Ngaahi Fehuʻi & Talí
“Ko e hā e ʻuhinga ʻo e fakaʻapaʻapaʻi e lakanga fakataulaʻeiki ʻo e ʻOtuá?”
Ko e lakanga fakataulaʻeikí ʻa e mālohi ʻoku fakahoko ʻaki ʻe he Tamai Hēvaní mo Sīsū Kalaisi ʻEna ngāué. Ko e mālohi maʻongoʻonga taha ia ʻi he māmaní. ʻOku fakafou ʻi he lakanga fakataulaʻeikí hono fakahoko ʻa e ngaahi ouaú, foaki e ngaahi tāpuakí, fakahoko e ngāue fakatemipalé, malangaʻi e ongoongoleleí, mo fakahoko e ngaahi maná.
ʻOku fakafofongaʻi ʻe he kau maʻu lakanga fakataulaʻeikí ʻa e Fakamoʻuí, ko ia ai ʻoku nau fakaʻapaʻapaʻi ʻa e lakanga fakataulaʻeikí ʻaki hono fai e meʻa naʻe mei fai ʻe he Fakamoʻuí kapau naʻá Ne ʻi heni. ʻOku nau fakaʻapaʻapaʻi ʻa e lakanga fakataulaʻeikí ʻaki ʻenau moʻui ke taau mo ia. ʻOku nau fakaʻapaʻapaʻi ʻa e lakanga fakataulaʻeikí ʻaki honau valá, tōʻongá, leá, ngāue tokoní, pea mo ʻenau ngaahi fakakaukaú.
ʻOku lava foki e kau finemuí ʻo fakaʻapaʻapaʻi ʻa e lakanga fakataulaʻeikí ʻaki hono tauhi ʻenau ngaahi fuakava ʻi he papitaisó pea ʻaki ʻenau kau ʻi he loto ʻapasia ki he ngaahi ouau ʻo e lakanga fakataulaʻeikí hangē ko e sākalamēnití pe ngāue fakatemipalé. ʻOku lava ke nau poupouʻi ʻenau tamaí, ngaahi tuongāʻané, mo e kau maʻu lakanga fakataulaʻeiki kehé ʻi hono tauhi e ngaahi fekaú mo moʻui taau ke fakahoko honau ngaahi fatongia lakanga fakataulaʻeikí.
ʻOku tau lava kotoa ke fakaʻapaʻapaʻi ʻa e lakanga fakataulaʻeikí ʻaki e ngāue faivelenga ʻi hotau ngaahi uiuiʻí, ʻaki hono fakaʻapaʻapaʻi kinautolu ʻoku nau maʻu e lakanga fakataulaʻeikí, ʻaki hono fakaʻapaʻapaʻi ʻa e ngāue kuo lavá, pea ʻaki hono fakaʻapaʻapaʻi ʻa e ngaahi ouau mo e ngaahi fuakava ʻokú ne [lakanga fakataulaʻeikí] tokoniʻi kitautolu ke tau maʻú.
ʻAi Ke Ngali ko ha Fakafofonga ʻo e ʻOtuá
Kapau ʻe lava ke mahino kiate kitautolu hono fakaofo ʻo e foaki mai ʻe he ʻOtuá ʻa e meʻaʻofa ní, tā ʻe faingofua hono fakaʻapaʻapaʻi ʻo e lakanga fakataulaʻeikí: ngāue mo e loto houngaʻia pea fakaʻapaʻapaʻi e mālohi ʻokú ke falala ki aí. Fehuʻi hifo kiate koe, kapau naʻe ʻilo ʻe he taha kotoa pē ʻoku mau feohi ʻoku ou maʻu e mālohi ʻo e ʻOtuá, naʻa nau mei fakaʻapaʻapaʻi lahi ange pe siʻi ange nai kiate Ia? Ko e fakaʻapaʻapaʻi ia ʻo e lakanga fakataulaʻeikí—ko hono ʻiloʻi ia ko e fakafofonga koe ʻo e ʻOtuá pea fai ho lelei tahá ke ngāue ʻi ha founga ʻokú ne fakahaaʻi e fakaʻapaʻapa ki he falala kuó Ne fai kiate koé.
