“Tera ae nanonaki ni karinea ana nakoanibonga te Atua?”

Te nakoanibonga bon te mwaaka are a karaoa Aia mwakuri mai iai te Tama are i Karawa ao Iesu Kristo. Bon te kabanea ni mwakoroiroi ni mwaaka iaon te aba. Man te nakonibonga, a karaoaki otenanti, a kanakoaki kakabwaia, e a katiaaki karaoan te mwakuri n te tembora, e a taetaekinaki te euangkerio, a karaoaki taian kakai.

Kaain te nakoanibonga a tei ibukin te Tia Kamaiu, ngaia are a karinea te nakoanibonga mani karaoan te bwai are e na kona ni karaoia te Tia Kamaiu ngke arona bwa E mena ikai. A karinea te nakoanibonga mani maiuakinana ae kororaoi. A karinea te nakoanibonga man kunnikaiia, aia mwakuri, aia taeka, mwakuri n ibuobuoki, ao aia iango naba.

Kairake n ataeinaine a kona ni karinea te nakoanibonga mani kaawakinan aia berita aika a tabu n te bwabetito ao n ira buakon te kakamwakuri ma te karinerine n otenanti n te nakoanibonga n aron te toa ke te mwakuri n te tembora. A kona ni boutokaiia aia karo, mwaaneia, ao tabeman kaain te nakoanibonga ni kaawakinan tuua ao ni maiuakina ae kororaoi ni karaoan aia beku n te nakoanibonga.

Ti kona ni bane ni karinea te nakoanibonga man ara beku ma te kakaonimaki inanon nakoara, mani karineakin taian otenanti ao berita aika a tabu are e buokiira ni karekei.

Mwakuri n Aron te Tia Tei ibukin te Atua

Ngkana ti moanna n oota n aron kakateken te Atua ngkai e kona n anganiira te bwaintangira aei, ngkanne karinean te nakoanibonga e kona ni bebete: mwakuri ma te kakaitau ao karinea te mwaaka are ko onimakinaki iai. Titirakiniko i bon iroum, Ngkana ni kabane aomata aika a mena irarikiu a ataia bwa iai mwaakan te Atua irou, a na iangoa riki ae bati ke ae e karako ibukina? Anne karinean te nakoanibonga—e kauringko bwa ngkoe te tia tei ibukin te Atua ao karaoan am kabanea n tamaroa n te kawai are e kaota te karinerine ibukin te onimakinaki are E a tia ni katikua iaom.

Mason R., ana ririki 19, Colorado, USA

Riiki n Raoiroi

Ngkai te kairake n ataeinaine I kona n taekinna bwa I aki kani karinea te nakoanibonga. Ma ni kabane kairake n ataeinaine a riai ni karaoia. Ti karinea te nakoanibonga man arora n raoiroi. Ti karinea te nakoanibonga mani buokakiia kairake n ataeinimwaane ni karekei aia iango aika a itiaki. Ti kunnikainiira n aika a aki kamoamoa ao n taetae ma taeka aika a itiaki. Mani karaoan aei, ti buokiia kairake n ataeinimwaane ni karinea te nakonibonga.

Marisa B., ana ririki 14, Arizona, USA

Kamanoa te Nakoanibonga

Karinean te nakoanibonga nanona nakoiu bwa kairake n ataeinimwaane a karinea ao ni boutoka te bwaintangira are e a tia n anganiia te Uea. Ngkana I noora te kairake n ataeinaine ni karinea te nakoanibonga, I namakina riki te rau ao e korakora riki au karinerine nakoia kairake n ataeinimwaane. Te Tama are i Karawa e a tia n onimakinna ma te nakoanibonga, ngaia are I namakinna bwa ana beku te kairake n ataeinmwaane aei tiaki tii n taua te nakoanibonga ma ni boutokaia naba.

Melinda B., ana ririki 16, Washington, USA

Karaoa Am Beku ibukin te Atua

Oin te kawai ni karinea te nakoanibonga bwa, n au iango, ni karaoi bwaai ake e na kona ni karaoi te Uea n tii Ngaia ngke arona bwa E mena ikai iaon te aba, ibukina bwa ti tei ibukin Iesu Kristo. Nanona ti kakoroibukin taian motinnano, taian beku, ao taian berita ake ti karaoi nakon te Atua ngke ti katabuaki nakon te nakoanibonga. Mani karinean Ana nakoanibonga, ti na ira Ana taeka n “teirake ao ni mwakuri, n te aro bwa ootara e na riki bwa te kainibaire nakoia te botanaomata (taraa D&C 115:5). Ti buokiia tabeman n ataia bwa angiina ana toro te Atua ake a tia n anganaki te kariaia a mena iaon te aba.

Bismarck B., ana ririki 18, Santo Domingo, Dominican Republic

Kaota te Karinerine ibukin te Nakoanibonga

I taku bwa karinean te nakoanibonga boni karekean te karinerine ao te onimakinaki ni kabonganaan te nakoanibonga. Ngkana iai kaain am nakoanibonga ae te Aaron ake a karinea te nakoanibonga ao te toa n ae bati n aron ae ti karaoia inanon ara uoote, ngkanne ko na karekei tabeua baika a korakora ake ko na rinanona ni kabutan ao katauraon te toa. Ti bane ni kunnikainiira n te kabaraaki ae mainaina ma te neketai. Ti ataia bwa iai mwiina ae korakora inanon te uoote, ao iai naba mwiina nakoiu. I ataia bwa tauan te nakoanibonga bon te bwai ae tamaroa are e a tia n riki nakoiu.

Hansen B., ana ririki 15, Texas, USA

Tai Bitii Am Kainibaire

Karinean te nakoanibonga nanona aki karinakim n taabo ike ko ataia bwa ko na bae ni kakeai iai bonganan am kainibaire. Ngkana ti kamatebwaia te O Tetemanti n te tieminari, ti kunea inanon Karikan B’aai 39 ana katotoo Iotebwa mai Aikubita ni karinean ana nakoanibonga man birinakona man ana kaitataan buun Botibwa te aine.

Teuana te kawai ibukiia kairake n ataeinaine ni buokiira ni karinean te nakoanibonga bon irakin Ibukin Kakorakorakia te Roronrikirake ni kainibaire ao ni kunnikai aika a aki kamoamoa.

Joseph B., ana ririki 16, Texas, USA

Uringa te Tia Kamaiu

Te nakoanibonga bon tii mwaakan te Atua ae koaua iaon te aba ao ni kaota nakoira te kawai ni manga okiria. Ngkana ti iangoa karinean te nakoanibonga, ti iangoa irakin ana reirei Beretitenti Thomas S. Monson ao tabeman Abotoro. Te kawai ae tamaroa ni karinea te nakoanibonga bon karaoan bwaai ake ti reireinaki iai, are e butimwaeira n uringa te Tia Kamaiu. Ngkana ti uringnga, e na raoniira Tamneina. Karekean Tamneina e na kariaia bwa ti na kona ni karaoa te mwakuri ae eti ao n riki bwa te katotoo n ana kainibaire te euangkerio.

Sunday School class: Kylie E., Jaiten B., Joseph E., Alexandra R., Kaylie V., Alisha F., and Haylee W. (akea tamneina); Idaho, USA