O Le Auala na Ou Tumau Malosi ai i le Talalelei

Saunia e Tua Rogers

Sa ou papatiso ina ua 12 o’u tausaga, ma mo le tele o tausaga sa na o au lava le tagata o le Ekalesia i lou aiga. E lei faigofie i taimi uma lena mea, peitai sa faamanuiaina au i ni taitai lelei o e sa fesoasoani ia te au i lau malaga o le aoaoina o aoaoga faavae o le talalelei ma faaaoga na aoaoga faavae e faamalosia ma faaleleia ai lou olaga. Ona o lau faaiuga ina ia ou faamaoni i mea sa ou talitonu i ai, ua ou vaaia ai ni faamanuiaga maoae ua oo mai i lou olaga ma, i se taimi mulimuli ane, i olaga foi o tagata o lou aiga.

O nisi nei o mea na fesoasoani ia te au ina ia ou tumau malosi ai:

Faalatalata atu i le Tama Faalelagi e ala i gaoioiga e pei o le tatalo ma suesuega i tusitusiga paia. O loo silafia e Ia tulaga o loo feagai ma i tatou. O le tumau latalata atu ia te Ia na fesoasoani lea ia te au ou te manatua ai po o ai au.
Mulimuli i fautuaga a taitai o le Ekalesia. Ua ou vaaia i lou lava olaga le moni o fautuaga mai perofeta ma aposetolo.
Ia iloa o le ola ai i le talalelei o le a fausia ai se olaga sili atu i le taimi nei faapea ma le faavavau. Na fesoasoani lenei mea ia te au e faatumauina ai ou tulaga faatonuina ma le faatuatua. Na faamalosiauina au e taitai ina ia ou alu i le malumalu, lea na fesoasoani ia te au i se vaaiga faalemafaufau o le ola e faavavau.
Ia siosiomia oe e ni uo lelei o e tutusa o outou tulaga faatonuina. Sa faamanuiaina au i ni uo lelei o e sa faigofie ai ona faia ni filifiliga lelei ma tausisia ai lo’u faatuatua.
Ia tumau lou latalata i lou aiga. Sa ou alofa i lo’u aiga ma manao e fausia ni sootaga malolosi ma i latou.
Ola ai i le olaga. Mulimuli i tulaga faatonuina ma auai e faatino polokalama a le Ekalesia. O le a latou fesoasoani ia te oe e faaalia le faatuatua ma faia ai ni filifiliga lelei. O filifiliga lelei e tele lava ina faafaigofie ai le olaga, ma e masani lava ona maua ai se olaga fiafia.