Meisoni R., taʻu 19, Kololato, USA
Ke ke Angatonu
ʻI heʻeku hoko ko ha finemuí te u lava ke pehē ʻoku ʻikai fie maʻu ia ke u fakaʻapaʻapaʻi e lakanga fakataulaʻeikí. Ka ʻoku fie maʻu kotoa e kau finemuí ke nau fai ia. ʻOku tau fakaʻapaʻapaʻi e lakanga fakataulaʻeikí ʻaki ʻetau angatonú. ʻOku tau fakaʻapaʻapaʻi e lakanga fakataulaʻeikí ʻaki hono tokoniʻi e kau talavoú ke maʻa ʻenau fakakaukaú. ʻOku tau vala taau pea lea ʻaki e ngaahi lea ʻoku maʻa. ʻI hono fai ʻení, ʻoku tau tokoniʻi ai e kau talavoú ke fakaʻapaʻapaʻi e lakanga fakataulaʻeikí, pea tau fakaʻapaʻapaʻi ai foki ʻe kitautolu ʻa e lakanga fakataulaʻeikí.
Malisa B., taʻu 14, ʻAlesona, USA
Fai Ho Fatongia ki he ʻOtuá
Ko ʻeku fakakaukaú, ko e founga mahuʻinga taha ke fakaʻapaʻapaʻi ʻa e lakanga fakataulaʻeikí ko hono fai ʻa e ngaahi meʻa naʻe mei fai ʻe he ʻEikí tonu kapau naʻá Ne ʻi heni he māmaní, koeʻuhí he ʻoku tau fakafofongaʻi ʻa Sīsū Kalaisi. ʻOku ʻuhinga ia ke tau fakahoko kotoa e ngaahi tukupā, fatongia, mo e ngaahi palōmesi ne tau fai mo e ʻOtuá he taimi ne fakanofo ai kitautolu ki he lakanga fakataulaʻeikí. ʻI hono fakaʻapaʻapaʻi Hono lakanga fakataulaʻeikí, ʻoku tau muimui ai ki Heʻene fekaú ke “tuʻu hake pea ulo atu, koeʻuhí ke hoko ʻa [ʻetau] māmá ko ha fuka ki he ngaahi puleʻangá” (T&F 115:5). ʻOku tau tokoniʻi ai e niʻihi kehé ke nau ʻilo ʻoku ʻi māmani e kau tamaioʻeiki tokolahi ʻa e ʻOtuá kuo ʻosi fakamafaiʻi.
Pisimaʻake B., taʻu 18, Sanitō Tomingikou, Lepupelika Tominikaní
Fakahaaʻi e Fakaʻapaʻapa ki he Lakanga Fakataulaʻeikí
ʻOku ou tui ko hono fakaʻapaʻapaʻi e lakanga fakataulaʻeikí ke maʻu ha fakaʻapaʻapa mo ha loto falala ʻi hono ngāue ʻaki e lakanga fakataulaʻeikí. Ko e taimi te ke maʻu ai ha kau mēmipa ʻo e Lakanga Taulaʻeki Faka-ʻĒloné ʻoku nau fakaʻapaʻapaʻi e lakanga fakataulaʻeikí mo e sākalamēnití ʻo hangē ko ia ʻoku hoko ʻi homau uōtí, te ke lava leva ʻo maʻu ha ngaahi aʻusia maʻongoʻonga ʻi hono tufaki mo teuteu e sākalamēnití. ʻOku mau tui sote hina mo e hēkesi kotoa. ʻOku mau ʻilo ʻoku ola lelei ia ʻi he uōtí, pea ʻoku pehē pē mo au. ʻOku ou ʻiloʻi ko hono maʻu e lakanga fakataulaʻeikí ko e meʻa lelei taha ia kuo hoko kiate aú.
