Kae ʻOua Ke Tau Toe Feʻiloaki
ʻOku Hokohoko Mai Pē e Hoko ʻa e Ngaahi Meʻa Leleí
ʻI heʻeku hoko ko ha taha ʻoku fakameʻapangoʻia he liliu vave ʻa e lolotongá ʻo kuohilí, ne u houngaʻia ʻi he fakamanatu ko ia ke fiefia ʻi he taimí ni pea hanganaki atu ki he kahaʻú.
Ko ha pō Falaite angamaheni pē ʻeni. Ne u nofo ai mo hoku ngaahi kaungāmeʻa ofí ʻi hoku ʻapí hili haʻamau sio faiva, ʻo mau talanoa leʻo siʻi mo mau kakata leʻo lahi. Ne ʻi ai ha ongoʻi fiemālie moʻoni pea ʻikai lava ke tuku ʻeku malimalí ʻi he vilo takai ʻemau fepōtalanoaʻaki ʻi he lokí. Ne ʻi ai ha niʻihi ne mau toki maheni pē he ngaahi māhina siʻi kuo ʻosí; pea ko e niʻihi ne u ʻilo ha taʻu ʻeni ʻe 25.
Ne aʻu ki ha taimi ne mau fevahevaheʻaki ai mo e ngaahi kaungāmeʻa fuoloá ni ha ngaahi manatu melie ki he niʻihi homau ngaahi kaungāmeʻa he kolisí ʻi he ngaahi taʻu kimuʻá. ʻI heʻemau talanoá, ne u fakakaukau ki heʻeku ʻofa ki he ngaahi kaungāmeʻa ko ʻení, ʻemau faʻa fiefiá, pea mo ʻemau vāofí. Ko ʻeni kuo mau ʻosi mei he akó pea hiki ki ha ngaahi feituʻu kehekekehe ʻo e māmaní, pea ʻilo ʻoku mau ʻi ha ngaahi tūkunga ne ʻikai ke mau ʻamanaki ki ai. Ne u kiʻi māpuhoi he mole ʻa e ngaahi ongo ko iá, peá u sio takai he lokí ki he ngaahi fofonga malimali naʻa nau ʻātakaiʻi au he taimi ko iá pea haʻu fakafokifā ai ha fakakaukau kiate au: ʻoku hokohoko mai pē e hoko ʻa e ngaahi meʻa leleí.
Ne hoko e fakakaukau mahinongofua ko iá ko ha meʻa mahuʻinga kiate au, tautautefito he naʻá ku faingataʻaʻia maʻu pē he fehangahangai mo e liliú peá u momou ke tukuange e ngaahi meʻa ʻoku leleí. ʻOku ou manatu ʻofa ki he kuohilí neongo ʻoku ou kei ʻi he lolotongá, ʻo u hohaʻa ke fiefia kakato he taimi ko ē ʻa ia ʻoku ou ʻiloʻi fakapapau ʻoku ou moʻui aí. ʻOku ou ʻilo ko e taimi ʻoku ou maʻu ai ha meʻa leleí, ʻoku ou fie puke maʻu ia ʻo ʻoua ʻe toe tukuange; ko e pō Falaite fakafiemālie mo fakafiefia ko ʻení, ko e taha ia ʻo e ngaahi taimi lelei ko iá. Ko e angamahení, ko e taimi ko ia ʻoku ou ʻiloʻi ai e lelei e meʻa ko iá, ʻoku ou fakakaukau leva ki he vave e mavahe atu ʻa e meʻa kotoá, pea ʻe faifai pē pea ʻe mole ki he taimí pe tūkungá.
Ka ko e pōní, ne ʻikai ha loto fakameʻapangoʻia. ʻI heʻeku tangutu fakalongolongo, ʻo ʻātakaiʻi au ʻe he kakai ne u ʻofa aí, ne u ʻiloʻi neongo kuo pau ke fakanatula e ngata ha ngaahi meʻa lelei pea pau ke hoko ha ngaahi meʻa faingataʻa ʻi he kahaʻú, ʻe kei hokohoko mai pē e ngaahi meʻa leleí. Pea te nau kei hoko mai pē—ʻo kapau te u fakaʻatā ke nau hoko mai. Neongo naʻe hiki e niʻihi ʻoku ou ʻofa aí, ʻe fetongi ia ʻe ha kakai foʻou mo fakaofo pea mo ha ngaahi aʻusia ne ʻikai te u ʻamanaki ki ai.
ʻOku faingataʻa he taimi ʻe niʻihi ke hoko atu, ka kuo pau ke tau fai ia. ʻOku ʻikai ʻuhinga e hoko atú ke fakangaloʻi e ngaahi kaungāmeʻá, mo fakamālohiʻi ke ngalo e ngaahi manatú. ʻOku ʻuhinga ia ke fakaava hotau lotó ki ha fiefia mo ha ngaahi aʻusia lahi ange.
Hili ha ngaahi uike mei he Falaite ko iá, ne tukuange e kau palesitenisī ʻo e kakai lalahi kei takavou ʻi he kolo ne u ʻi aí. Mahalo ʻe lava ke fakamoʻoni ki ai ha taha pē kuo ʻi ha kiʻi kolo tokosiʻi, ne faingataʻa ke fakakaukau ki he meʻa ʻe hoko ʻi he ʻikai ke lava ʻo fakafalala homau koló ki he kau tangatá ni pe ko honau malí, ʻa ē kuo mau ʻofa mo falala aí. Ka ne u kuikui peá u toutou fai ʻa e ngaahi leá ni kiate au pē, ʻa ē ne u maʻu he Falaite ko iá: ʻoku hokohoko mai pē e hoko ʻa e ngaahi meʻa leleí. Ne u maʻu ai ha fakafiemālie pea mateuteu ki he liliú.
Ko e liliú ko e founga ia ʻa e ʻEikí. ʻOkú Ne finangalo ke tau fiefia pea tupulaki. Ke tau loto vēkeveke ke hoko atu ʻetau moʻuí. Ko e moʻuí ko ha fononga, pea lolotonga ʻetau fiefia ʻi he lolotonga ní mo teuteu ki he ngaahi faingataʻa kuo pau ke hoko maí, kuo pau ke tau ʻunu ki muʻa, maʻu ha ʻamanaki lelei, mo fakaava hotau lotó ki he ngaahi aʻusia mo e ngaahi meʻa lelei kuo pau ke hoko maí.
Tā fakatātaaʻi ʻo e ʻatá ʻe Matthew Reier