Kidavaki e dua na Gauna Vou ni Bula
O vakaitikotiko li ena dua na vanua e dau veisau kina na roka ni vunikau me vakavakarau ena vulaibatabata? E vakakina vei iratou e lewe va na veitokani. Eratou vakaitikotiko kece vakatikitiki ena baravi ni tokalau kei Kenada, ena Yanuyanu o Prince Edward, o Noah B., Dylan L., Patrick M., kei Ben M. Me vaka ga na vunikau, eratou sa vakavakarau tu na gonetagane oqo ena dua na gauna vou ni bula. Eratou sa na yabaki 12 ena loma ni dua nodratou yabaki vata vakai iratou, ka sa kena ibalebale na vakamoce ki na Lalai ka vakabula ki na Cauravou. Oqo na ka era na kaya me baleta na tubu cake kei na toso ki liu.
Mo Tudei
Ena gauna a toki mai kina eke o Noa, era vukei koya nona itokani vou me vakamatautaka na bula ena yanuyanu. Ena gauna oqo, me vaka ni sa qase duadua ena ilawalawa, sa vukei ira tiko me ra vakamatautaka tiko na bula ena Cauravou. A kaya vaqo o Noa me baleta na tekivutaki ni Cauravou, “Au lomaleqataka noqu na ciqomi kei na noqu veikilai kei ira eso tale”. “E veivuke vinaka sara na vakaitavi ena itaviqaravi.” Na sere ni Lalai taleitaki nei Noa sa ikoya me baleta na mataivalu nei Ilamani, ka sa ikoya oqori nona raica na kuoramu ni matabete— me cokovata, duavata.
Nona ivakasala? “Mo Tudei.”
Rokova na Matabete
Vei Patrick, na ciqomi ni matabete e sega ni baleta ni sa yacovi e dua na yabaki ni bula. Sa ikoya e baleta na kilikili kei na vakavakarau. “O sega ni ciqoma na matabete baleta wale ga nomu yabaki 12,” a kaya o Patrick. “E dodonu mo vakavakarautaki iko.”
E kila tu o Dylan na kena bibi na vakavakarau. E tovolea me dau yaco ki valenilotu ni vo e 15 na miniti me vakavakarautaki koya ena votai ni sakaramede. “Au sa vota na sakaramede vakatolu se vakava, kei na veigauna yadua e tara na lomaqu na Yalotabu. Au sega ni vakabauta niu na vakamatautaki au kina,” a kaya.
A kaya o Ben ni kena votai na sakaramede e vakalesuya mai vua na iOtioti ni Kana Vata: “A tucake tu e kea o Jisu. Eda a tucake vata tu kei Jisu, ka vinakata o Koya meda tu e kea.”
Rai ki na Valetabu
Sa cakacakataka tiko o Ben me rawata nona iCocovi ni Vakabauta na Kalou ka sa vakanamata tiko nona papitaisotaki ira na mate ena imatai ni gauna. “Au se bera mada ni lako ki na valetabu, ia e wasoma nodra dau soli ivakadinadina eso na tamata ena kena maleka ka totoka na veika era vakila ni oti nodra lako kina,” a kaya o Ben.
A lako wale ga oqo o Noa ki na valetabu ena imatai ni gauna. A kaya ni o ira na cauravou ena nona kuoramu era kauwaitaki koya me vaka na matavuvale. “E rawa mo vakila na rere, ia era na tu e kea na tamata me vukei iko, “a kaya. “O na vakila nomu kidavaki.”
Noa
Dylan
Patrick
Ben
iTaba mai vei Marissa Widdison