ʻOku Teuteuʻi KITAUTOLU KI HE KAHAʻÚ ʻE HE Moʻui Fakapotopotó

ʻOku tui ʻa e Kāingalotu ʻo e Ngaahi ʻAho Kimui Ní ki he mateuteú mo e moʻui fakafalala pē kiate kitá. ʻOku tau tui ki he mateuteu fakaako ke maʻu ha ngāue maʻuʻanga moʻuí, mateuteu fakapaʻanga ki he taimi ʻo e faingataʻaʻia fakapaʻangá, mo e mateuteu fakatuʻasino ki he ngaahi faingataʻa fakanatulá pe ngaahi faingataʻa kehé. Ka ko e mahuʻinga tahá, ʻoku tau tui ki he mateuteu fakalaumālie ki he Hāʻele ʻAngaua Mai ʻa Sīsū Kalaisí pea mo e toe nofo fakataha mo ʻetau Tamai ʻi Hēvaní. ʻOku ui ʻa e founga ko ʻeni ʻo e mateuteú ko e moʻui fakapotopoto.

ʻOku hā mei he moʻui fakapotopotó hotau natula taʻengata moʻoní: ʻoku “ʻikai fakamālohiʻi ke [tau] ngāue ʻi ha faʻahinga founga” (2 Nīfai 2:26). ʻOku finangalo ʻa e ʻEikí ke tau fua hotau fatongiá mo tauʻatāina (vakai, T&F 78:14). ʻOkú Ne finangalo ke tau moʻui fakapotopoto koeʻuhí ko kitautolu, ʻi he founga ngāué: fua fatongiá, foaki ʻofá, fakapotopotó mo e anga-ʻofá. He ko e lahi ange ʻetau moʻui fakafalala pē kiate kitautolú, ko e lelei ange ia ʻa e malava ke tau tokoni ki hotau fāmilí mo e niʻihi kehé. ʻE lava fēfē ke tau fafanga ʻa e fiekaiá kapau ʻoku tau fiekaia kitautolu? ʻE lava fēfē ke tau vahevahe ʻa e ʻiló kapau ʻoku ʻikai ke tau maʻu ʻe kitautolu ʻa e ʻiló? ʻE lava fēfē ke tau langaki e tui ʻa e niʻihi kehé kapau ʻoku ʻikai ke tau maʻu e tuí?

ʻOku kau e ngaahi meʻá ni ʻi he ngaahi tefitoʻi moʻoni ʻo e moʻui fakapotopotó:

Teuteú. “Mou teuteu ki he meʻa ʻe hoko maí, he ʻoku ofi mai ʻa e ʻEikí” (T&F 1:12).
Ngāué. “ʻOua naʻa mou nofo noa” (T&F 42:42).
“Fekumi ki he ʻiló, ʻio, ʻi he ako pea ʻi he tui foki” (T&F 88:118).

Ko e taimi ʻoku fai ai ʻe he kāingalotu ʻo e Siasí ʻa e meʻa kotoa ʻoku nau lava ke tokonaki maʻanautolu kae kei fusimoʻomo pē ʻenau ngaahi fie maʻu vivilí, ʻoku nau ʻuluaki kole tokoni leva ki honau fāmilí. Kapau ʻoku ʻikai ke feʻunga ʻeni, ʻoku lava ke tokoni ʻa e Siasí. ʻOku lava ke fakaʻaongaʻi ʻe he kau pīsopé mo e kau palesiteni fakakoló ʻa e ngaahi maʻuʻanga tokoni mei he “fale tukuʻanga koloa ʻa e ʻEikí” ke tokoniʻi e kāingalotú (vakai, T&F 82:18–19). ʻOku fakataumuʻa ha faʻahinga tokoni mei he Siasí ke tokoniʻi e kāingalotú ke nau tokoniʻi pē ʻa kinautolu pea ke fakaʻaiʻai e ngāué ʻi heʻenau moʻuí.

ʻOku tau lava ʻo ngāue ke tau fakafalala pē kiate kitautolu ʻi he ngaahi tafaʻaki ko ʻení:

Mālohi fakalaumālié: Falala ki he ʻEikí; tauhi ʻa e ngaahi fekaú; lotu mo ako fakaʻaho e folofolá; tokoniʻi e niʻihi kehé.
Moʻui lelei fakatuʻasinó: Tauhi e Lea ʻo e Potó; fakamālohisino; maʻu ha mohe feʻunga; angaʻaki e moʻui maʻa mo haisiní.
Akó: Poto he laukongá mo e tohí; maʻu ha ngaahi taukei fakangāue; ako “mei he ngaahi tohi lelei tahá” (T&F 88:118).
Ngāue maʻuʻanga moʻuí: Ngāue ke tokonaki maʻau mo e ngaahi fie maʻu ho fāmilí.
Meʻakai tauhi ʻi ʻapí: Tānaki ha vai inu maʻa mo tānaki māmālie maʻu pē ha meʻakai ʻokú ke kaí mo ha meʻakai fakatolonga taimi lōloa ange hangē ko e kēlení mo e pīní.
Ngaahi meʻa fakapaʻangá: Totongi e vahehongofulú mo e ngaahi foakí; fakaʻehiʻehi mei he fakamoʻua taʻe ʻuhingá; tānaki māmālie ha paʻanga talifaki.

Mei toʻohemá: Ko e Hāʻele Angaua Maí, tā ʻe Grant Romney Clawson © IRI; ngaahi tā fakatātaá ne fai ʻe Craig Dimond, Christina Smith, John Luke, mo Robert Casey © IRI; tā ʻo e fuaʻi selí ne fai ʻe David Stoker © 2008