Meda Qaqa Vakacava ena Vanua ni Meca
Mai na dua na vosa kaburaki ni yabaki drau ni semineri ena ika 22 ni Janueri 2012.
Eda sa mai marautaka tiko na yabaki 100 ni semineri ena Lotu. Au nanuma lesu na veiyabaki ni gauna e liu a se lailai sara kina na ivurevure eso ni parokaramu oqo.
Mai na itekitekivu malumalumu o ya, eda sa yacova oqo na 375,008 na iwiliwili ni gonevuli era tiko ena kalasi ni semineri mai na 143 na veimatanitu ka sivia e 38,000 o ira era volodia kei ira na kena qasenivuli tudei e vuravura raraba. Eda sa bucibucini tiko vakalevu vei ira na noda itabagone. Keimami sa kila tiko na kemuni yaga kei na nomu ni rawa-ka.
Na Vuku Ena Vukei Kemuni Mo ni Valuta Rawa na Meca
Au mai vosa tiko niu sa tadrava oti mai na veigauna makawa ka na vakarautaki kemuni ki na veisiga ni mataka.
Ko ni sa tubu cake tiko oqo ena vanua ni meca. Ena gauna ko ni sa na matua kina vakayalo, ko ni na qai kila kina vakavinaka na sala sa curu wavoliti kemuni tiko kina e vuravura o vu-ni-ca. Sa tiko o koya ena itikotiko, veivakamarautaki, ena itukutuku, ivosavosa—ena veika kecega e wavoliti kemuni tu. Ena vuqa na gauna, e sega ni kilai na nona sa mai tiko e loma.
Au gadreva meu tukuna vei kemuni na veika bibi e yaga ka gadrevi dina sara. Na ivolanikalou e tukuna, “Sa ka levu duadua ga na vuku; mo rawata mada na vuku,” ka meu kuria, vata kei na veika [ko ni] sa rawata ka [toso ki liu!]” (Na Vosa Vakaibalebale 4:7). Au sega ni via vakaoti gauna ka vakakina o iko. Mo ni vakarorogo sara!
E matata vinaka tu ena noqu vakasama na gauna au a digitaka kina meu dua na qasenivuli. Ena gauna ni iKarua ni Valu Levu, au se qai yabaki 20 tiko kina vakacaca kau sa pailate tiko kina ena Mataivalu ni Vuka. Au a veiqaravi tiko ena yanuyanu lailai o Ie Shima. Na yanuyanu oqo, e ka lailai sara, ka ciri duadua toka ka kena levu e vaka toka ga e dua na sitaba ni vakau meli, ka toka ena mua ni vualiku kei Okinawa.
Ena dua na yakavi galili ni vulaikatakata, au a laki dabe toka ena dua na bari ni vatu meu raica ni sa dre ko malolo. Au a vakasamataka toka na cava meu na cakava ena noqu bula ni sa oti na ivalu, keu kalougata meu na lesu bula. Meu na laki cava beka? Ena bogi o ya au a digitaka kina meu na dua na qasenivuli. Au vakasamataka ni o ira na qasenivuli era na vuli tikoga. Na vuli e dua na yavu ni inaki ni bula.
Au a tekivu veivakavulici ena semineri ena 1949 mai Brigham City. Au a dua vei ira na gonevuli ena semineri o ya ena gauna ni noqu vuli torocake.
E a tolu na lewenivuli a vakavulici taumada ena semineri: na Veiyalayalati Makawa, Veiyalayalati Vou, kei na iTukutuku Makawa ni Lotu. A noqu madigi meu vakuria ena dua na kalasi ena mataka lailai me baleta na iVola i Momani. Au a lesu mai ena ivalu vata kei na noqu ivakadinadina ni iVola i Momani kei na noqu kila vakavinaka na ivakarau ni nona cakacaka na isolisoli ni Yalo Tabu.
Na iSolisoli ni Yalo Tabu ena Taqomaki Iko ena Vanua ni Meca
Ko ni sa vakavulici tiko ena nomuni bula taucoko me baleta na isolisoli ni Yalo Tabu, ia na veivakavulici oqo e vakaiyalayala walega. Sa rawa vei iko, ka dina sara, ni dodonu mo gole yani ki liu vakataki iko mo raica rawa e lomamu na sala e veivakauqeti veidusimaki ka veitaqomaki kina na Yalo Tabu.
