Te Moan Titeiki ni Kateaki I Inria
Iai atakin te namakin ma te ingainga ao te karabwarabwa ngkai e raka iaon 1,500 membwa ao ma raoraoia ake a bootaki n te Novotel Convention Tienta i Hyderabad, Inria, ibukin katean te Hyderabad Inria Titeiki, te moan n titeiki n te aba, ni Meei 27, 2012. Unimwaane Dallin H. Oaks man aia Koroom Abotoro ake Tengaun ma Uoman ngaia are e tararua ao e raonaki iroun Unimwaane Donald L. Hallstrom man te Moan Beretitentii n te Itingaun ao Unimwaane Anthony D. Perkins man te Itingaun, are e beku bwa te Beretitenti ibukin te aono n Atia. Buuia taan kairiri aikai a iri naba n te maungatabu aei.
John Gutty e kamatoaki bwa te beretitenti n te titeiki ma Suresh Natarajan bwa ana moan kauntira ao Rajaratnam Bushi bwa te kauoman ni kauntira. Ana moan tamaniuea Inria bon te beretitenti ngkoa n te aono, Prasad Rao Gudey.
N taetae nakon te kabanea ni mwaiti n aomata irouia Aika Itiaki iaon Inria, Randy D. Funk, te beretitenti n te Inria Bangalore Mition, e taku, “Aio bon te taratara ae kakukurei n te tai ae kauringaaba aei, te bong ae ti na ururingnga n tainako. Ti na teimatoa n ururinga ana Abotoro te Uea ae e mena ikai.”
Unimwaane Perkins e anga ana tangira man te Beretitentii n te Aono mai Atia nakoia membwa I Inria ao e taku, “Ti noora moan waakin te mwakuri ae tamaroa n te aba aei. Rikiraken te Ekaretia e rikirake ao katean te titeiki e a tia ni karaoaki ni kaineti ma reirein te euangkerio ae akea tokiia ao baeten te nakoanibonga ake a tia ni kateaki.”
N taekinna bwa ngaia te kauoman n tia kakoaua nakon weteaia kain te titeiki beretitentii ae boou, Unimwaane Hallstrom e kabwarabwara wakin te kaotioti n rineaia taan kairiri n te titeiki ae boou. Ngkai te membwa n te Itingaun, e a tia n rineaki ao n roko n akea te inanonano ke te babakanikawai, e taku. E roko n ana kawai te Uea, ni katan iaan Tamneina ni karekean te kaotioti. “Ana kantaninga te Uea ibukin Beretitenti Gutty bwa e na riki bwa te beretitenti n te titeiki,” e taku Unimwaane Hallstrom.
Kristen Oaks, are e ira buuna, e taetae n reireinia ataei bwa aonga ni kakoaua “ibukina bwa a ataa aio tinara” (taraa Aramwa 56:48).
Ngkai ngaia te kabanea n tia taetae n te bootaki, Unimwaane Oaks e anga ana karabwarabwa nakoia kain India, te aba ae e inaomata iai te aro are e kariaia membwa n te Ekaretia “ni bobotaki ao n taetae iaon reirei n aia onimaki.”
Unimwaane Oaks e kakoaua aron karekean ana kakoaua te Tamnei are e a tia ni katauraoia te Uea ao n rineia taan kairiri ake a weteaki. Unimwaane Oaks e taetae naba iaon katabean te titeiki ae boou.
N te Otetemanti te burabeti Itaia e kabotaua te auti n rianna are e katania tibun Iteraera, e taku. “Te Ekaretia ngkai bon te umwanrianna. Ti ataia bwa te umwanrianna e riai ni boutokaki ma titeiki. Ngkai te Hyderabadbon ana tieiki Tion, ko kantaningaki bwa ko na waerake ao ni katauraoa te ibuobuoki n te kawai ni kabwakan te kabuianibwai ao taian mitinare.”
Ae reke imwin katean te titeiki, membwa I Hyderabad a kona ni karekea ana kakabwaia te tama ni uea. Unimwaane Oaks e kabwarabwara bwa tera kanoan ana kakabwaia te tama ni uea, ni kaitarai kakabwaia “man booki aika a tabu.”
“Ana kakabwaia te Tama ni Uea e taekina rikim n te baronga ae Iteraera are ti kona iai ni karekei kakabwaia aika mwaiti,” e taku Unimwaane Oaks. “Ana kakabwaia te Tama ni Uea e taekin naba kakabwaia ao berita ake ti kona ni karekei ngkana ti teimatoa ni kakaonimaki.”
“Ngkai e tabe n rikirake te Ekaretia I Inria, e nang roko te tai are e na anaaki iai nanon te burabeti ibukin katean te tembora I Inria,” e reitia nako. “Ni kabane titeiki ake a tia ni kateaki ana karikirakea te kantaninga are e ana iai te tembora. Ngkana a kaota te tau ao te motinnano, te tembora e iria.”
Ni kainan ana taeka Unimwaane Oaks e katuka te kakabwaia: “N te moan titeiki n te aba ae Inria, I kakabwaiai ngkami bwa kam na uring reirei n te aoa aei. I kakabwaiai ngkami bwa kam na uring berita ake kamwa tia ni karaoi ngke kam bwabetitoaki. I kakabwaia ngkami ma te ururing ao te nanomatoa ni kawakin ana tua te Atua bwa ko na kukurei n Ana kakabwaia.”
Te beretitentii n te titeiki n te Hyderabad Inria Titeiki ae tibwa kateaki (maing nakon te atai): Suresh Natarajan, te moan kauntira; John Gutty, te beretitenti; Rajaratnam Bushi, te kauoman ni kauntira.
E kania 600 kairake ni ikawai mai Inria, Nepal, ao Sri Lanka a ikotaki ibukin te maungatabu imwain katean te moan titeiki I Inria.
Anganano
N tain kawaran Hyderabad, Inria, Unimwaane Oaks ao tabeman taan kairiri n te Ekaretia a kaitibo ma membwa aika tebubua mwaitiia mai Inria, Nepal, ao Sri Lanka.
Anganano
Rawetamnei iroun James Dalrymple