Maiu n Ebiebi e Katauraoira ibukin Taai aika a na Roko

Aomata aika a Itiaki ni Boong Aika Kaitira a kakoaua te katauraoi ao te maiu n toronibwai. Ti kakoaua te katauraoi n te reirei ibukin te kareke mwakuri, te katauraoi ibukin bong ni kakarau, ao ni katauraoiko nakon taian angibuaka ke taian kataaki. Ma ae kakawaki riki, ti kakoaua te katauraoi n te maiu n tamnei ibukin Kauaokin Iesu Kristo ao ni maeka ma Tamara are I Karawa. E kaniira aei nakon te katauraoi are aranaki bwa te maiu n ebiebi.

Aron te maiu n ebiebi e karekerekea aron maiura n te maiu are akea tokina: Ti na riai “ni mwakuri [ibukira] ao n aki kamwakuraki ibukina” (2 Nibwaai 2:26). E tangira te Uea bwa ti na katabeaki ao man kainaomataki (taara D&C 78:14). E tangirira bwa ti na maiuakin rerei ibukina bwa ngaia are e na kona ni katauraoiko nakon wakin: katabeam, te akoi, ikawai raoi, te tangira. Bwa man ikawaira raoi, ngaia are ti kona ni buokia ara utu ao tabemwaang. Ti na kanga ni kamwarakeia aika a baki ngkana ngaira ti bon baki moa? Ti na kanga n tibwa te atatai ngkana ngaira e memere ara atatai? Ti na kanga ni karikirakea aia onimaki tabemwaang ngkana ngaira e memere ara onimaki?

Reirei ibukin te maiu n ebiebi n ikotaki ma aikai:

Katauraoi. “Katauraoiko ngkoe bwa e a kan roko, e a kan ana bong te Uea” (taraa D&C 1:12).
Tabo ni Karaobwai “Ko na aki taningaroti” (taraa D&C 42:42).
Ukoukora te rabakau, n te kamwatebwai ao n te onimaki naba (taraa D&C 88:118).

Ngkana membwa n te Ekaretia a karaoa are a kona ni karaoia ni katauraoia ibukia ma a bon aki kona ni karekea are a kainnanoia, a riai n tanrikaki moa nakoia aia utu ibukin te ibuobuoki. Ngkana e aki tau, te Ekaretia e kona ni ibuobuoki. Bitiobi ao Beretitenti n te mwaanga a kona ni kamaneena te buoka man “Ana auti ni kaikobwai te Uea” ni buokia membwa (taara D&C 82:18–19). Buoka man te Ekaretia e katauraoaki ni buokia membwa bwa a na buokia irouia ao ni kaungaia bwa a na mwakuri ni maiuia.

Ti kona ni mwakuri bwa ti na maiu n toronibwai iaon bwaaii aikai:

Kakorakoran te maiu n Tamnei: Onimakina te Uea; ongotaeka nakon ana tua; tataro ao kamatebwai booki aika tabu ni katoa bong; beeku ibukiia tabemwaang.
Te Marurung n Rabwata: Ongotaeka nakon Tuan te Mauri; Kamarurung; karekea te motirawa ae tau; karaoa tuan te itiaki ao tuan te aitiin.
Te Reirei: Riki bwa te tia wareware; karekei rabakau ni mwakuri; kamatebwaian “booki aika a tamaroa” (D&C 88:118).
Te Mwakuri: Mwakuri ni katauraoa kainnanom ao kainnanoia am utu.
Am kaikobwai ni mweengam: Kawakina te ran ae itiaki ao karaoi amwarake aika kangkang n taainako ni katoa boong ao amwarake ake a kawakinaki n aron taian kurein ao biin.
Te mwane: Kabwaka am kabuanibwai ao taian angabwai; totokoa te tarau ae aki riai; karaoa am kaikomwaane.