Vaqaqacotaki ena Vosa
iTaba mai vei Josué A. ka Gloria Hiatt
Era vakadinadinataka na itabagone yabaki tinivakacaca na veigauna eso e vakavulici ira kina, vakacegui ira, ka tuberi ira na ivolanikalou.
Keimami a kerei ira na itabagone me ra tukuna mada e dua na gauna a veivuke kina vei ira e dua na ivolanikalou era dau wiligusutaka tu, me vaka a tukuna o Elder Richard G. Scott ena Kuoramu ni iApositolo Le Tinikarua ena koniferedi raraba ni Okotova 2011 (raica na itukutuku e tutuna). Oqo e vica na ka era a tukuna mai.
Vakacegu Kina na Yaloqu
“Ia na luvequ, me vakacegu na yalomu; raica sa lekaleka wale ga na gauna ni nomu rarawa kei na vutugu” (V&V 121:7).
Na ivolanikalou sa dau vakacegui au vakalevu sara ena loma ni veiyabaki oya na Vunau kei na Veiyalayalati 121:7, ni tiko voli na Parofita o Josefa Simici ena Valeniveivesu mai Liberty ka tagica tiko na veivuke vei Tamada Vakalomalagi. Au dau wiligusutaka na tikina oqo ena semineri kau dau nanuma lesu ena gauna au gadreva kina meu vakacegui. E vakananuma tale vei au ni lomani au na Tamaqu mai Lomalagi ka kila tiko na veivakatovolei au sotava tu. Au dau vakayagataka na tikina oqo me solia vei au na vakacegu ena gauna ni lomaocaoca kei na malumalumu.
A vukei au na tikina oqo ena gauna au a tiko kina ena dua na soqo ni marau ka qai vuki me dua na draki ni bula au kila ni sega ni dodonu meu tiko kina. Au tukuna vakamalua vei ira na noqu itokani na sega ena gauna era kerei au kina meu gunu se vakatavako. A solia vei au na tikina oqo na kaukauwa au gadreva meu tutaka kina na noqu vakabauta.
A vukei au talega na tikina oqo meu vakatauca e dua na lewa dredre. E lima na veiyabaki na neirau sega ni rawa ni veitawasei kei na noqu itokani. Keirau dau qito vata, gade vata, ka dau veitomani voli ena veimuanimacawa. Ia sa tekivu me dau veitokani vata kei na dua na ilawalawa era qase cake kau sega ni taleitaka meu muri ira. Qai kena itinitini meu digitaka meu na veitokani vata kei koya se meu sa na muria ga na veika au vakabauta ena vuku ni Vosa ni Vuku kei na lawa ni tiko savasava. Au a rarawataka sara. Au a sega vakadua ni kila ni na rawa ni dredre sara vaqo na noda tutaka na noda vakabauta. Ia au mani digitaka me so na noqu itokani vou, kau dau nanuma tikoga na nona yalayala na Tamada Vakalomalagi vei Josefa Simici ni na donu mai na ka kecega.
E sega ni dua na ka e ganita me vakawaleni kina na noqu vakabauta, kau dau vakila na reki dina ka tudei niu digia na dodonu. Na ivolanikalou oqo sa vaqaqacotaka na noqu ivakadinadina ka veivuke ena gauna au gadreva kina.
Lauren J. yabaki 16, Arkansas, Amerika
Sa Yaco me Qaqa na Veika Malumalumu
Ni vo e vica na vula me caka na veitarogi ki na vuli torocake, au vakila niu sega tu ni vakarau. Au kila ni na sega ni rawa ni vinaka na ka au rawata. Au mani goleva kina na Tamaqu Vakalomalagi ena masu. Niu masu tiko, qai votu mai noqu vakasama na veimalanivosa oqo: “Au sa vota vei ira na tamata na malumalumu vakayago. Au sa vota vei ira na tamata na malumalumu vakayago me ra yalomalaumalumu kina; ia na noqu loloma sa rauti ira kecega sa vakamalumalumutaki ira vei au; ia kevaka era sa vakamalumalumutaki ira ka vakabauti au, au na vakaukauwataki ira ena veika era sa malumalumu kina” (Ica 12:27).
Au qai kila ni gauna au masuta kina na Tamada Vakalomalagi me baleta na igu meu sotava kina na veika dredre kei na veivakatovolei, sa dau vakalougatataki au ko Koya ka vukei au meu lako sivita na noqu malumalumu. Na vakatulewa vinaka duadua au rawa ni vakayacora sai koya meu vakaraitaka vua na Turaga na noqu lomaleqa. O Koya na qasenivuli vinaka duadua, kau kila ni a vukei au.
Irvin O. yabaki 16, El Salvador
Masu Tikoga
“Mo gumatua ena masu mo rāwa na ka kecega; ia, io me kakua ni rawai iko ko Setani kei ira na nona talai ka ra na segata me ra tarova na cakacaka oqo” (V&V 10:5).
Na tikina oqo e vukei au meu sotava na veivakatovolei. Ni vakarau meu cakava e dua na ka au kila ni cala, sa dau votu mai noqu vakasama na tikina oqo kei na kena ibalebale. Ena veigauna yadua au masu kina ni oti na veivakauqeti oqori, sa dau soli mai na veivuke meu gadreva meu vorata kina na veitemaki au dau sotava.
Jesse F. yabaki 17, Utah, Amerika
Au sa Tiko Vata Kei Kemuni
“Mo dau vosota sara, raica ena yaco vei iko e vuqa na ka ni veivakararawataki; ia mo vosota ga, raica au na tiko ga kei iko ena gauna taucoko ni nomu bula” (V&V 24:8).
Na noqu wiligusutaka na ivolanikalou oqo sa ka ni veivakalougatataki, vakabibi ena gauna au dau rere kina se galili. Ena gauna ga au nanuma kina, sa dau yaco mai na yaloqaqa kau lomavinaka. Me vaka ni keimami cauravou ka goneyalewa, keimami gadreva na veituberi kei na veitokoni, vakauasivi ena gauna keimami sotava kina na veivakatovolei dredre kei na bolebole. E dina ni so na gauna e vaka me dau veilecayaki ka veivakayalolailaitaki na vunilagi, au kila ni rawa niu vakabauta na Turaga ka vakila wavokiti au na Ligana dau veivakatakatai.
Niu se gonelailai, au a vakavulici mai vale kei na Lalai ni na dau tiko ga e yasaqu na Turaga kevaka au cakava na noqu itavi. Ena vuku ni ivakavuvuli oqori kei na ivolanikalou oqo, au kila ni rawa niu dau nuitaki Koya tikoga.
Sofia I. yabaki 15, Uruguay
iTaba mai vei Welden C. Andersen ka Christian Ibanez