Faafesootai e le Autalavou Pasila ia Talafaasolopito o Aiga, Galuega o le Malumalu
Sa matauina e José A. Moscão se faiga agai atu i ai: o le autalavou o e sa o mai i le Malumalu o Campinas Pasila sa latou maua se taimi tele “e nofonofo ma faatalitali ai.”
Sa silafia e Uso Moscão, o le faatonu o le nofoaga autu o talafaasolopito o aiga lea e le mamao lava mai le malumalu, ona o le mamao e tatau ona malaga atu ai le toatele o le autalavou ina ia oo atu i le malumalu, o le toatele lava na malaga atu i karaveni ma nonofo ai mo ni nai aso. O le taimi i le va o a latou sauniga i le potu mo papatisoga ma le taimi o taumafataga ma le faatalitali ai mo o latou matua ma taitai o e sa auai i isi sauniga o le malumalu sa le mafai ona alofia.
Ae atonu, o ona mafaufauga ia, e mafai ona ia ofoina atu i le autalavou se isi mea e ese mai nai lo le feofeoai i lotoa o le malumalu i taimi uma e maua ai o latou taimi avanoa.
O lea sa ia faia ai.
O Se Valaaulia
Sa amata ona ia valaaulia le autalavou i totonu o le nofoaga autu ma ofo atu e aoao i latou i le auala e fai ai le siiina mai o igoa i le FamilySearch.
O le taimi muamua sa matamumuli pe musua ia nisi. Ae fai mai Uso Moscão ina ua ia talanoa atu ia i latou e uiga i le laveaiina o tagata mai le pouliuli ae aumai o latou igoa i le malamalama i le usiusitai i saunoaga a perofeta soifua, sa faapea ona ootia ai le autalavou (tagai i le David A. Bednar, “O Le a Liliu Atu Loto o Fanau,” Liahona ma le Ensign, Nov. 2011, 24–27).
O le i ai faatasi o le malumalu ma le nofoaga autu o talafaasolopito o aiga i totonu o le laufanua e tasi e taua lea; e faamamafaina ai se auala faaletino e faapea o le malumalu ma le galuega o talafaasolopito o aiga o ni vaega se lua o se taumafaiga maoae e tasi. O lena mea, na saunoa ai George A. Oakes, o le peresitene o le Malumalu o Campinas Pasila, o se mea lea ua iloa e le autalavou o loo aofia ai i le itu o le malumalu.
Fai mai a ia, “E muamua atu i le faamamafa o le faaaofia o i latou i talafaasolopito o aiga ma le siiina o igoa, o le malaga atu i le malumalu sa faaautu lava i le faamoemoega o le papatisoina mo e ua maliliu. Ae o le taimi nei o le aafiaga i le siiina mai o igoa ua avea ma se vaega o la latou galuega.”
O Se Faailoaga
A o mai le autalavou i le nofoaga autu, e faailoa atu e Uso Moscão ma faifeautalai e volenitia i le nofoaga autu ia mataupu faavae nei i le taimi o se aoaoga faasamasamanoa faamasani puupuu.
-
E avea i latou ma faaola i le mauga o Siona (tagai i le Opetaia 1:21).
-
Latou te usitai atu i le valaau a se perofeta (tagai i le “O Le a Liliu Atu Loto o Fanau”).
-
Latou te laveai mai tagata mai le pouliuli—o le pogisa o ata ua leva ona galo ma tusi ua pefua a ofisa o lesitala ma ekalesia. O le siiina mai o igoa e aumai ai na igoa i le malamalama ma faigofie ai ona sue ina ia mafai e o latou aiga ona maua i latou.
-
I le auai ai i lenei galuega, o le a latou auai i se isi vaega o le “mataupu sili ona mamalu o mataupu uma o le talalelei tumau-faavavau, ua ta’ua o le papatisoga mo e ua maliliu” (MF&F 128:17).
-
O le a latou faaaogaina o latou igoa i le galuega silisili o le faaolaina o e ua maliliu, lea e manuia ai aiga.
-
O i tatou uma o se vaega o le aiga o le Atua, o lea la o le siiina mai o igoa o tagata latou te le iloa, o loo latou fesoasoani ai lava i o latou aiga.
-
O le taimi lava latou te malamalama ai i le ala e auai ai i le siiina mai o igoa, latou te maua se avanoa e aoao ai tagata o o latou aiga ma isi tagata talavou i o latou uarota ma paranesi e auai ai foi.
Ona faaaoga lea e Uso Moscão ma faifeautalai ia komepiuta a le nofoaga autu e faasino atu ai i le autalavou le ala e amata ai le siiina mai o igoa ma le ala e faaaoga ai le polokalama komepiuta pe a latou taunuu i o latou aiga. O le taimi lava latou te malamalama ai, fai mai Uso Moscão, latou te “amata sii mai ai i se malosi e le mafaatusalia.”
O Se Naunautaiga mo le Galuega
O le numera [o talavou] ua atagia ai lena naunautaiga. I masina muamua e lua o le 2012, sa sii mai ai e tagata asiasi ia igoa e 6,370; o le 3,305 o na igoa sa siiina mai e talavou o le vaitausaga 12 i le 18. O le mea moni, ina ia taulimaina le faateleina o le fiafia o tagata i le siiina mai o igoa, o lea e masani ai ona faaumiumi ona tatala itula o le nofoaga autu i Campinas mo talafaasolopito o aiga mai itula masani o le 8:00 a.m. i le 6:00 p.m. ae ua tatala ai lava seia oo i le 10:00 p.m.
Ae e le o tuua e le autalavou le siiina mai o igoa pe a latou tuua le malumalu. A latou oo atu i aiga, e faaauau pea o latou tiute i le mea na ta’ua e Uso Moscão “o le autau e silia ma le 170,000 o le au sii igoa a le Ekalesia i aso nei.” O le toatele ua ausia ai sini mo le Tiute i le Atua ma le Alualu i Luma o le Tagata Lava Ia i a latou galuega o le siiina mai o igoa.
O Se Faatosinaga mo le Lelei
I le amataga o le tausaga lenei, sa malaga atu ai Isabela A., e 16 tausaga, o Vila Velha, Espírito Santo, Pasila, ma lona tina ma lona uso i le malumalu; o le aso mulimuli o le malaga na atoa i ai le tausaga e tasi talu ona maliu lona tinamatua. Sa papatisoina Isabela mo lona tinamatua, ae sa fai e lona tina isi sauniga o le malumalu mo ia.
“Sa ou lagonaina i le taimi o le malaga lenei, sa manaomia ona ou faia se mea lelei,” o le tala mai lea a Isabela. “Sa ou manao ia ou iloa ona sii mai igoa, ma sa ou maua le fesoasoani mai ia Uso José Moscão.
“Ma, ina ua ou papatiso mo lo’u tinamatua, sa o’oo’o le pai mai o le Agaga ia te a’u. Sa ou iloaina sa toatele tagata malolosi o loo i tua atu o le veli o loo faatalitali mai lava, ma latou te manaomia la’u fesoasoani. Sa ou iloaina e mafai ona ou tuuina atu se vaega itiiti o lo’u taimi e auauna atu ai ma e mafai ona ou faia ni mea se tele mo nei tagata. O le siiina mai o igoa o se galuega o le alofa.”
I le taimi o malaga i le malumalu, e auai le autalavou o le itu o le Malumalu o Campinas Pasila i le siiina mai o igoa a le FamilySearch i le va o sauniga papatisoga.
Ata na pueina e José A. Moscão