Pe Tatau Ona Ou Filifili le Galuega po o le Lotu?
Kenya Ishii, Iapani
Na ma faaipoipo ma lou toalua i le 1981 i le Malumalu o Tokyo i Iapani. Na le faigofie lo ma olaga ina ua maea le faaipoipoga i le taimi muamua. Sa ou faafetai na i ai se galuega, ae sa tau le fe’a’ua’uta’i le faasoa. Na ma fesili atu i le Tama Faalelagi mo Lana fesoasoani ma faia le mea sili ia ola ai ma totogi a ma’ua sefuluai. Na ma iloa afai ma te faalagolago i le Alii, o le a fesoasoani mai o Ia.
I se tasi vaiaso na aumai ai e lou toalua ma lau uo le fasipepa lava e tasi na ooti mai se nusipepa. O se faasalalauga mo se faiaoga tumau o le Igilisi.
Na ou auina atu faamatalaga o o’u tomai i le kamupani ma na valaauina au mo se faatalanoaga. I le faaiuga o le faatalanoaga, na fai mai ai le tamaloa, “Na e tusia i au faamatalaga na e auai i galuega volenitia o se faifeautalai mo Le Ekalesia a Iesu Keriso o le Au Paia o Aso e Gata Ai. O lona uiga la e te alu i le lotu i Aso Sa, a ea? Afai e te filifili pe alu i le lotu pe galue i Aso Sa, o le fea e te filifilia?”
O se fesili faigata tele ona sa ou manaomia se galuega sili atu. Ae ina ua maea ona ou mafaufau loloto, na ou tali atu, “O le a ou alu i le lotu.”
Faatasi ma se ataata faafoliga, na ia fai mai, “Oi, ua ou iloa.” Ona ia faamavae mai lea ia te au ma folafola mai o le a fai e le kamupani le filifiliga i lena afiafi ma e tatau ona ou valaau mai e iloa ai le faaiuga. Ao ou tuua le potu, na ou mafaufau ua ou le pasi.
Mulimuli ane i lena afiafi ina ua oo mai le taimi e valaau ai, na ou viliina le numera o le kamupani ma le fefe tele.
“O le a se faaiuga o le faatalanoaga?” Sa ou fesili ai i le failautusi. “Ou te le’i pasi, a ea?”
Na ou tei ae na fiafia i lana tali.
“Matou te mananao e talosagaina oe e te galue mo matou,” o lana tala lea.
Pe a ma se masina mulimuli ane na ou iloa ai le mafuaaga na ou maua ai le galuega. Na faamanino mai e le failautusi o le na faia le faatalanoaga e tuaoi ma faifeautalai faamisiona o le Au Paia o Aso e Gata Ai. E masani ona ia vaaia faifeautalai o vili vave ane a la uila i le la galuega i le taeao.
“E talitonu o ia o oe, e auai i le lotu lea e tasi, o le a galue malosi mo matou e pei ona galulue faifeautalai mo le la lotu,” o lana tala lea. “E laki oe!”
Mai lena taimi na maua lava e lo matou aiga mea na manaomia.
O taimi uma lava ou te mafaufau ai i lenei aafiaga faapitoa, e faamalosia ma faamafanafanaina ai au. Ou te iloa e masani ona faaaoga e le Atua isi tagata e faamanuia ai Lana fanau. E le lava au upu e faaali atu ai lau faafetai i lou toalua ma lau uo mo la la’ua musumusuga i le aumaia o lena faasalalauga i le nusipepa mo au, mo na faifeautalai galulue malosi ma le la faataitaiga maoae, ma mo lo tatou Tama Faalelagi agaalofa, alofa, agalelei, e ona le mana faavavega ua faapaiaina ai o matou aafiaga mo lo matou lelei.