōfitá, pea tali mai ʻe Siosefa, “Ko Siosefa au ko e Palōfitá; naʻá ke lotua ke u ʻi heni, pea ko e hā e meʻa ʻokú ke fie maʻu meiate aú?”2 Naʻe nofo leva ʻa e fāmili Sāmitá he ʻapi ʻo e fāmili Uitenií ʻi ha ngaahi uike lahi ʻo aʻu ki Sepitema ʻo e 1832.
Naʻe ʻikai ngata pē ʻi hono foaki ʻe he fāmili Niuelí ha feituʻu ke nofo ai e fāmili Sāmitá, kae toe ʻoange foki mo e konga ki ʻolunga ʻi hono falekoloá ke fakaʻaongaʻi ʻe he Siasí. Naʻe fai e ngaahi fakataha ʻa e kau taki ʻo e Siasí pea mo e ʻApiako ʻa e Kau Palōfitá ʻi he falekoloa ʻo e fāmili Uitenií.
Naʻe ui ʻa Niueli ʻi Tīsema 1831 ko e pīsope ia hono ua ʻa e Siasí pea hoko ki mui ange ko e pule ki hono tokangaʻi e ngaahi meʻa fakapaʻanga ʻa e Siasí, ʻo tokoni ki hono tokangaʻi e paʻanga ʻa e Siasí pea fakahaofi mei he moʻuá. ʻI he faʻahitaʻu fakatōlau ʻo e 1838, naʻe ʻalu ai e fāmili Uitenií ki he Hihifo Mamaʻó, ki Misuli, ʻa ia naʻe toe ui ai ʻa Niueli ko ha pīsope, pea hili mei ai ha taʻu ʻe 10 naʻe kolosi atu mo hono fāmilí ʻi he tokaleleí ki Sōleki Siti, ʻa ia naʻe hoko ai ko e Pīsope Pule ʻo e Siasí.
Naʻe mālōlō ʻa Niueli ʻi he ʻaho 24 ʻo Sepitema 1850, ʻi Sōleki Siti mei he nounou ʻene mānavá.
ʻI laló, kiʻi tā siʻisiʻi ʻi toʻohemá: Ko ha tā tongitongi ʻo e ʻīmisi ʻo Niueli K. Uitenií. ʻI laló, kiʻi tā siʻisiʻi ʻi toʻomataʻú: Ko e fungavaka ki ʻolunga ʻo e falekoloa ʻo Niueli K. Uitenií ʻi Ketilani ʻi ʻOhaiō, ʻa ia naʻe fakahoko ai e Akoʻanga ʻo e Kau Palōfitá mo ha ngaahi fakataha faka-Siasi. ʻI laló: Ko e Falekoloa Uitenií.