Me baleti ira na cauravou kei na goneyalewa, sa tautauvata ga na kena sala. Na kena kilai na sala e dau cakacaka kina na Yalo Tabu ena nomuni bula sai koya na sasaga ni bula taucoko. Ena gauna o sa kunea kina vakataki iko na ka oqo, sa qai rawa mo bula voli ena vanua ni meca ka sega ni rawa mo lawakitaki se vakarusai. Ena sega ni rawa vua e dua na lewe ni Lotu—o ya oi kemuni yadudua—me na vakayacora rawa e dua na cala levu ni sega mada ni vakaroti ena veivakauqeti ni Yalo Tabu.
Eso na gauna ni ko sa caka cala, ko na rairai kaya e muri, “au sa kila vakavinaka sara tu ga meu a kua ni cakava. Au a sega ni lomadonu kina,” se rairai beka, “Au kila sara ga ni dodonu meu a cakava. Sa sega vei au na qaqa meu cakava!” Na vakasama kece oqori sa saga tiko mai kina na Yalo Tabu me dusimaki iko ki na veika vinaka se vakaroti iko mo gole tani mai na ka ni veivakaleqai.
E tiko e vica na ka mo kakua ni cakava ke sa taladrodro vinaka tiko na sala ni veitaratara. Sa sega ni rawa mo lasu se butako se caka cala me qai galala tu na veisala oqo mai na kena rawa ni vakataotaki. Kakua ni lakova na vanua e vakataotaki kina na veitaratara vakayalo.
E dodonu mo vulica mo vakasaqara na kaukauwa kei na veidusimaki sa vakarautaki tu me nomu, ka mo qai muria na sala o ya se cava ga e yaco.
Vola taumada e liu ena nomu lisi “mo cakava” na vosa masu. E vuqa na gauna, o na masu galugalu ga. Sa rawa mo masu ga ena nomu vakasama.
Sa rawa me tadola tu ga ena veigauna na sala ni veitaratara kei na Tamamu Vakalomalagi. Kakua ni vakatarai vu-ni-meca me vakauqeti iko ni sega ni dua e vakarorogo tiko mai yasana ka dua. E na rogoci kece sara na nomu masu. O na sega sara ni tu duadua!
Maroroya na yagomu. Me savasava na yagomu. “Dou sa sega beka ni kila ni dou sa vale ni Kalou, ka sa tiko vei kemudou na Yalo ni Kalou?” (1–Korinica 3:16).
Wilika vakavinaka na veika sa yalataki tu ena wase 89 ni Vunau kei na Veiyalayalati. Na Vosa ni Vuku e sega ni yalataka me tuvaki vinaka na yagomu ia mera na vaqaqacotaki na gacagaca vakayalo e lomamu.
Kakua ni samuqawe kei na veika vakaoqo e vakatanitaka na irairai ni yagomu. A buli na yagomu ena irairai ni Kalou.
Na iVakasala Vakaparofita era Vakavulica na Veika sa Dina
Au gadreva meu vosa me baleta na ivakarau ni veivosaki vakadodonu me baleta e dua na ka.
Eda sa kila tu ni nomu mai tagane se yalewa sa vakarautaki rawa tu mai na vuravura taumada.1 “Ia sa cokoti vata na yalo kei na yago me tamata” (V&V 88:15). Na ulutaga oqo baleta na tagane kei na yalewa sa ka bibi sara vei iratou na Veitacini, ni sa vakakina na ulutaga baleta na tiko savasava.
E vica vei kemuni ko ni sa rairai vakila se tukuni vua ni ko ni a sucu mai ena yalo e lomatarotaro tu ka sa sega vei kemuni na cala kevaka ko ni cakacaka ena veitemaki oqori. Vakaivunau eda sa kila ni kevaka me dina na ka oqo, sa na rairai rawa me bokoci na nomuni galala ni digidigi, ia sa sega ni rawa me yaco oqo. E tu ga na nomuni digidigi mo ni muria kina na veivakauqeti ni Yalo Tabu ka bula voli ena dua na bula ni tiko savasava kei na valavala kilikili, e vakasinaiti ena bula dodonu.
