Ti na kanga ni Maiu n Abaia Kairiribai
Man te kanakobwanaa n ana katebubua n ririki te tieminari are e kanakoaki n Tianuare 22, 2012.
Ti kauringa ana 100 n ririki te tieminari n te Ekaretia. I taua te karai are e oki rikaaki nakon ana bong ngkoa ngke kaubwaina a bon rangi ni karako.
Man moanakina ae mangori, iai ngkai ara ataei n te reirei n te tieminari ae 375,008 inanon kiraati n aaba aika 143 man raka iaon 38,000 taan ibuobuoki ao taan reirei aika bwanin aia tai ni kabuta te aonaaba. Ti kakoauaa bwa e na bati bonganana nakoia ara roronrikirake. Ti ata bonganami ao ami konabwai.
Te Atatai E na Buokiko ni Buakana te Kairiribai
I taetae bwa temanna are e a tia n noora te tai ae e a tia n nako ao ni katauraoiko ibukin te tai ae na roko.
Ko a ikawai rake inanon abaia kairiribai. Ngkana ko a ikawai n te maiu n tamnei, ko na oota bwa e kanga teuare e buakaka n niniia te aonaaba are e katobibiiko. E mena inanon mweenga, n te bwai ni kakaakibotu, te bwai ni kanakobwanaa, te taeka—ni kabane taabo ni katomimiiko. N angiin te tai, rokona e aki namakinaki.
I tangiria n tuangingkami bwa tera ae rangi ni manena ao man rangi n tangiraki. Booki aika tabu a taku, “Te bwai ae moan te raoiroi te rabakau; ma ngaia are karekea te rabakau” ao ngai N na reitia, “ma ni kabane [am] bwai katauraoiko [naako!]” Taeka n Rabakau 4:7 Akea au tai ae N na kabanebuaka ao ai arom naba. Ai ngaia are kakauongo!
Te tai are I baireia bwa N na riki bwa te tia reirei e rangi ni mataata inanou. N tain te kauoua ni Buaka n te Aonaaba, I bon mena inanon moan au ka 20 n ririki ao te bwairati ngai n te Air Force. I bon mwakuri iaon te aba ae uarereke ae Ie Shima. Te aba aio, e uarereke, ni kamaroaa ao kanga buburan te titambwa n te reta, ni bon tionako n tabon meangin Okinawa.
Teuana te tairiki n te tiamwa, I tekateka iaon te tabuki n tara taai ngke e nang bung. I bon iangoia raoi bwa tera ae N na karaoia ma maiu imwiin te buaka, ngkana I bon tekeraoi ni maiu. Tera ae I tangiria n riki nako iai? Bon te tairiki anne are I a baireia bwa I tangiria n riki bwa te tia reirei. I iangoia bwa taan reirei a aki toki n reirei. Te reirei bon aan raoi te maiu.
I moan anga reirei n te tieminari n te 1949 i Brigham City. I a tia n riki bwa ataein te reirei n te tieminari inanon au tai n te reirei ae rietaata.
Iai teniua kooti ake a moan anga reirei iai n te tieminari: te O Tetemanti, te Nu Tetemanti, ao Rongorongon ngkoa te Ekaretia. Bon te kariaiakaki nakoiu n ikota te kiraati n te moaningabong iaon ana Boki Moomon. I a tia n okirikaaki man te buaka ma te kakoaua man ana Boki Moomon ao te ota bwa e kangaa ana bwai n tituaraoi te Tamnei ae Raoiroi ni mwakuri.
Ana Bwai n tituaraoi te Tamnei ae Raoiroi E na Kaawakiniko inanon Abaia Kairiribai
Ko a tia n anga reireiiaki ni kabanea maium ibukin ana bwaintituaraoi te Tamnei ae Raoiroi, ma te anga reirei e kona n tii uotiko ni kararoako. Ko kona ao, ni koauana, ko riai n toua nako nikiran te kawai n ti ngkoe ni kunea inanom bwa e kangaa te Tamnei ae Raoiroi n riki bwa e na kairiko ao ni kawakiniko.
