Ko e Founga Ne u Kei Mālohi ai he Ongoongoleleí

Fai ʻe Tua Rogers

Ne u papitaiso ʻi hoku taʻu 12, pea ʻi ha ngaahi taʻu lahi ko au pē naʻe Siasi ʻi hoku fāmilí. Naʻe ʻikai ke faingofua maʻu pē, kae mālié he ne tāpuekina au ʻaki ha ongo taki lelei naʻá na tokoniʻi au ʻi heʻeku fononga ʻi hono ako ʻa e ngaahi tokāteline ʻo e ongoongoleleí mo hono fakaʻaongaʻi e ngaahi tokāteline ko iá ke fakamālohia mo fakatupulaki ʻaki ʻeku moʻuí. Koeʻuhí ko ʻeku fili ke kei tuʻu maʻu ʻi he meʻa ne u tui ki aí, kuó u mamata ai ki ha ngaahi tāpuaki maʻongoʻonga ʻi heʻeku moʻuí, pea kimui ange aí, ki he moʻui ʻa e kau mēmipa ʻo e fāmilí foki.

Ko e ngaahi meʻa ʻeni ne tokoni kiate au ke u kei mālohí:

Ofi ki he Tamai Hēvaní ʻo fakafou ʻi he ngaahi ʻekitivitī hangē ko e lotú mo e ako folofolá. ʻOkú Ne ʻafioʻi ʻa e ngaahi tūkunga ʻoku tau fehangahangai mo iá. Naʻe tokoni e ofi kiate Iá ke u manatuʻi pe ko hai au.
Muimui ki he akonaki ʻa e kau taki ʻo e Siasí. Kuó u mamata ʻi heʻeku moʻuí ki he moʻoni ʻo e akonaki mei he kau palōfitá mo e kau ʻaposetoló.
ʻIloʻi ʻoku fakatupu ʻe hono moʻui ʻaki e ongoongoleleí ha moʻui ʻoku lelei angé he taimí ni mo e taʻengatá. Kuó ne tokoniʻi ke u tauhi ʻeku ngaahi tuʻunga mo e tuí. Ne poupouʻi au ʻe he kau takí ke u ʻalu ki he temipalé, ne tokoni ia kiate au ke u sio-loto ki he moʻui taʻengatá.
Tuku ke ʻākilotoa koe ʻe he ngaahi kaungāmeʻa lelei ʻa ia ʻoku nau vahevahe hoʻo ngaahi tuʻunga moʻuí. Ne tāpuekina au ʻaki ha ngaahi kaungāmeʻa lelei ne nau ʻai ke faingofua hono fai ha fili ʻoku leleí mo tauhi ʻeku tuí.
Ofi ki ho fāmilí. Ne u ʻofa ʻi hoku fāmilí mo fie maʻu ke langaki ha ngaahi vā fetuʻutaki mālohi mo kinautolu.
Moʻui ʻaki ia. Muimui he ngaahi tuʻunga moʻuí pea kau ki he ngaahi polokalama ʻa e Siasí. Te nau tokoniʻi koe ke ke fakahaaʻi e tuí mo fai ha ngaahi fili ʻoku leleí. ʻOku faʻa ʻai ʻe he ngaahi fili ʻoku leleí ke faingofua ange e moʻuí, pea ʻoku nau ʻai maʻu pē ʻa e moʻuí ke fakafiefia ange.