iSulusulu kei na iRairai

Ena noda vuravura nikua ka sa sega soti ni rokovi kina na bibi ni yagoda, eda kilai tani na Yalododonu Edaidai ena isulusulu ka vakaraitaka noda rokova na yagoda (raica na Me iSakisaki ni iTabagone [ivolalobi, 2011], 6–8). Ena tabana e 52 ni ilavelave oqo, Mary N. Cook, na imatai ni daunivakasala ena mataveiliutaki raraba ni goneyalewa, e vakamacalataka kina na itagede:

“Ni sa tara e dua na valetabu, ena vakadeitaki me na taqomaki ka ukutaki sara vakamatau e loma vakakina e tuba. E dua na ivakadei ni kena navuci e dua na valetabu sa ikoya na kena kilai ni valetabu e ivakaraitaki ni Turaga-ni sa Nona vale. Eda rokova na valetabu me vaka e dua na vale vakatabui, ka ni ra na curu ga kina o ira era sa bula dodonu tu. Eda vakarokorokotaka na valetabu baleta na cakacakatabu vakalotu kei na veiyalayalati eda na vakaitavi kina, ena vakavuna na noda rawa ni lesu rawa tale vua na Tamada Vakalomalagi.

“Ena bibi sara vakalevu na yagomu mai na valetabu ka na caka sara vakamatau na kena tara e vuravura. O kemuni o ni luvena na Kalou! Na ivakavuvuli kece oqo—e matataka, doka, ka vakarokorokotaka—na kena maroroi ka taqomaki na yagomu.”

Na vakatutu oqo ena vukei iko mo vakavulica vei ira na luvemu na ivakavuvuli dina ni isulusulu kei na irairai. Nanuma talega ni nomu ivakaraitaki ena isulusulu ena vakavulici ira na luvemu ena bibi ni isulusulu era daramaka.

Vakatutu ni Nodra Tuberi na iTabagone

Wilika vata kei ira na luvemu itabagone na iwase ni isulusulu kei na irairai mai na Me iSakisaki ni iTabagone. Ni ko vakayacora oqo ena solia vei iko e dua na gauna mo veitalanoataka kina kei luvemu tagane kei yalewa na ivunau, veivakalougatataki, kei na sala ni qaqarauni me baleti na itagede oqo ka sauma e so tale na taro ena tiko vei ira ka ra na via taroga.
Vakasamataka mo vakayagataka ena dua na lotu ni matavuvale na bibi ni isulusulu kei na irairai. Ena rawa ni ko tarogi ira na nomu matavuvale, Kevaka me na tiko mai valenilotu na Turaga ko na vakaisulu tu beka vakacava? Ko na vakaraitaki iko beka vakacava Vua? Ko na vakaevei beka ni sa rakorako tu na nomu isulusulu? Ena rawa talega ni ko na veitalanoataka na isulusulu ena ganita na gauna ni vuli, cakacaka, kei na soqo ni marau.

Vakatutu baleta Nodra Tuberi na Gonelalai

Na noda isulusulu ena matataka na veika e bibi vei keda. Me vakaraitaka na ivakavuvuli oqo, vakasamataka ni ko cakava e dua na lotu ni matavuvale ka ra vakaisulu vakataki ira na daukaulotu se vaka ni ra lako kece i lotu ena Siga Tabu.
Ni ra se yabaki lalai na gone e dodonu mera sa tekivu vakaisulu rakorako. Railesuva kei ira na luvemu na idusidusi e tiko ena tabana e 7 ni Me iSakisaki ni iTabagone ka qai vakarautaka na isulu ena ganita nai dusidusi o ya.

Yaloyalo ivakaraitaki mai vei Scott Greer