Ibukiia ataeinimwaane ao ataeinaine, te mwakuri bon titebo. Kakaaean bwa e kangaa te Tamnei ae Raoiroi ni mwakuri inanon maium bon te mwakuri ae ko na kakaea ni maium. N te tai are ko a tia ni karekea te kakaae anne ibon iroum, ko kona ni maeka inanon abaia kairiribai ao ko aki kona ni mwamwanaaki ke ni kamaunaaki. Akea te membwa n te Ekaretia aei—ao nanon anne n tatabemaningkami nako—ae e na manga karekea te kaairua ae korakora n akea moa te kauring man ana wirikiriki te Tamnei ae Raoiroi.
N tabetai ngkana ko a tia ni karaoa te kaairua, ko kona n taekinna imwiina, “I ataia bwa I aki riai n tia ni karaoa anne. E aki tamaroa namakinana,” ke tao, “I ataia I riai n tia ni karaoa anne. Bon akea irou te ninikoria ni karaoia!” Namakin aikai bon ana kakatai te Tamnei ae Raoiroi ni kairiko nakon te tamaroa ke n tuangko ni kararoako man te ikoaki.
Iai bwai aika koaua ae ko riai n aki karaoi ngkana te rain ibukin te itoman a na tiku n uuki. Ko aki kona ni kewe ke ni mwamwanaa te aba ke ni kimoa ke ni mwakuri ni bure ao ni karekei kawai akanne n teimatoa ni mwaawa man te kangaanga. Tai nako n taabo are e na totokoa te reitaki iai ma te maiu n tamnei.
Ko riai n reireiniko ni kakaaea te mwaaka ao te kawai are e reke iroum, ao ngkanne iira te kooti anne n aki tabe bwa tera.
Te moan iaon te bwai are “ko na karaoi”, katuka te taeka tataro. Angiin te tai, am tataro a na aki karongoaa. Ko kona n iangoa te tataro.
Ko kona n taainako ni karekea te rain n itoman ma Tamam are i Karawa. Tai kariaia teuare e buakaka n tuangko bwa akea ae kakauongo n te itera are teuana. Am tataro a ongoraeaki n taainako. Ko aki kona n tiku n ti ngkoe!
Kawakin rabwatami. Kam na itiaki. “Kam aki atai ngkami bwa mwaneaban te Atua ngkami, ao e maeka Tamnein te Atua i nanomi?” 1 I-Korinto 3:16
Warekii raoi berita ake a kuneaki inanon mwakoro 89 man te Doctrine ao Covenants. Tuan te Mauri e aki beritani marurungira ni kororaoi ma te tia namakin n tamnei inanom e kona ni kakorakorako..
Kararoako man taitai ao bwaai aika ti te arona are a na kabuakakaa rabwatam. Rabwatam e karikaki ni katotongan te Atua.
Taeka n Reirei ni Burabeti e Reirei Bwa Terana te Koaua
I tangiria n taetae ngkai ni bannan te taetae ae eeti ibukin te bwai teuana.
Ti ataia bwa te mwaine e karaoaki inanon te aonaaba are imwaain te aonaaba aei.1 Te tamnei ao te rabwata bon tamnein te aomata (D&C 88:15). Te bwai ae te mwaine bon te bwai ae korakora iangoana nakoia Taari, n ai aron bwaai ni kabane n te aroaro ae riai.
Tabeman mai buakomi a tia n namakina ke n tia n tuangaki bwa ko bungiaki ma namakin aika aroaro ao ko aki bure ngkana ko mwakuri iaon karirii akanne. N te reirei ti ataia bwa ngkana a koaua akanne, inaomatam n rinerine e na tia ni kamaunaaki, ao anne e aki kona n riki. Ko na karekea n taainako te rinerine n iira ana wirikiriki te Tamnei ae Raoiroi ao ni maiuakina te maiu ae itiaki ao n akea kairuana, teuana ae onrake ma te tamaroa.
