Teuteu ki ha Hulohula
Tā Fakatātā ʻe Scott GREER
Naʻe ʻahiʻahiʻi au ke u fai ʻa e meʻa ʻoku fai ʻe he taha kotoá, ka ne u toki fakatokangaʻi hake ne u fie maʻu ke u hoko ko ha faʻifaʻitakiʻanga.
ʻI hoku taʻu hongofulu tupú, naʻe faingataʻa he taimi ʻe niʻihi ke u moʻui ʻaki e ongoongoleleí. Naʻe ʻikai ke tokolahi ha kāingalotu ʻo e Siasí ʻi he feituʻu naʻá ku nofo aí, pea ko e taimi ʻe niʻihi, naʻe ʻai ʻe hoku ngaahi kaungāmeʻa naʻe ʻikai ke nau kau ki he Siasí ke faingataʻa ange kiate au ke u fai ʻa e meʻa totonú.
Naʻe lea mai ha taha ʻo hoku ngaahi kaungāmeʻá kiate au kimuʻa ke fai ha hulohula, “ʻOku totonu ke ke tui ʻeni; ʻoku hoa ia mo e lanu ho fofongá,” Naʻá ne fakaʻaliʻali mai ha kofu ke u fakaʻaongaʻi, ka naʻe ʻikai ha nima ʻo e kofú. Ne u fili ke u tui e kofú ʻaki ha sāketi.
ʻI heʻeku aʻu ki aí, naʻe ʻikai ha toe taha ia naʻá ne tui ha kofu ʻoku ʻi ai hano nima, pea ne u ongoʻi hangē ʻoku ou fuʻu ʻilongá. ʻI heʻeku kamata ke fuʻu māfaná, ne talamai ʻe hoku ngaahi kaungāmeʻá ʻoku totonu ke u toʻo ʻa e sāketí pea te u hā fakaʻofoʻofa ange ai:
Ko e taimi naʻe ʻai ai ke u fakatonuhiaʻi hono toʻo e sāketí, ne u manatuʻi hoku tāpuaki fakapēteliaké. Naʻe fakahā mai ʻe hoku tāpuakí ʻe lahi hoku ngaahi ʻahiʻahí pea kapau te u tō, ʻe muimui e tokolahi ʻiate au. Ko e taimi ia ne u fakatokangaʻi ai ne fie maʻu ke u fai ʻa e meʻa totonú—ʻo ʻikai ngata pē ʻiate au ka ki he niʻihi ʻoku nau falala mai kiate aú. Ne u fili ke u tui pē ʻa e sāketí.
Taimi ʻe niʻihi naʻa nau fakakataʻaki au ko e ʻikai ke u fai ʻa e ngaahi meʻa naʻe fai ʻe he toengá, ka naʻá ku toʻa pea tāpuekina au koeʻuhí ko ia. Ne u ʻilo kimui ange kuo falala ha kakai tokolahi kiate au. Naʻe fakahā mai ʻe haku ngaahi kaungāmeʻa ʻe niʻihi naʻa nau fakaʻapaʻapaʻi au heʻeku muimui ki heʻeku ngaahi tuʻunga moʻuí. Naʻa nau kole fakamolemole mai heʻenau fakafaingataʻaʻiaʻi au ʻi he ʻikai ke u fai ʻa e ngaahi meʻa naʻe fai ʻe he toenga ʻi he akoʻanga māʻolungá.
Koeʻuhí naʻá ku muimui ki he ngaahi tuʻunga moʻui ʻa e Siasí mo feinga ke u hoko ko ha faʻifaʻitakiʻanga leleí, naʻe lava ke u maʻu ha ngaahi aʻusia ʻi he ngāue fakafaifekaú mo akoʻi ʻa e ongoongoleleí ki he niʻihi kehé. Naʻe ʻikai ke u mei lava ke tokoniʻi e niʻihi kehé kapau naʻe ʻikai ke u fai ʻa e meʻa totonú.