Sema na iTabagone ni Brazil ki na Tuva Kawa, kei na Cakacaka ni Valetabu

Mai vei Melissa Merrill

iTukutuku kei na Soqo ni Lotu

Sa wanonova matua tiko o José A. Moscão e dua na itosotoso: O ya ni a levu sara na “nodra gauna ni wawa,” o ira na itabagone era gole tiko ki na Valetabu e Campinas Brazil.

E kila vakavinaka o Baraca Moscão, na dairekita ni valenivolavola ni tuva kawa ka tiko tikiva na valetabu, ni vuku ga ni balavu ni vanua mera lakova mai na itabagone ki valetabu, e vuqa vei ira era lako mai kina ena karevani ka ra mai tu me vica vata na siga. E sega kina ni rawa me levei na maliwa ni gauna ena nodra gauna yadua ena tobu ni papitaiso kei na gauna ni kana mera waraki ira tiko na nodra itubutubu kei ira na iliuliu era vakaitavi tiko ena cakacakatabu vakalotu tale eso ena gauna o ya.

Ia e a nanuma o koya, ni na rawa beka, mena vakayagataki ira na itabagone oqo ena dua na itavi me kakua kina ni ra tu wavoki ga ena rara ni valetabu ena nodra gauna galala.

A qai vakayacora vakakina.

Me ra Sa Sureti

Sa tekivu sureti ira sara na itabagone ki na valenivolavola ka solia na nona gauna me vakavulici ira mera cakava na ituvatuva vakamatanivola ena FamilySearch.

Era a madua se lomatarotaro eso ni se qai tekivu. Ia a kaya o Baraca Moscão ni gauna a vosa kina vei ira baleta na nodra vakabulai na tamata mai na butobuto ka kauta mai na yacadra ki na rarama ni talairawarawa ki na nona vosa e dua na parofita bula, e a tarai sara ga na yalodra na itabagone (raica na David A. Bednar, “Ena Vagolei na Lomadra na Gone,” Liahona kei na Ensign, Nove. 2011, 24–27).

Sa ka bibi kina na nodrau mai toka vata ga ena dua na vanua na valetabu kei na valenivolavola ni tuva kawa; me vakamatatataki kina vakaituvaki vakayago ni cakacaka ni valetabu kei na tuva kawa e rau gacagaca ni dua ga na sasaga cecere. E kaya kina o George A. Oakes, na peresitedi ni Valetabu e Campinas Brazil, ni o ya e dua na ka era sa tekivu vulica tiko na itabagone era tiko ena tikina ni valetabu.

“Ni bera na kena vakamatatataki vei ira mera vakaitavi ena tuva kawa kei na ituvatuva vakamatanivola, a nodra inaki bibi ga ni gole ki valetabu mera laki papitaisotaki ena vukudra na mate. A kaya o koya, ia ena gauna oqo sa mai tiki tiko ni nodra cakacaka o ya na nodra kila na ituvatuva vakamatanivola.”

Na Veivakilaitaki

Ni ra gole mai na itabagone ki na valenivolavola, e ratou veivakilaitaki vakalekaleka ka vakarawarawa o Baraca Moscão kei rau na daukaulotu veiqaravi na ivakavuvuli oqo:

Ni ra sa tekivu veivakabulai tiko ena ulunivanua o Saioni (raica na Opetaia 1:21).
Era sa vakamuria tiko na nona ivakasala e dua na parofita (raica “Ena Vagolei na Lomadra na Gone”).
Era sa vakabulai ira tiko na tamata mai na butobuto—na butobuto ni iyaloyalo guilecavi makawa tu mai kei na veivola tauvi duka ni veivalenivolavola kei na valenilotu. Na tuva matanivola era vakararamataki mai kina na yaca ni tamata ka rawa mera vakasaqarai me ra kilai rawa mai vei ira na nodra dui matavuvale.
Ena nodra vakayacora na cakacaka oqo, era sa na vakaitavi sara tikoga ki na dua tale na “lagilagi [ni] ilutua ni veika kecega sa tukuni e na itukutuku vinaka, ko ya na veipapitaisotaki ena vukudra na mate” (V&V 128:17).
Era na vakayagataka tiko na nodra gauna ena cakacaka cecere ni nodra vakabulai na mate, ka ra na vakalougatataki kina na matavuvale.
Oi keda taucoko eda sa tiki ni matavuvale ni Kalou, ni gauna era tuva vakamatanivolataka kina na yacadra na tamata era sega tu ni kila, era se vukei ira tikoga na nodra matavuvale.
Ni gauna era sa tekivu kila vakavinaka kina na tuvatuva vakamatanivola, sa rawa me ra laki vakatavulici ira nodra matavuvale kei ira eso na itabagone ena nodra dui tabanalevu kei na tabana mera vakaitavi talega kina.

