E Auauai Mai Pea Mea Lelei

Saunia e Caitlin A. Rush

I le avea ai ma se tasi ua manatu vave tele ona suia le taimi nei i se taimi ua tuanai, na ou faafetai ai mo le faamanatu mai e tau lava o le olioli i le taimi nei ma vaai atu i le lumanai.

O se Aso Faraile e pei foi o isi aso. Na matou nofonofo ma au uo mamae i lou fale mautotogi ina ua uma se tifaga, na talanoa filemu mai lea taimi i lea taimi ona toe leotetele lea. Na faatumuina le ea i se lagona o le fiafia moni, ma na le mafai ona taofia lou ata ao fepasiai tala ma manatu i le potu. O nisi o tagata faatoa ou feiloai i ai i se masina talu ai; o isi na ou iloaina i lou 25 tausaga atoa lava.

I se tasi taimi na ma faasoaina ma se tasi o uo ua leva ni manatuaga i nisi o a ma uo i le kolisi mai ni nai tausaga talu ai. Ao ma talanoa, na ou mafaufau i lou misia tele o nei uo, i le tele o le fiafia na matou maua, ma lo matou vavalalata tele na i ai. O lenei ua matou faauu ma malaga atu i nofoaga eseese i le salafa o le lalolagi, ma ua i ai nei i matou i ni tulaga matou te lei mafaufauina lava muamua. Na ou mapuea i le lagonaina faafuasei o le misia o na taimi, ona ou autilo lea faataamilo i le potu i foliga fiafia o loo siomia ai au i lena taimi ma na faateia i se manatu faafuasei faapea: e auauai mai pea mea lelei.

O lena manatu faatauvaa na matua taua tele mo au, ae maise lava na masani ona faigata tele ia te au le feagai ma suiga ma o loo faigata pea ona tuuese atu mea lelei. Ou te misia le taimi tuanai ao lenei o loo i ai pea i le taimi nei, o loo popole i le olioli atoatoa i taimi o loo ou ola ai ma le mautinoa ma le atoatoa. Ou te iloa afai o ia te au se mea lelei, ma ou te manao e uu mau ma aua nei mamulu; o lenei po ‘ivā ma le fiafia o le Aso Faraile o se tasi o na taimi. E masani lava pe afai ou te iloaina ua matua lelei mea uma, ou te manatu vave lava i le vave mou atu o mea uma, ma o le a oo lava ina leiloa atu ona o le taimi po o le tulaga e oo mai.

Ao le po lena, e lei oo mai se manatu ua maimau. I le nofonofo filemu ai, ua siomia e tagata ou te alofa i ai, na ou iloa ai e ui lava ina o nisi mea lelei e tatau lava ona oo i se iuga ma o le a le taumateina lava le tele o mea faigata i le lumanai, o le a auauai mai pea mea lelei. Ma o le a oo mai lava—pe afai o le a ou faatagaina. E ui lava o le a malaga ese atu i latou ou te alofa i ai, ae o le a faatumuina le avanoa e tagata fou ma ofoofogia ma aafiaga ou te lei mafaufauina muamua.

E faigata i nisi taimi ona agai i luma, ae peitai e tatau lava. Ma o le agai i luma e le faapea o le faagaloina o faigauo, e faamalosia ai manatuaga e mou atu. O lona uiga o le tatalaina o o tatou loto i nisi olioli e sili atu ma nisi aafiaga.

I nai vaiaso ina ua maea lena Aso Faraile, na faamaloloina ai le au peresitene o la matou autalavou laiti o le paranesi. E pei ona mafai e soo se tasi mai se tamai paranesi ona faamaonia, e faigata ona mafaufau i le mea o le a tupu e aunoa ma le faalagolago atu o le matou paranesi i nei alii ma o latou faletua, ua matou alolofa ma talitonuina. Ae na moeiini ou mata ma toe fai ifo ia te au lava ia upu na faateia ai au i lena Aso Faraile: e auauai mai pea mea lelei. Na faamafanafanaina au ma saunia mo le suiga.

O suiga, o le ala a le Alii. E finagalo o Ia ia tatou fiafia ma tuputupu ae, ia fiafia e agai i luma i o tatou olaga. O le olaga o se malaga, ma ao tatou fiafia i le taimi nei ma saunia mo luitau e le maalofia, e tatau ona tatou agai i luma, tumau i le fiafia, tatala atu o tatou loto i aafiaga ma mea lelei e le masalomia o loo agai mai.

Ata na tusia e Matthew Reier