Beretitenti Gordon B. Hinckley e katanoata ae imwiina inanon te maungatabu ni kabuta: “Aomata a titiraki ibukin nnera irouia te koraki ake a iangoia bwa … keei ao retibian. Au kaeka bwa ti bon tangiriia n aron natin te Atua aika mwaane ao aine. A kona n iai aroia aika teretere aika korakora ao aika a kangaanga ni baireaki. Angiia aomata iai [kairiiri] man te aekaki teuana ke teuana n taai aika kakaokoro. Ngkana a aki mwakuri iaon tangirakin bwaai aikai, ngkanne a kona ni waaki n ai aroia membwa ni kabane n te Ekaretia. Ngkana a uruaka te tua ibukin te itiaki ao te kainibaaire ibukin te maiu ae tamaroa n te Ekaretia, ngkanne a na riki bwa taan reirei n te Ekaretia, n ai aroia ake tabeman.
“Ti tangiria ni ibuobuoki … ni kakorakoraia, ni buokiia ma aia kainnano ao ni buokiia n aia kangaanga. Ma ti aki kona n tei n aki kakammwakuri ngkana a karaoi mwakuri aika aki raoiroi, ngkana a kataia ni kateimatoa ao ni kamanoa ao ni maiu n te aro are e aranaki bwa te mare are titebo aroia n aia mwaine. Ni kariaia te aekaki anne e na karekea te ota n aan te bwai ae rangi kakamaaku ao n tabu man te mare are e katabua te Atua ao nanona ni koaua, karikaia utu.”2
Beretitenti Hinckley e bon taetae ibukin te Ekaretia.
Kabongana Inaomatam n rinerine ni Kawakina ke Ni manga Karekea te Tabo ni Kamaiu
Te moan bwaintituaraoi are Atam ao Eva a karekea bon inaomataia n rinerine: “Ko kona n rinerine ibon bukim, ibukina bwa ko bon anganaki” (taraa Moses 3:17).
Bon iai iroum te inaomata n rinerine anne ae titebo. Kamanena n te wanawana ni kakeaa te mwakuri iaon iango ake aki raoiroi ke karirii aika aki tabu ake a na kona n roko inanon am iango. Tii tai nako ikekei, ao ngkana ko a kaman n roko ikekei, oki rikaaki n otinako mai iai. “Kakeai mai iroumi bwaai ni kabane aika tiaki aron Atua” (Moronai 10:32).
Tai kumei mwaaka ni karikibwai ibukin te maiu inanon rabwatam n ti ngkoe ke ma kaain mwaine ake uoua. Anne ana kainibaire te Ekaretia, ao e na aki bitaki. Ngkai ko a ikawai, bon iai te karirii ae ko na kakatai ke ni ukoukori mwakuri aika aki raoiroi. Tai karaoa anne!
Te taeka ae kakawaki bon reirei—reirei ibon iroum. Te taeka reirei e roko man te taeka ana reirei ke te tia iria. Riki bwa ana reireiae te tia ira te Tia Kamaiu, ao ko na kamaiuaki.
Temanna ke uoman mai buakomii a na kona n iangoia, “I a kaman kaairua n aei ke n te bure ae korakora anne. E a rangi n rimwi ibukiu.” E bon aki kona n rangi n iremwe.
Ko a tia n reireiaki ni mweengam ao n te tieminari ibukin ana Mwakuri ni Kamaiu Iesu Kristo. Te Mwakuri ni Kamaiu titebo ma te bwai ni kamauna. E kona ni kamauna te bure ao mwiina ae tao terana are e na karikiko bwa kona namakina te bure.
Te bure bon te maraki n tamnei. Tai karawawatako man te maraki ae korakora. Kanakoa. Kitanna. Raira nanom, ao, ngkana e riai, rairananom riki ao riki ao riki ao riki ni karokoa ngkoe—tiaki te kairiribai—ko a bon taua taekam.
Te Rau ae Maan e Roko man te Rairannano n Taainako
Te maiu e riki bwa te kakatai ao te kaairua aika ai reiti. Karina “rairannano n taainako” nakon bwaai ake ko na karaoi. Aio are e na karokoko n te rau ae maan are e aki kona ni kabooaki n te boo n te aonaaba aio. Ataakin te Mwakuri ni Kamaiu e kona n riki bwa teuana te koaua ae rangi ni kakaawaki are ko kona n reiakinna inanon kairakem.
