Naʻá ku Lotua ha Loto-toʻa
Fei Tianalivelo, Matakasikā
Ko ʻeku ongomātuʻá ko e ongo mēmipa ʻo e Siasí, ka ʻokú na māmālohi pē. ʻOku fakaiku ʻeni he taimi ʻe niʻihi ki ha fepaki koeʻuhí he ʻokú na tui ʻoku totonu ke muʻomuʻa ʻa e taimi ʻo e fāmilí ʻi ha toe meʻa—ʻo muʻomuʻa he ʻalu ki he lotú, fakahoko hoku ngaahi uiuiʻi ʻi he Siasí, mo e fakahoko e ngaahi ʻekitivitī kehé.
Koeʻuhí ko ha taki au ʻi he Palaimelí mo ha mēmipa ʻo e kuaea ʻa e uōtí, ʻoku fepaki he taimi ʻe niʻihi ʻeku ngaahi fakataha faka-Siasí mo e ngaahi fatongia fakafāmilí. ʻI heʻeku teuteu ʻi he ʻaho ʻe taha ke ʻalu ki ha fakamafola fakakonifelenisi lahi ʻi homau falelotú ʻi ʻAnitananalivo, naʻe fakamanatu mai ʻe heʻeku ongomātuʻá ʻoku ʻi ai ʻemau kau ʻaʻahi ʻi homau ʻapí.
Naʻe talamai ʻe heʻeku faʻeé, “Kuo pau ke ke fili ʻi ho fāmilí mo e Siasí. Te ke nofo heni mo kimautolu ʻo liʻaki ʻa e konifelenisí, pe ko hoʻo ʻalu ki he konifelenisí peá ke fehangahangai mo ha tautea.”
Ne u pehē ke ʻoua te u fakafekiki mo ʻeku faʻeé. Neongo ia, ne u tuku ha kiʻi taimi ke u kole ki he Tamai Hēvaní ke ʻomi kiate au ha loto-toʻa mo ha mālohi. Ne u kole foki kiate Ia ke tokoniʻi au ke u ʻilo ʻa e meʻa ke faí. ʻOku totonu nai ke u nofo ʻi ʻapi mo hoku fāmilí pe te u ʻalu ki he lotú ʻo fanongo ki he leʻo ʻo e palōfitá?
ʻI he ʻosi pē ʻeku lotú, kuó u lava ʻo ongoʻi ʻa e Laumālie Māʻoniʻoní. Ne u ongoʻi e Laumālié ʻokú ne fakalotolahiʻi au ke u talaange ki heʻeku faʻeé hono mahuʻinga kiate au ke u ʻalu ʻo fanongo ki he palōfitá. Ne u ongoʻi ʻoku totonu ke u fakahā kiate ia te u maʻu ha akonaki fakapotopoto ʻo ʻikai ngata pē ʻi heʻeku moʻui he ʻaho ní kae pehē foki ki hoku kahaʻú.
ʻOku lava ʻe he ʻOtuá ʻo fakahoko ha ngaahi meʻa fakaofo, pea naʻá Ne fakamolū e loto ʻeku ongomātuʻá ke na tuku ange au ke u ʻalu ki he konifelenisi lahí ʻo ʻikai ha tautea. Ko ha aʻusia fakaofo ʻeni ʻi heʻeku moʻuí. Naʻá ne fakapapauʻi mai kiate au ʻa e moʻoni ʻo e folofolá ʻa ia ʻoku pehē, “Pea ʻi he mālohi ʻo e Laumālie Māʻoniʻoní te [tau] lava ai ke ʻiloʻi hono moʻoni ʻo e ngaahi meʻa kotoa pē” (Molonai 10:5).
ʻOku ou ʻilo kapau te tau fakatefito ʻetau ngaahi ngāué ʻi he ngaahi tefitoʻi moʻoni ʻo e ongoongoleleí pea fakafanongo ki he Laumālié, te tau fiefia maʻu pē ʻi heʻetau ngaahi filí. Naʻe fakamālohia ʻe he aʻusia ko ʻení ʻeku fakamoʻoní ʻoku ʻi ai ʻa e ʻOtuá maʻatautolu pea ʻoku tokoniʻi kitautolu ʻe he Laumālie Māʻoniʻoní ʻi heʻetau moʻuí.