Ko Hono Talitali Lelei ha ʻĒpoki Foʻou ʻo e Moʻuí
ʻOkú ke nofo nai ʻi ha feituʻu ʻoku liliu ai e lanu ʻo e ʻakaú he teuteu ki he faʻahitaʻu momokó? ʻOku pehē e ngaahi kaungāmeʻá ni ʻe toko fā. Ko Noa B., Tīleni L., Petuliki M., mo Peni M. ʻoku nau nofo kotoa ʻi he Motu ko Pilinisi ʻEtuaté ofi he matāfanga fakahahake ʻo Kānatá. ʻOku mateuteu e fānau tangata ko ʻení ki ha faʻahitaʻu foʻou ʻo e moʻuí, ʻo hangē ko e ʻakaú. Te nau taʻu 12 ʻi he ʻosi ha taʻu ʻe taha, pea ʻoku ʻuhinga ia te nau lea māvae ki he Palaimelí kae fakafeʻiloaki ki he Kau Talavoú. Ko e meʻa ʻeni naʻe pau ke nau lea ʻaki kau ki he tupu haké mo e hoko atú.
Fai pē ho ʻUlungaanga Totonú
ʻI he taimi ne hiki mai ai ʻa Noa ki hení, naʻe tokoniʻi ia ʻe hono ngaahi kaungāmeʻa foʻoú ke liliu ki he anga ʻo e moʻui ʻi he motú. Taimi ní, ko ia ʻoku taʻu motuʻa taha ʻi he kulupú, ʻokú ne tokoniʻi kinautolu ke nau anga ki he moʻui ʻi he Kau Talavoú. Naʻe pehē ʻe Noa kau ki heʻene kamata ʻi he Kau Talavoú, “Ne u hohaʻa kau ki hono tali aú mo hono ʻiloʻi e niʻihi kehé. Naʻe fuʻu tokoni ʻaupito ʻa e ʻalu ki he ngaahi ʻekitivitií.” Ko e hiva manakoa ʻa Noa ʻi he Palaimelí ʻoku fekauʻaki mo e kautau ʻa Hilamaní, pea ko e anga ia ʻene sio ki he kōlomu ʻo e lakanga fakataulaʻeikí—ʻi heʻenau uouangataha mo fāitahá.
Ko ʻene faleʻí? “Fai pē ho ʻulungaanga totonú.”
Fakaʻapaʻapaʻi ʻa e Lakanga Fakataulaʻeikí
Kia Petulikí, ko hono maʻu e lakanga fakataulaʻeikí ʻoku ʻikai ko ha liliu ki ha faʻahinga taʻu. ʻOku ʻuhinga ia ko e moʻui taau mo mateuteu. Naʻe pehē ʻe Petuliki “ʻOku ʻikai te ke maʻu ʻa e lakanga fakataulaʻeikí koeʻuhí kuó ke taʻu 12. Kuo pau ke ke mateuteu.”
ʻOku mahino kia Tīleni ʻa e mahuʻinga ʻo e teuteú. ʻOkú ne feinga ke aʻu ki he lotú ʻi ha miniti ʻe 15 kimuʻa ke ne teuteu fakalaumālie ke tufaki e sākalamēnití. Naʻá ne pehē, “Kuó u ʻosi tufaki tuʻo tolu pe tuʻo fā ʻa e sākalamēnití, pea ʻoku ala mai ʻa e Laumālié ki hoku lotó he taimi kotoa pē. ʻOku ʻikai ke u tui ʻe faifai peá u anga ki ai.”
Naʻe pehē ʻe Peni ʻoku fakamanatu kiate ia ʻa e ʻOhomohe Fakaʻosí ʻi heʻene tufaki ʻa e sākalamēnití: “Naʻe tuʻu ai ʻa Sīsū. ʻOku tau tuʻu ʻi he feituʻu naʻe ʻi ai ʻa Sīsuú, pea ʻokú Ne finangalo ke tau ʻi ai.”
Sio ki he Temipalé
ʻOku ngāue ʻa Peni ke maʻu hono Pale ʻo e Tui ki he ʻOtuá pea ʻokú ne ʻamanaki atu ki he ʻuluaki taimi te ne fakahoko ai ha ngaahi papitaiso maʻá e kau pekiá. Naʻe pehē ʻe Peni, “Kuo teʻeki ai ke u hū ki loto ʻi he temipalé, ka ʻoku fakamoʻoni maʻu pē ʻa e kakai kehé kau ki heʻenau ongoʻi māfana mo lelei hili ʻenau ō ki aí.”
Naʻe toki ʻalú ni ʻa Noa ko ʻene ʻuluaki ʻaʻahi ia ki he temipalé. Naʻá ne pehē naʻe tokangaʻi ia ʻe he kau talavou ʻi heʻene kōlomú hangē pē ha fāmilí. Naʻá ne pehē, “Mahalo te ke ongoʻi tailiili, ka ʻe ʻi ai e kakai ai ke nau tokoni atu kiate koe. Te ke ongoʻi ʻoku talitali lelei koe.”
Noa
Tīleni
Petuliki
Peni
Faitaaʻi ʻe Marissa Widdison