Na ou Tatalo mo le Lototoa
Fy Tianarivelo, Madagascar
O ou matua o ni tagata o le Ekalesia, ae le toaaga tele i laua. O nisi taimi e tulai mai ai feteenaiga ona la te talitonu e faamuamua le aiga i mea uma lava—a o le’i o i le lotu, faalauteleina o o’u valaauga i le Lotu, ma le faia o isi gaoioiga.
Ona o au o se taitai i le Peraimeri ma o se tagata o le aufaipese, o nisi taimi e faalavelave au fonotaga faale-Lotu i tiute faaleaiga. I se tasi aso ao ou sauni e alu i se faasalalauga o le konafesi aoao i lo matou falelotu i Antananarivo, na faamanatu mai e ou matua ia te au o loo i ai malo i lo matou fale.
“Ua tatau ona e filifili po o lou aiga po o le Lotu,” sa fai mai ai lou tina ia te au. “Po o lou nofo mai ma matou ae misi le konafesi, po o lou alu i le konafesi ona e feagai lea ma le faasalaga.”
Na ou filifili ia aua nei i ai se finauga ma lou tina. Nai lo o lena, na ou faaaluina se minute e fesili ai i le Tama Faalelagi ia tuu mai ia te au le lototoa ma le malosi. Na ou fesili foi ia te Ia e fesoasoani ia te au ia iloa le mea e fai. Pe tatau ona ou nofo i le fale ma lo’u aiga pe alu i le lotu e faalogo i le siufofoga o le perofeta?
O le taimi lava na uma ai lau tatalo, sa mafai ona ou lagonaina le Agaga Paia. Sa mafai ona ou lagonaina le faamalosiau mai o le Agaga ia te au e ta’u i lo’u tina e taua tele mo au le alu e faalogo i le perofeta. Na ou lagonaina e tatau ona ou tau atu ia te ia o le a ou mauaina fautuaga e le gata mo lo’u olaga nei ae faapena foi mo lo’u lumanai.
E mafai e le Atua ona fai vavega, ma na Ia faatoafilemuina loto o ou matua na mafai ai ona la tuu mai au ou te alu i le konafesi e aunoa ma le faasalaina. O se aafiaga maoae lenei i lou olaga. Na faamautinoa mai ai ia te au le moni o le mau, “Ma o le mana o le Agaga Paia e mafai ona [tatou] iloa ai le moni o mea uma lava” (Moronae 10:5).
Ou te iloa afai tatou te faavae a tatou amioga i aoaoga faavae o le talalelei ma faalogo i le Agaga, e mafai ona tatou fiafia ia tatou filifiliga. Ua faamalosia e lenei aafiaga la’u molimau o loo i ai le Atua iina mo i tatou ma e fesoasoani le Agaga Paia ia i tatou i o tatou olaga.