A vakaraitaka o Peresitedi Gordon B. Hinckley na ka oqo ena koniferedi raraba: “Era vakataroga tiko o ira na tamata na noda lawa ena vukudra o ira era kila ni ra … vakasalewalewa kei na vakasaganegane. Au sa kaya kina ni da lomani ira ni ra sa luvena tagane kei na yalewa na Kalou. E dina ni ra sa vakayacora tiko na itovo veivesuki oqo ka rairai dredre na kena tarovi. E vuqa na tamata era [temaki] ena dua na kena mataqali se dua tale ena so na gauna. Kevaka era sega ni cakava e dua na ka ena veivakayarayarataki oqo, sa qai rawa me ra gole yani ki liu me vakataki ira ga na vo ni lewe ni Lotu. Kevaka era voroka na lawa ni tiko savasava kei na ivakatagedegede dodonu ni Lotu, sa na rawa me ra na vakadodonutaki vaka-Lotu, me vakataki ira tale na kena vo.
“Eda gadreva me da vukei ira sa vakaoqo … vaqaqacotaki ira, vukei ira ena nodra leqa kei na nodra gagadre. Ia me da tu ka valuta kevaka era sa vakayacora tiko na itovo ca oqo, kevaka me ra sa tutaka ka taqomaka ka bulataka na veiyacovi vakayago vata. Ni da vakadonuya na veika vakaoqo eda sa qai vakamamadataka kina na yavu bibi ni ka tabu ni Kalou- o ya na vakamau dodonu kei na kena inaki dina, o ya na susugi cake ni matavuvale.”2
A vosa tiko o Peresitedi Hinckley ena vuku ni Lotu.
Vakayagataka na Nomu Galala ni Digidigi Mo Maroroya se Vakadeitaki Tiko ena Yavu Taqomaki
Na imatai ni isolisoli rau a ciqoma o Atama kei Ivi o ya na galala ni digidigi: “Ia sa soli tu vei iko mo lewa na ka mo kitaka” (Mosese 3:17).
Sa tiko talega vei iko na galala ni digidigi vata ga oqo. Mo vakayagataka vakavuku mo lako tani kina mai na gagadre vakatani se veitemaki butobuto ena rawa ni lako mai ki na nomu vakasama. Mo kakua ga ni lako kina, ia kevaka ko sa tiko kina, lesu tani mai kina. “Biuta tani na itovo sa sega ni vakalotu” (Moronai 10:32).
Kakua ni vakacacana na kaukauwa ni vakavure bula era tiko e yagomu se vei ira na tagane se yalewa. Oqo na ivakatagedegede ni Lotu, ka na sega ni veisau rawa. Ni ko sa matua tiko mai, ena yaco mai na veitemaki me vakatovotovotaki se vakadikevi na cakacaka ni veigarovi. Kakua ni cakava!
Na vosa e veivakadeitaki o ya na bula vakaivakarau —bula vakatisaipeli taki iko. Na vosa bula vakavakairau e tadu mai na vosa tisaipeli or dauveivakatotomuri. Mo dua e tisaipeli-daumuria na iVakabula, ko na qai taqomaki.
Ena rairai vakasamataka tiko beka e dua se rua vei kemuni, “Au sa caka cala se cakava na cala bibi oya. Au sa sega ni rawata.” O na rawata vakaidina.
Ko sa vakavulici tiko e vale kei na semineri baleta na Veisorovaki i Jisu Karisito. Na Veisorovaki sa vaka e dua na ibokoboko. Ena rawa me qusia laivi na cala kei na revurevu ni veika e vakavuna tiko mo cala tiko kina.
Na cala e dua na rarawa vakayalo. Mo kakua ni vakararawataki mai na mosi tawamudu. Tagutuva laivi. Kakua tale ni lesuva. Mo veivutuni, ke rawa, veivutuni tale, veivutuni tale, veivutuni tale, veivutuni tale me yacova—ni sa sega ni rawata o meca—me lewai iko tale.
Na Vakacegu Tawayalani e Yaco Mai Ni Da Veivutuni Vakawasoma
Ena yaco na bula oqo me veicevacevai mai kina na veivakatovolei kei na caka cala. Toqa na “veivutuni vakawasoma” ena nomu lisi ni veika mo cakava. Oqo ena kauta mai vei iko na vakacegu tawayalani e sega ni voli rawa ena dua na isau vakailavo ena vuravura oqo. Na nomu kila vakavinaka tiko na Veisorovaki sa rawa me dua na dina bibi duadua o na vulica rawa ena nomu bula vaka-itabagone.
