I Tataro ibukin te Ninikoria

Fy Tianarivelo, Madagascar

Au karo bon kaain te Ekaretia, ma a aki rangi ni kakaonimaki. Aio n tabetai e karekea te untaba ibukina a kakoaua bwa tain te utu e riai n roko imwaain bwaai ni kabane—imwaain nakom nakon te taromauri, kakorakorai au wewete n te Ekaretia, ao karaoakin waaki ni kakukurei tabeua.

Ibukina bwa ngai te tia kairiiri n te Moanrinan ao te membwa n ana kuaea te uoote, au bootaki n te Ekaretia n tabetai e mangao ma tabeu n te utu. Teuana te bong ngke I katauraoai ni kaea te kanakobwanaa ni maungatabu ni kabuta n ara auti ni bootaki i Antananarivo, au karo a kauringai bwa iai ara iruwa inanon mweengara.

“Ko na karaoa te rinerine imarenan am utu ao te Ekaretia,” e tuangai tinau. “Tao ko na tiku ikai ma ngaira ao n aki iira te maungatabu, ke ko na nako nakon te maungatabu ao ni kaitara te katuaeaki.”

I baireia bwa N na aki kauntaeka ma tinau. N onea mwiina, I karekea au tai ni butiia te Tama are i Karawa n anganai te ninikoria ao te korakora. I butiia naba Ngaia ni buokai n ata ae N na karaoia. I riai n tiku n te mweenga ke n nako nakon te taromauri ao n ongo bwanaan te burabeti?

N te tai naba are e bane au tataro, I kona n namakina te Tamnei ae Raoiroi. I kona n namakina te Tamnei ni kakorakoraai n tuanga tinau bwa kakawakira ibukiu n nako ao n ongora nakon te burabeti. I namakinna bwa N na riai n tuangnga bwa N na karekei reirei aika wanawana tiaki tii ibukin maiu n te bong aei ma ibukin naba au bong aika a na roko.

Te Atua e kona ni karaoi bwaai aika kamimii, ao E kamarau nanoia au karo n te aro are a kariaia nakou nakon te maungatabu ni kabuta n akea te katuaeaki. Aio bon te mwakuri ae kamimii inanon maiu. E kamatoa nakoiu koauan te boki ae tabu are e taku, “Ma ni mwaakan te Tamnei are e Raoiroi ao [ti] na kona n atai koauan bwaai ni kabane” (Moronai 10:5).

I ataia bwa ngkana ti kabotoa ara mwakuri iaon reirei man te euangkerio ao ni kakauongo nakon te Tamnei, ti na kona n taainako ni kukurei ma ara rinerine. Te taneiai aio e kakorakora au kakoaua bwa te Atua iai ikekei ibukira ao bwa te Tamnei are e Raoiroi e na buokiira inanon maiura.

N te tai naba are e bane au tataro, I kona n namakina te Tamnei ae Raoiroi. I kona n namakina te Tamnei ni kakorakoraai n tuanga tinau bwa kakawakira ibukiu n nako ao n ongora nakon te burabeti.