Bulago ena Lotu

Vakatabuya na iApositolo na KNK Vou e Filipaini

Na Koronivuli ni Kaulotu e Filipaini, ka a vakatabuya ena ika 20 ni Me 2012 o Elder Russell M. Nelson ena Kuoramu ni iApositolo Le Tinikarua, e rawa ni ra qaravi kina e 144 na daukaulotu mai Filipaini, Cambodia, Hong Kong, Idia, Indonesia, Mongolia, Pakisitani, Sri Lanka, Taiwan, kei Thailand. Era sa vakavulici vakavinaka tu na daukaulotu oqo ena nodra vosa ni vanua.

Na valelevu e rua ni koronivuli e tiko kina e dua na vanua ni soqoni, vanua ni vakavakadewa, e dua na vanua ni kompiuta, vanua ni savasava, rumu ni veivakatavulici tara vata tu kei na kena iyaya ni iyaloyalo, nodra icili na daukaulotu, rumu ni kalasi, kei na valenivolavola.

Ena nona cabora na masu ni kena vakatabui na koronivuli vou, a vakaraitaka kina o Elder Nelson na nona vakavinavinakataka na Veisorovaki i Jisu Karisito kei ira na daukaulotu yalodina kei ira na lewe ni Lotu e vuravura raraba era lomana ka qarava na Turaga. A kerea kina me vakalougatataki na Vanua o Filipaini me ra “tomana tikoga na nodra yalo ni veiciqomi” vei ira na italai ni Turaga ka a masulaka talega o koya mera vakalougatataki na lewenivanua raraba ena “bula galala kei na tauri ilesilesi mera tubu cake ena valavala dodonu, vakayago ka vakayalo talega.”

Sa iKa 138 tiko ni Valetabu e Vuravura Raraba na Valetabu e Manaus Brazil ka kena iKa Ono e Brazil

Ena ika 10 ni June, 2012, —a vakatabuya kina o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada na Valetabu e Manaus Brazil— na kena ika 138 e vuravura raraba ka kena ika ono e Brazil

Na nodra vakabauta kei na gugumatua na Yalododonu Edaidai mai Brazil, ka ra tiko kina e sivia e dua na milioni na lewenilotu, era sa rawa ni vakatauvatani ki na Uciwai Levu na Amazon, ena nona a kaya o Peresitedi Uchtdorf— ni sa kui vakatitobu ka vakaukauwa tale tikoga.

Sa volekata oqo e 20 -na yabaki, na nodra dau gole tiko mai na lewenilotu mai Manaus, e dua na siti e tawasei koya tiko na uciwai lelevu kei na veikau loa, ki na valetabu e São Paulo, e Brazil— ka 15 na siga na kena dau lakovi wavoki ena waqa kei na basi—ni bera na valetabu e Caracas, mai Venezue— ka 8 na siga na kena dau vodo basitaki.

Ena gauna a dolavi kina ena 1990, a veiqaravi taumada vaka peresitedi ni Kaulotu e Brazil Manaus o Elder Claudio R. M. Costa ena Vitusagavulu.

“Au sa nuitaka tiko ni na osooso sara na Valetabu e Manaus, ena veisiga taucoko, baleta ni ra taleitaka na lewenilotu na valetabu,” a kaya o Elder Costa. “Era dau vakatavulici ira na luvedra mera taleitaka na valetabu. Sa dau ka cecere sara vei ira na valetabu.”

Era Marautaka na Lewe ni Lotu e Samoa na iKa 50 ni iVakananumi ni Tu Vakataki Koya, kei na iSevu ni iTeki

Ena Vakaraubuka, 1 ni June, 2012, era a duavata yani e 350 na Yalododonu Edaidai mai Samoa kei ira na lewenivanua e kea mera vakaitavi ena tayabe ni marautaki ni tu vakataki koya ena korolevu o Apia. Ena limasagavulu na yabaki sa oti, ena 1962, a rawata na matanitu oqo me tu vakataki koya mai vei Niu Siladi.

Era a vakaitavi kina na veimataisoqosoqo, koronivuli, na veimatalotu, kei ira na veimataisoqosoqo mai na veimatanitu eso. Era a veivakamarautaki na gonevuli ni Yalododonu Edaidai vei ira na tini vakaudolu na dausarasara mai vei ira na nodra mataivakatagi tayabe.

Ia ena mua ni macawa vata talega oya era a marau tale tikoga kina na Yalododonu Edaidai mai Samoa; na 50 talega ni yabaki ni kena a mai tauyavutaki na nodra isevu ni iteki ni matanitu, mai Apia.

Ena Siga Tabu, na ika 3 ni June, rau a vosa kina o Elder James J. Hamula kei Elder Kevin W. Pearson ena Vitusagavulu, ka rau lewe ni Mataveiliutaki ni iWasewase na Pasivika, vei ira na Yalododonu Edaidai kei ira na vulagi dokai ena dua na soqoni digitaki ka kaburaki raraba yani ki na veivalenilotu ni YDE ena vanua taucoko.

Ki na veisiga ni mataka, era sa lavaka tiko na Yalododonu Edaidai mai Samoa mera tomana tikoga na nodra qarava ka vakaqaqacotaka na nodra matavuvale, koro, kei na matanitu, a kaya vakaoqo o Elder Hamula, ka veiqaravi tiko vaka-Peresitedi ni iWasewase. “Sa totoka sara na noda tubu cake tiko vaka-Lotu ena vanua oqo, ka da sa tubu cake tiko ena noda bula vakamatavuvale vakakina vakaikeda yadudua ena noda saga tiko meda muria na ivakavuvuli kei na ivakaraitaki i Jisu Karisito,” a kaya o koya.

E volekata ni 144 na daukaulotu mai Filipaini, Cambodia, Hong Kong, Idia, Indonesia, Mongolia, Pakisitani, Sri Lanka, Taiwan, kei Thailand era sa tuberi tiko ena nodra vosa ni vanua ena Koronivuli vou ni Kaulotu e Filipaini.

iTaba mai vei Noel Maglaque