Kunnikai ibukin te Taenti
Kamataata iroun Scott Greer
I kaririiaki n iriia nako te ibetutu n aomata, ma imwiina I ataia bwa I riai n riki bwa te katotoo n oneanimwiin anne.
Ngke ai tebwi tabun au ririki, n tabetai e boni matoatoa aron maiuakinan te euangkerio. Te aono are I maeka iai akea kaain te Ekaretia, ao raoraou ake bon tiaki membwa n te Ekaretia n tabetai a anganai te kangaanga ni karaon te bwai ae eti.
“Ko riai ni karina aei; e bootau ma karan matam,” e taku nakoiu temanna raoraou imwaain te taenti. E tabeka te kunnikai are e na anganai bwa N na tangoia, ma akea angan baia. I baireia bwa N na kabonganaa te tiaekete.
Ngke I a roko n te taenti, akea temanna ae kunnikainna n ae iai baina, ao e taraan ae kanga I a tebenako mai buakon te koraki. Ngkae I a monna ni buue , a tuangai raoraou bwa N na riai ni buuta te tiaekete mai iaou ao bwa I aonga n taraa raoi riki.
Ngke N nang moanna ni kakaea au anga ni buutakin te tiaekete, I a uringa au kakabwaia mairoun te tamanuea. I tuangaki inanon au kakabwaia bwa a na mwaiti kaririiau ao ngkana I bwaka, a na mwaiti aomata ae a na irai. Anne ngke I a ataia bwa I riai ni karaoa te bwai ae eti—tiaki tii ibukiu ma ibukiia tabeman ake a katan iaau. I baireia bwa e bon aoria n rin iaou te tiaekete.
N tabetai I bwainingareaki ni karaoan bwaai are a karaoia aomata, ma I teimatoa ni korakora ao ni kakabwaiaki tii bukin anne. I reireinaki imwiina bwa a mwaiti aomata ake a katan iaau. Tabeman raoraou a tuangai naba bwa a karineai ibukin irakin au kainibaire. A kabwarai aia bure ibukin anganakiu te kangaanga n aki karaoan bwaai ake a bane ni karaoi aomata n te reirei ae rietata.
Ibukina bwa I irii ana kainibaire te Ekaretia ao ni kataia n riki bwa te katotoo, I a kona ni karekea te taneiai are a rinanona mitinare ao n reireia te euangkerio nakoia tabeman. N na bon aki kona n anai nanoia temwaangina ngke arona bwa I aki karaoa te bwai ae e ti.