Ngkana ko reitaki ma tabeman ake a katikiko rikaaki n onea mwiin are ni karikiko rake, teei ao bita raom. Ko na kona n ti ngkoe ao ni maroaa n taai tabetai. Te titiraki ae kakaawaki ae kona titiraki imwiina, “Ngkana ti ngkoe, ko mena ma te rao ae tamaroa?”
Kabwaranakoan te aro are ko a tia ni kariaia ni kamangaoko e kona ni matoatoa. Ma te mwaaka ane inanom. Tai bwarannano. Te Burabeti Iotebwa Timiti e anga reirei bwa “ni kabane aomata ake iai rabwataia iai mwaakaia iaoia ake akea rabwataia.”3 Ko kona n totokoa te kairirii!
E aki taraa n ae e aki kona n ae e na manga reke te kaitibo ma teuare e buakaka; e aki kona ni kaotia n te kawai anne. Ma e ngae ngkana e bon roko n rabwatana nakoim ni kataiko ao ni kaririiko, iai iroum te angaraoi. Ko kona ni kamatoa inaomatam n rinerine, ao e na kitaniko n ti ngkoe.
Taua Raoiroin taian Kakabwaia man te Tieminari
Ngkoe tiaki aekakiia aomata. Ngkoe ko bon rangi n onoti. Ngkoe e bon raka tamaroam. I kanga n ata anne? I ata anne ibukina bwa ko bungiaki n te tai ao n te tabo are ana euangkerio Iesu Kristo e kona n roko nako nanon maium rinanon te anga reirei ao mwakuri ni kakukurei n te mweenga ao n ana Ekaretia Iesu Kristo ibukiia Aika Itiaki ni Boong aika Kaitira. E bon, n aron are e a tia te Uea ni boni Ngaia n taku, “te ekaretia ae tii ngaia ae koaua ao ni maiu iaon te aonaaba ni kabuta” (D&C 1:30).
Iai bwaai tabeua are ti kona n ikotia nakon te bwai are ti na karaoia, ma ko ataia bwa tera ae ko riai ao ae ko aki riai ni karaoia inanon maium. Ko ata ae eti ao ae e bure ao ko aki kainnanoa ae ko na tuangaki ni bwaai ni kabane.
Tai kataonabai ririki aikai ibukin kaetieti man te tieminari. Taua te tekeraoi man kakabwaia aika korakora are ko na reiakina reirein te Ekaretia ao ai anga reirei burabeti. Reiakina are moan te kakaawaki. E na kakabwaiako ao kanoam ibukin rooro aika a bati aika a na roko.
A na aki bati ririki aika a na nako ni karokoa ae ko na mareaki ao ni karekeia natim, te mare are e na kabaeaki n te tembora. Ara tataro bwa ko na kuneiko, n te tai ae e aki maan, n tekateka n te rau inanon te utu n te uoote ke te mwaanga.
Waaki Nako ma te Kantaninga ao te Onimaki
Tai maaka te tai ae na roko. Waaki nako ma te kantaninga ao te onimaki. Uringa ana bwaintituaraoi te Tamnei ae Raoiroi mai i karawa. Reirei n anga reirei mai iai. Reirei ni kakaaea. Reirei ni maiuakinna. Reirei n tataro n taainako n aran Iesu Kristo (taraa 3 Nibwaai 18:19–20). Tamnein te Uea e na kawariko, ao ko na kakabwaiaaki.
Iai iroura te onimaki ae nano ao ni korakora.
I kaota au kakoaua nakoimi—te koaua are e roko irou inanon kairakeu. Ao ko bon aki kaokoro mai irouia tabeman n ai arou. Iai iroum naba te inaomata nakon te kakoaua anne ao te koaua n aroia tabeman. E na roko iroum ngkana ko karekea. I bubuti ana kakabwaia te Uea iaomi—ana kakabwaia te koaua anne bwa e na tiku inanon maium, ni kairiko ngkai ko a karekea te kukurei nakon taai aika ana roko.
kamataata iroun Cary Henrie
kamataata n te icon iroun Scott Greer