Au a Masu Meu Vakayaloqaqataki

Fy Tianarivelo, Madagascar

E rau lewe ni Lotu o noqu itubutubu, ia e rau sega sara ni dau lotu vakawasoma. E laki vakavuna oqo me dau yaco na veicacati baleta ni rau vakabauta me dau vakaliuci tiko na matavuvale mai na veika kecega—ni bera mada na gole ki lotu, vakarabailevutaki na veikacivi ena Lotu, kei na vakayacori ni itaviqaravi tale eso.

Ena vuku ga niu dua na iliuliu ena Lalai ka lewe ni matasere ni tabanalevu, eso na gauna e dau vakataotaka na noqu itavi ena matavuvale na soqoni ni Lotu. Ena dua na siga niu vakarau gole tiko yani ki na kakaburaki ni koniferedi raraba ena neimami valenilotu mai Antananarivo, rau sa tukuna sara mai o noqu itubutubu ni ra tiko eso na vulagi e neitou vale.

“Mo na digitaka na nomu matavuvale se na Lotu,” a kaya mai o tinaqu. “Mo tiko vata kei keitou ka calata na koniferedi, se mo gole ki na koniferedi ka sotava na kena itotogi.”

Au sa mani lewa ga meu kakua ni veiba kei tinaqu. Ia, au a taura e dua na gauna meu kerea vei Tamaqu Vakalomalagi me vakayaloqaqataki ka vaqaqacotaki au. Au a kerea talega Vua me vukei au meu kila na ka meu cakava. Meu na tiko vata kei noqu matavuvale se meu gole ki lotu ka rogoca na domodra na parofita?

Ni qai oti ga na noqu masu, au sa vakila na Yalo Tabu. Au sa vakila vei au na veivakayaloqaqataki ni YaloTabu meu tukuna vei tinaqu na kena bibi vei au meu gole ka laki vakarorogo vei ira na parofita. Au vakila ni sa dodonu meu tukuna vua niu na ciqoma na veivakavukui sega walega ki na noqu bula ena gauna oqo ia sa baleta talega na noqu veisiga ni mataka.

Sa rawa vua na Kalou me vakayacora na veika mana, ka a vakamalumalumutaka na yalodrau na noqu itubutubu ka rau a soli au meu gole ki na koniferedi raraba kau a sega ni totogitaki kina. Oqo e dua na ka veivakurabuitaki ki na noqu bula. Sa vakadeitaka vei au na dina ni ivolanikalou e kaya, “Ia na kaukauwa ni Yalo Tabu ena vakatakila vei [keda] na dina ni ka kecega” (Moronai 10:5).

Au kila ni kevaka meda na vakayavutaka na noda cakacaka ena ivakavuvuli ni kosipeli ka vakarorogo ki na Yalotabu, eda na rawa ni dau marautaka na noda digidigi. Na veika oqo a vaqaqacotaka na noqu ivakadinadina ni sa tiko kei keda na Kalou ka sa dau veivuke na Yalo Tabu ki na noda bula.

Ni qai oti ga na noqu masu, au sa vakila ni sa vakayaloqaqataki au na Yalo Tabu meu tukuna vei tinaqu na kena bibi vei au meu gole ka laki vakarorogo vei ira na parofita.