Ko e Feituʻu ʻOku ou Kau Ki Aí
Dorota Musiał, Poland
Kimuʻa ke u kau ki he Siasí, naʻe fonu mamahi ʻeku moʻuí. Hili e vete ʻeku ongomātuʻá ʻi hoku taʻu fitú, naʻe tuku pōpula ʻeku tamaí. Naʻe ʻolokahōlika ʻeku faʻeé pea naʻe mole kotoa e meʻa naʻe mahuʻinga kiate iá. Naʻe ʻave au ke u nofo mo ha fāmili ne nau pusiakiʻi au.
Koeʻuhí ko e ngaahi meʻa ko ʻení, ne vave ange ʻeku tupú ʻi ha tokolahi hoku toʻú. Naʻe ʻikai pē ke u ongoʻi te u lava ʻo maʻu haku tuʻunga, pea ko ia ai naʻá ku faʻa ʻi ha tuʻunga ʻo e angatuʻú. ʻI heʻeku kei siʻi ʻaupitó, ne u kamata ke ifi tapaka mo fai e ngaahi meʻa kehe ʻoku ou ʻilo he taimí ni ʻoku fepaki ia mo e Lea ʻo e Potó. Ne u fakapapauʻi naʻe tonupā ke u taʻe toe malava ha meʻa ʻi he moʻuí.
Ko e meʻa ʻe taha naʻe maʻu ai ʻeku fiefiá ko hono tokoniʻi e kakaí—tatau ai pē pe ko e fakamaʻa fakataha mo kinautolu pe ko e fanongo ki he ngaahi talanoa ʻo ʻenau moʻuí. Ne u fuʻu fie maʻu ke ʻilo ʻe he kakaí te nau lava ʻo falala mai kiate au. ʻI ha taʻu ʻe taha ne u ʻalu ai ʻo mālōlō ʻeveʻeva peá u feʻiloaki ai mo ha fefine toulekeleka naʻá ku pehē ke u tokoni ki ai ʻaki haʻaku fakafanongo kiate ia. Ko ha tokotaha Kalisitiane ia peá ne kamata talanoa mai kiate au kau ki he tui fakalotú.
Kuo teʻeki pē ke u tui moʻoni ki he ʻOtuá. Taimi lahi, ʻi heʻeku fakakaukau ki aí mahalo pē naʻá Ne moʻui, ne u tukuakiʻi Ia ʻi he ngaahi meʻa fakalotomamahi kuó u fouá. Ka ʻi hono fakamatalaʻi ʻe he fefiné ni ʻa e mahuʻinga ʻo e tui ki he ʻOtuá, ne u kiʻi tokanga ki ai. Kimuʻa peá u ʻalú, naʻá ne lea ʻaki ha meʻa naʻe mātuʻaki mahuʻinga: “ʻOku muimui e kau Māmongá ki he ngaahi fekau ʻa e ʻOtuá.”
Kuo teʻeki ai ke u fanongo ʻi he kau Māmongá, ko ia ne u ʻalu ki ʻapi, hū ki he ʻinitanetí, ʻo fekumi. Ne u aʻu ki he Mormon.org ʻo ʻota ha tatau taʻe totongi ʻo e Tohi ʻa Molomoná. Ne ʻomi ia ʻe he kau faifekaú hili ha ngaahi ʻaho siʻi.
Naʻe ʻikai ke u fakapapauʻi pe te u kamata ke tui ki he ʻOtuá, ka naʻe tokoniʻi au ʻe he kau faifekaú ke u ʻilo he ʻikai ke u tui pē kiate Ia ka ke u ʻilo foki Ia. ʻI heʻeku kamata ke lotu mo ako ʻa e Tohi ʻa Molomoná, ne u fakatokangaʻi ʻoku ou ʻi ha fononga fakaʻofoʻofa ʻo e kumi e fiefiá. Ne tuku ʻeku ifi tapaká. Ne tuku ʻeku tukuakiʻi e ʻOtuá pea kamata ke u fakamālō kiate Ia koeʻuhí ko e ngaahi meʻa lelei ʻi heʻeku moʻuí. Ne u ʻilo naʻe mamahi Hono ʻAló koeʻuhí ko ʻeku ngaahi angahalá mo e kotoa ʻo e mamahi ne u ongoʻí. ʻI he ʻaho 28 ʻo ʻOkatopa 2007, naʻe papitaiso ai au ki Hono Siasí.
Kapau naʻe teʻeki ai ke u aʻusia tonu ʻa e liliu mei he lotomamahí ki he fiefiá, he ʻikai te u tui ʻoku malava. ʻI he ʻahó ni ʻoku ou saiʻia ʻi hoku uiuiʻi ʻi he Palaimelí pea ʻoku ou fakamālō he maʻu ʻa e faingamālie ke tokoni ʻi hono fokotuʻutuʻu ʻo ha ngāue tokoni ʻi he konifelenisí ʻa e kau tāutaha kei talavoú ʻi Pōlani. Ko e malava ko ia ke tokoniʻi maʻu pē ʻa e niʻihi kehé tuʻunga ʻi he ngāue tokoni ʻa e Siasí, kuó ne tānaki mai ki he fiefia kuó u maʻu ʻi he ongoongolelei ʻo Sīsū Kalaisí. Ko e meʻa kotoa pē ʻoku ou fai he taimí ni, ʻoku ou fai ʻaki ʻa e ʻofa haohaoa koeʻuhí ko Sīsū Kalaisi. ʻOku ou tui ʻoku fakaʻofoʻofa ʻa e moʻuí pea naʻa mo e taimi ʻoku tau faingataʻaʻia aí, kapau te tau muimui ʻi he Fakamoʻuí, he ʻikai ke tau hē.
Naʻe tonu e fefine ne ma feʻiloakí: ko e tui ki he ʻOtuá ʻoku mahuʻinga. He ʻikai lava ke tau maʻu hatau tuʻunga ʻi he māmani ko ʻení kapau ʻoku ʻikai ke tau ʻilo Ia. ʻOku ou houngaʻia he faifai peá u maʻu ha feituʻu ʻoku ou ʻilo ʻoku ou kau ki ai.