Ike N na Tiku iai
Dorota Musiał, Poland
Imwaain are I kaaina te Ekaretia, maiu e onrake n te aki kukurei. Imwiin raureia au karo ngke ai itiua au ririki, tamau e a kabureaki. Tinau bon te tia manging ao e kabuai bwaai ni kabane ake a kakawaki nakoina. I a kanakoaki ni maeka ma te utu ae e na tararuaai.
Ibukin bwaai aikai, I a ikawai rake n te aro ae birimwaaka riki nakoia mwaitiia au karinan. I aki kona n namakinna raoi bwa N na kona ni kunea au tabo, ao ibukin aio ao n taainako I aki toki ni kakaaitara. Ngke I bon rangi ni uarereke, I a moana mokou ao ni karaoi bwaai tabeua ake I atai ngkai a kaitarai Tuan te Mauri. I bon koaua bwa ai bon tekeu bwa N na kabwaka n te maiu aei.
Teuana te bwai are I a kunea te kukurei inanona bon buokaia aomata—tao te kaitiaki ma ngaia ke n ongora nakon karakinan maiuia. I rangi n tangiriia aomata bwa a na ataia bwa a na kona n onimakinai. Teuana te ririki ao I nako ni motirawa ao ni kaitibo ma te aine ae e a bon kara ao I baireia bwa N na karaoa au mwakuri n ibuobuoki man ongorau nakoina. Bon te Kiritian ao e moanna n taetae nakoiu ibukin te aro.
I tuai ni kakoaua raoi te Atua. N taai tabetai, ngke I a tia n iangoia bwa tao iai Ngaia, I bukinna ibukin bwaai ake a tia n riki nakoiu. Ma ngke te aine aio e kabwarabwaraa kakaawakin te onimaki iroun te Atua, I a kuneai bwa I a kan ongora. I mwaain ae I nako, e taekina te bwai teuana ae bon katekea nanou: “Moomon a iira ana tua te Atua.”
I tuai man ongo taekaia Moomon, ai ngaia are I a nakon mweengau, toka iaonrain, ao ni kakaae. I roko n Mormon.org ao n otana te kaobi ae akea boona n ana Boki Moomon. Mitinare a nikiria tabeua te bong imwiina.
I aki rangi ni koaua bwa I kona ni moanna kakoauaan te Atua, ma mitinare a buokai ni kunea bwa I kona n aki tii kakoaua i Rouna ma riki n ataia Ngaia naba. Ngke I moanna n tataro ao ni kamatebwaia ana Boki Moomon, I a kuneai n toua te mananga ae tikiraoi ni kakaean te kukurei. I katoka te moko. I katoka bukinakin te Atua ao ni moanna ni karabwa ibukin bwaai aika tamaroa inanon maiu. I a ataia bwa Natina e a tia ni korakai ibukin au bure ao ibukin te maraki ni kabane are I a tia n namakinna. N Okitobwa 28, 2007, I a bwabetitoaki nakon Ana Ekaretia.
Ngke I tuai n namakinna ibon irou te bitaki man te aki koaua nakon te kukurei, N na bon aki kakoaua bwa e na riki. N te bong aio I tangira nakoau n te Moanrinan ao ni kakaitau ibukin te tai ae angaraoi ni buoka katauraoan te mwakuri n ibuobuoki ae baireaki karaoana n aia maungatabu kairake aika tuai n iein i Poland. Ni kona n tabetai ni buokiia tabeman rinanon ana mwakuri n ibuobuoki te Ekaretia e a tia n ikotia nakon te kukurei are I a tia ni kunea n ana euangkerio Iesu Kristo. Ni kabane bwaai ake I karaoi ngkai, I karaoi ma te tangira ae itiaki ibukin Iesu Kristo. I kakoaua bwa te maiu e bon tikiraoi ao bwa ngkana iai kakaewenakoara, ngkana ti iira te Tia Kamaiu, ti na aki bua.
Te aine are I kaitibo ma ngaia e bon eti: reken te onimaki iroun te Atua e kakawaki. Ti aki kona ni kunea ara tabo n te aonaaba aei ngkana ti aki Ataia. I kakaitau ni kunea te tabo are I ataia bwa N na tiku iai.