Noqu Vanua

Dorota Musiał, Poladi

Ni bera niu lewena na Lotu, au dau sotava tu ga na rarawa. Ni oti na nodrau sere o noqu itubutubu niu se qai yabaki vitu, a bala ki valeniveivesu o tamaqu. E a dau gunu o tinaqu ka vakayalia taucoko na veika e bibi vua. Au sa mani vakau meu laki tiko vata kei na dua na matavuvale veisusu.

Ena vuku ni veika oqo, a totolo sara na noqu tubu cake mai vei ira e vuqa na noqu icaba. Au a sega sara ni vakadeitaki au rawa ki na noqu bula dina, ka sa yaco kina meu dau vakacaca voli. Niu se gone sara, au sa tekivu vakatavako ka vakayacora na veika tale eso kau sa kila vakavinaka tu oqo ni ra veisaqasaqa kei na Vosa ni Vuku. Au sa kila sara tu ga ni sa na vakaleqai na noqu bula.

E dua ga na ka au sa laki kune marau tu kina o ya meu vukei ira na tamata—ena sasamaki vata kei ira se vakarogoca na italanoa ni nodra bula. Au sa gadreva dina sara mera kila ni sa rawa mera vakararavi vei au. Ena dua na yabaki au a gade vakayawa ka sotava kina e dua na marama sa buinigone sara kau gadreva meu qaravi koya ena noqu vakarorogo vua. E lotu Vakarisito o koya ka tekivu talanoataka mai na veika ni lotu.

Au a sega sara ni vakabauta tu na Kalou. E so na gauna, au dau vakasamataka de bula dina tiko o Koya, kau beitaki Koya ki na veika veivakaleqai au a sotava. Ia ni qai vakamacalataka na marama oqo na bibi ni vakabauta na Kalou, au vakila niu vakayadrati sara ga kina. Ni bera niu biubiu, a kaya o koya e dua na ka e taleitaki sara: O ira na Momani era muria na ivakaro ni Kalou.”

Au se bera mada vakadua ni rogoci ira na Momani, au sa mani gole ki vale, dolava na noqu kompiuta, ka vakasaqaqara. Au sa yacova sara na Mormon.org ka otataka e dua na ilavelave ni iVola i Momani sega ni saumi. Ni oti e vica na siga rau sa kauta yani o irau na daukaulotu.

Au sega sara ni vakadeitaki meu sa tekivu vakabauta na Kalou, ia rau a vukei au na daukaulotu meu raica rawa ni sa rawa meu sega walega ni vakabauti Koya ia meu kilai Koya. Niu sa tekivu masu ka vulica na iVola i Momani, au raica niu sa mai lakova e dua na ilakolako totoka ni kune marau. Au sa biuta na vakatavako. Au sa sega tale ni beitaka na Kalou ka tekivu vakavinavinaka Vua ena vuku ni veika vinaka ena noqu bula. Au sa mai kila ni a vakararawataki na Luvena ena vuku ni noqu ivalavala ca kei na rarawa kece au a sotava. Ena ika 28 ni Okotova, 2007, au a papitaiso kina ena Lotu.

Kevaka beka meu a sega ni sotava na noqu veisau mai na veilecayaki ki na bula marau, au na sega beka ni vakabauta ni na rawa vakakina. Au sa marautaka tu nikua na noqu veikacivi ena Lalai kau sa vakavinavinaka vakalevu ki na madigi meu veivuke ki na kena tuvanaki e dua na veiqaravi ni veivakatorocaketaki ena dua na koniferedi ni itabagone qase cake e Poladi. Niu mai rawata tu oqo meu vukei ira na tamata ena veiqaravi ni Lotu sa mai ikuri ki na noqu bula marau au sa mai kunea ena kosipeli i Jisu Karisito. Na veika kece au vakayacora ena gauna oqo, au vakayacora ena loloma dina ena vuku i Jisu Karisito. Au vakabauta ni bula e ka totoka kei na gauna talega eda sotava kina na bolebole, ni kevaka meda muria tiko na iVakabula, eda na sega ni lakosese.

E dina sara na marama au a sotava: sa ka bibi sara na vakabauta na Kalou. Eda na sega ni kunea na noda bula dina ena vuravura oqo kevaka eda sega ni kilai Koya. Au sa mai vakavinavinaka kina vakalevu niu sa mai tu oqo ena noqu vanua dina.

A kaya o koya e dua na ka e taleitaki sara: O ira na Momani era muria na ivakaro ni Kalou.”