Heniseni B., taʻu 15, Tekisisi, USA
ʻOua ʻe Holoki Hoʻo Ngaahi Tuʻunga Moʻuí
ʻOku ʻuhinga e fakaʻapaʻapaʻi e lakanga fakataulaʻeikí ke ʻoua naʻá ke tuku koe ki ha ngaahi tuʻunga ʻokú ke ʻilo te ke holoki ai hoʻo ngaahi tuʻunga moʻuí. ʻI he taimi ne mau ako ai e Fuakava Motuʻá ʻi he seminelí, ne mau ʻilo ʻi he Sēnesi 39 ʻa e hoko ʻa Siosefa ʻo ʻIsipité ko e faʻifaʻitakiʻanga ʻo hono fakaʻapaʻapaʻi hono lakanga fakataulaʻeikí ʻaki ʻene hola mei he ngaahi feinga ange ʻa e uaifi ʻo Potifaá.
Ko e founga ʻe taha ke tokoni mai ai ʻa e kau finemuí, ʻi hono fakaʻapaʻapaʻi e lakanga fakataulaʻeikí ko haʻanau muimui ki he ngaahi tuʻunga moʻui mo e vala ʻoku tāú ʻi he Ki Hono Fakamālohia ʻo e Toʻu Tupú.
Siosefa B., taʻu 16, Tekisisi, USA
Poupouʻi e Lakanga Fakataulaʻeikí
ʻOku ʻuhinga ia kiate au e fakaʻapaʻapaʻi e lakanga fakataulaʻeikí ke fakaʻapaʻapaʻi mo poupouʻi ʻe he kau talavoú ʻa e meʻaʻofa kuo foaki mai ʻe he ʻEikí kiate kinautolú. ʻI he taimi ʻoku ou sio ai ʻoku fakaʻapaʻapaʻi ʻe ha talavou ʻa e lakanga fakataulaʻeikí, ʻoku ou ongoʻi ha nonga ʻoku lahi ange pea ʻoku ou fakaʻapaʻapaʻi lahi ange ʻa e talavou ko iá. Kuo tuku ʻe he Tamai Hēvaní kiate ia ʻa e lakanga fakataulaʻeikí, ko ia ʻoku ou ongoʻi ko e fatongia ia ʻo ha talavou ʻo ʻikai ngata pē ʻi hono maʻu ʻo e lakanga fakataulaʻeikí ka ke poupouʻi foki ia.
Melinitā B., taʻu 16, Uāsingatoni, USA
Manatuʻi e Fakamoʻuí
Ko e lakanga fakataulaʻeikí ko e mālohi moʻoni pē ia ʻo e ʻOtuá ʻi he māmaní pea ʻokú ne fakahaaʻi mai kiate kitautolu ʻa e hala ke tau foki ai kiate Iá. ʻI he taimi ʻoku tau fakakaukau ai ki hono fakaʻapaʻapaʻi e lakanga fakataulaʻeikí, ʻoku tau fakakaukau ki he ngaahi akonaki ko ʻeni meia Palesiteni Tōmasi S. Monisoní mo e toenga ʻo e kau ʻAposetoló. Ko e founga lelei taha ki hono fakaʻapaʻapaʻi e lakanga fakataulaʻeikí ko hono fai e ngaahi meʻa kuo akoʻi kiate kitautolú, ʻa ia ʻokú ne tuku kitautolu ke tau manatu ki he Fakamoʻuí. ʻI he taimi ʻoku tau manatu ai kiate Iá, ʻe ʻiate kitautolu leva Hono Laumālié. ʻOku fakaʻatā kitautolu ʻe hono maʻu e Laumālié ke tau nofo maʻu ʻi he meʻa totonú pea tau hoko ko e faʻifaʻitakiʻanga ʻo e ngaahi tuʻunga moʻui ʻo e ongoongoleleí.
Kalasi Lautohi Faka-Sāpaté: Kylie E., Jaiten B., Joseph E., Alexandra R., Kaylie V., Alisha F., mo Haylee W. (ʻikai hā he taá); ʻAitahō, USA