Valá mo e Fōtungá

ʻI he māmaní he ʻahó ni, ʻoku ʻikai mahino ki he tokolahi pe fakaʻapaʻapaʻi e natula toputapu ʻo hotau sinó. ʻOku hā makehe ʻa e Kāingalotú ʻi heʻenau teuteu he founga ʻoku hā sino ai ʻetau ʻiloʻi ʻa e mahuʻinga hotau sinó ʻi ha māmani ʻoku siʻi ai hono fakaʻapaʻapaʻi e natula toputapu ʻo hotau sinó (vakai, Ki Hono Fakamālohia ʻo e Toʻu Tupú [kiʻi tohi, 2011], 6–8). ʻI he peesi 52 ʻo e makasini ko ʻení, ʻoku fakamatalaʻi ai ʻa e tuʻunga moʻuí ni ʻe Mele N. Kuki, ko e tokoni ʻuluaki ʻi he kau palesitenisī lahi ʻo e Kau Finemuí:

“ʻI he langa ʻo ha temipalé, ʻoku fai e tokanga lahi ke fakapapauʻi ʻoku maluʻi mo teuteuʻi fakaʻofoʻofa, ʻa loto mo tuʻa. Ko e kī ki hono palani ʻo e ngaahi temipalé ko e mahino ko ia ko e temipalé ʻokú ne fakafofongaʻi ʻa e ʻEikí-he ko Hono falé ia. ʻOku tau fakaʻapaʻapaʻi e ngaahi temipalé ko e ngaahi fale toputapu ʻa ia ko kinautolu pē ʻoku moʻui tāú ʻe ala hū ki aí. ʻOku tau ʻaʻapa ki he temipalé koeʻuhí he ko e ngaahi ouau mo e ngaahi fuakava toputapu ʻoku tau fakahoko aí ʻoku malava ai ke tau toe foki ki heʻetau Tamai Hēvaní.

“ʻOku mahuʻinga ange ho sinó ʻi he temipale fakaʻofoʻofa taha ʻi he māmaní. Ko e foha pe ʻofefine ʻofeina koe ʻo e ʻOtuá! Ko e ngaahi tefitoʻi moʻoni tatau ko ʻení—fakafōtunga, fakaʻapaʻapa mo e ʻaʻapa—ʻoku toe lahi ange ʻenau kaunga ki hono tokangaʻi mo maluʻi ho sinó.”

ʻE lava ʻo tokoni atu e ngaahi fokotuʻu ko ʻení ke ke akoʻi e ngaahi tefitoʻi moʻoni totonu kau ki he valá mo e fōtungá ki hoʻo fānaú. Manatuʻi foki ko hoʻo sīpinga ʻi he vala tāú te ne akoʻi hoʻo fānaú ki he mahuʻinga ʻo e vala ʻoku tāú.

Ngaahi Fokotuʻu ki Hono Akoʻi ʻo e Toʻu Tupú

Lau mo hoʻo toʻu tupú ʻa e konga kau ki he valá mo e fōtungá ʻi he Ki Hono Fakamālohia ʻo e Toʻu Tupú. ʻI hono fai iá te ne ʻoatu ai ha faingamālie ke aleaʻi ʻa e ngaahi tokāteliné, tāpuakí mo e fakatokanga ʻo e tuʻunga totonú mo tali ha ngaahi fehuʻi ʻe fai ʻe ho fohá pe ʻofefiné.
Fakakaukau ke fai ha efiafi fakafāmili ʻi ʻapi ʻi he mahuʻinga ʻo e valá mo e fōtungá. Te ke lava ʻo ʻeke ange ki ho fāmilí, Kapau naʻá ke ʻi he lotú mo e ʻEikí, te ke fie vala fēfē? Te ke fie hā fēfē nai kiate Ia? Te ke ongoʻi fēfē nai ʻi hoʻo vala tāú? Te mou lava foki ʻo aleaʻi ʻa e founga ke vala taau ai ki ha ngaahi meʻa kehe ʻoku hoko, hangē ko e akó, ngāué, pe ngaahi meʻa fakasōsialé.

Ngaahi Fokotuʻu ki hono Akoʻi ʻo e Fānaú

ʻOku fakafofongaʻi ʻe hotau valá ʻa e meʻa ʻoku tau mahuʻingaʻia aí. Ke fakatātaaʻi ʻa e tefitoʻi moʻoni ko ʻení, fakakaukau ke fai ha efiafi fakafāmili ʻi ʻapi pea ʻai ke nau teuteu kotoa hangē ha faifekaú pe vala lelei taha he Sāpaté.
Naʻa mo e kei taʻu siʻí, ʻe lava e fānaú ke kamata vala taau. Toe fakamanatu mo hoʻo fānaú ʻa e ngaahi fakahinohino he peesi 7 ʻo e Ki Hono Fakamālohia ʻo e Toʻu Tupú pea ʻomi e vala ʻoku feʻunga mo e ngaahi fakahinohino ko iá.

Tā fakatātaaʻi ʻe Scott Greer