Sa vakayagataka kina o Baraca Moscão kei rau na daukaulotu na kompiuta ena valenivolavola me vakaraitaka vei ira na itabagone na sala ni kena tekivutaki na tuvatuva vakamatanivola kei na sala ni kena vakacurumi ka vakayagataki na gacagaca vakompiuta ni ra sa lesu ki vale. Ni gauna era sa kila vakavinaka kina, e kaya o Baraca Moscão, era “tekivu tuvatuva matanivola ena kena kaukauwa duadua era kila.”

Na Maqusataki ni Kena Cakacaka

Na iwiliwili sa ivakaraitaki tiko ni maqusa oqo. Ena imatai ni rua na vula ni 2012, era tuvatuva matanivolataka rawa na vulagi e 6,370 na yaca, e 3,305 mai na iwiliwili oqori era a tuva matanivolataka na itabagone yabaki 12 ki na 18. E laki yaco, me vakabalavutaka na valenivolavola ni tuva kawa e Campinas na nona auwa ni cakacaka taumada o ya mai na 8:00 ena mataka ki na 6:00 ena yakavi me yacova sara na bogi ena 10: 00 na kaloko me qarava rawa kina na levu ni kena taleitaki tiko na ituvatuva vakamatanivola.

Ia era sega ni biuta tu mai na itabagone na ituvatuva vakamatanivola ni ra biubiu mai na valetabu. Ni ra sa yaco ki vale, era laki tomana tale na nodra ilesilesi ka vakatoka tu o Baraca Moscão me “mataivalu ni 170,000 vakacaca ni dau tuvatuva vakamatanivola gugumatua ni Lotu ena gauna oqo.” E vuqa vei ira era sa vakayaco inaki tiko ni iTavi Vua na Kalou kei na Torocake Yadudua mai na nodra cakacaka ni tuvatuva vakamatanivola.

E Dua na Veivakayarayarataki ni Vinaka

Ena itekitekivu ni yabaki oqo, a gole vata yani kei tinana kei tacina ki valetabu o Isabela A., yabaki 16, mai Vila Velha, e Espírito Santo, mai Brazil, na iotioti ni siga ni igolegole oqo sa na vakananumi tiko kina na yabaki dua ni mate nei buna. A papitaisotaki o Isabela ena vukui buna oqo, ka laki vakayacora o tinana na veicakacakatabu vakalotu tale eso baleti buna.

A vakamacalataka vakaoqo o Isabela, “Au a vakila ena ilakolako oqo, ni dodonu me’u vakayacora e dua na ka vinaka. Au a gadreva sara me’u vulica na ituvatuva vakamatanivola, ka a vukei au kina o Baraca José Moscão.

“Ni gauna, au sa papitaisotaki kina ena vukui buqu, a tara sara vakatitobu na yaloqu na Yalotabu. Au kila kina ni vuqa sara na tamata era sa wawa tu mai vakabalavu ena daku ni ilati, era a gadreva tiko na noqu veivuke. Au kila kina ni sa rawa me‘u solia eso na noqu gauna me’u veiqaravi ka na vuqa sara na ka au rawa ni cakava ena vukudra o ira oqo. Na qaravi ni ituvatuva vakamatanivola e cakacaka ni loloma.”

Ena veigauna ni ilakolako ki valetabu, era laki vakaitavi na itabagone era tiko ena tikina ni Valetabu e Campinas Brazil ena ituvatuva vakamatanivola ni FamilySearch ena veigauna galala ni bera se ni sa oti na papitaiso.

iTaba mai vei José A. Moscão