Kevaka o veimaliwai tiko kei ira eso era vakalolovirataki iko tiko ka sega ni vakatataki iko cake tiko, me sa rauta ka veisautaka na nomu ilawalawa. Ko na tiko duadua beka ka so na gauna ko na bula galili voli. Sa qai taro bibi beka me tarogi, “Ni ko sa tiko duadua, ko sa vakailawalawa vinaka tiko beka?”
Ena rawa toka ni dredre na nomu biuta laivi na nomu itovo makawa o a solegi iko tu kina. Ia sa tu vei iko na kaukauwa. Kakua ni yalolailai. E vakavulica o Parofita Josefa Simici ni “o ira kece era vakayago era kaukauwa cake mai vei ira era sega ni vakayago.”3 E rawa mo vorata na veitemaki!
Ena sega ni rawa mo na sotavi vu-ni-ca vakatamata; e sega ni dau vakaraitaki koya mai vakaoqo. Ia kevaka mada ga ke na lako mai vakatamata o koya vei iko me vakatovolei ka temaki iko, o na qaqa. Sa rawa mo vakaukauwataka na nomu galala ni digidigi, ka na biuti iko o koya.
Taura Me Nomu na Veivakalougatataki ni Semineri
E sega ni ko ka wale. Ko sa tamata digitaki. Ko tamata duatani sara. Meu kila beka vakacava oqo? Au kila ni vuku ga ni ko a sucu ena dua na gauna kei na dua na vanua ena lako rawa mai kina na kosipeli i Jisu Karisito ki na nomu bula mai na ivakavuvuli kei na itaviqaravi ni nomu itikotiko kei na Lotu i Jisu Karisito ni Yalododonu Edaidai. Ni sai koya oqo, me vaka e kaya na Turaga Vakai Koya, “na lotu dina duadua ga e vuravura” (V&V 1:30).
E tiko eso tale na ka eda rawa ni tomana ena lisi, ia o sa kila tiko na veika mo cakava kei na veika mo kakua ni cakava ena nomu bula. Ko sa kila tiko na veika dodonu kei na veika cala ka sega tale ni gadrevi mo vakaroti tiko ena veika kecega.
Kakua ni vakamaumautaka na veiyabaki ni nomu vakasalataki ena semineri. Taura me nomu na veivakalougatataki cecere mo laki vulica na vunau ni Lotu kei na nodra ivakavuvuli na parofita. Vulica na veika bibi e yaga duadua. Ena vakalougatataki iko kei ira na nomu kawa ena itabatamata era muri tiko mai.
Ena sega ni dede ena yaco mai na gauna mo ni sa vakamau kina ka vakaluveni, na vakamau me laki vauci e valetabu. Sa neimami masu mo ni na laki yacova, na kena gauna, mo ni laki taqomaki ena dua na matavuvale ni tabanalevu se tabana.
Toso ki Liu ena iNuinui kei na Vakabauta
Kakua ni rerevaka na veisiga ni mataka. Toso ki liu ena inuinui kei na vakabauta. Mo nanuma tiko na isolisoli vakalomalagi ni Yalo Tabu. Vulica mo na dautuberi mai kina. Vulica mo dau vakasaqara. Vulica mo bula voli kina. Vulica mo dau masu ena veigauna ena yaca i Jisu Karisito (raica na 3 Nifai 18:19–20). Ena mai qaravi iko na Yalo ni Turaga, ko na vakalougatataki kina.
E titobu ka bibi sara na neimami vakabauti kemuni tiko.
Sa noqu ivakadinadina oqo vei kemuni—e dua na ivakadinadina a yaco vei au niu a se cauravou kina. Ko ni sega ni duidui mai vua e dua tale ka vakakina oi au. Sa nomuni na dodonu ki na ivakadinadina o ya ka ivakadinadina bula me vakataka ga e dua. Ena yaco mai vei iko kevaka o cakacakataka. Au sa vakatikora vei kemuni na veivakalougatataki ni Turaga—na veivakalougatataki ni ivakadinadina bula o ya me tikoga ena nomu bula, me dusimaki iko ni ko tuvanaka e dua na bula marau ni veisiga ni mataka.
Droini mai vei Cary Henrie
Droini ni ivakatakilakila mai vei Scott Greer