Arou n Tiku ni Matoatoa n te Euangkerio

Iroun Tua Rogers

I bwabetitoaki ngke 12 au ririki, ao inanon ririki aika a mwaiti ao bon tii ngai te membwa n te Ekaretia n au utu. Anne e aki beebete n taainako, ma I tekeraoi ni kakabwaiaaki ma au tia kairiiri aika a raraoi ake a buokai inanon mwanangau n reiakina te reirei n te euangkerio ao ni kabonganai reirei akanne ni kakorakora ao ni karikirakea maiu. Ibukin au rinerine n tiku ni koaua nakon are I kakoaua, I a tia n noori kakabwaia aika korakora n roko inanon maiu ao imwiina riki, inanon maiuia kaain au utu naba.

Aikai tabeua bwaai aika a buokai n tiku ni matoatoa:

Kaaniko nakon te Tamara are i Karawa rinanon waaki ni kakukurei n aron te tataro ao te kamatebwai n koroboki aika a tabu. E atai bwaai ake ti kaitarai. Kaaniau Nakoina e buokai ni kauringai bwa antai ngai.
Irii aia reirei taan kairiiri n te Ekaretia. I a tia n nooria oin ni maiu koauan te reirei mairouia burabeti ao taian abotoro.
Ataia bwa maiuakinan te euangkerio e karekea te maiu ae tamaroa riki ngkai ao n aki toki. Aio e a tia ni buokai ni kateimatoa au kainibaire ao te onimaki. Taan kairiiri a kaungaai n ira te tembora, are e buokai ni katamneia te maiu are akea tokina.
Otabwaniniiko ma raoraom aika a raraoi ake a tibwauaa am kainibaire ma ngaiia. I kakabwaiaaki ma raao aika a tamaroa ake a kabebetea karaoan rinerine aika a raraoi ao ni kawakina au onimaki.
Kaaniko ma am utu. I tangira au utu ao n tangiria ni katea te reitaki ae korakora ma ngaiia.
Maiuakina ae raoiroi. Ira ana kainibaire ao ana burokuraem te Ekaretia. A na buokiko ni kaota te onimaki ao ni karaoi rinerine aika a raoiroi. Rinerine aika a raraoi a kabeetea te maiu n taai tabetai, ao ni karika te maiu ae kakukurei n tainako.