Vagalalataki ni iVola ni Vula Me Baleta na Koniferedi
Kevaka ena sega soti ni vakaosoti tu ena vuqa na itaviqaravi na noda gauna, eda na rawa ni vakila vakalevu cake sara na Yalotabu ena noda vakarorogo ena koniferedi raraba.
Ena veiyabaki sa oti ni ratou se lalai na luvei keirau, keirau a vakadeitaka me na dau vakaibalebale vei keitou na koniferedi raraba. Keitou veivosakitaka na bibi ni kena saravi na koniferedi ena vakasama e galala kei na yago e vakacegui vakavinaka. Sa gauna bibi na gauna ni koniferedi meda rogoca kina na ivakasala mai vua na parofita nikua. Keitou sa qai lalawataka me kakua tale ni dua na ka me caka ena vica na siga ni bera na koniferedi se ena gauna ni koniferedi. Sa vagalalataki sara ga na veisiga oqori mai na neitou ituvatuva, ka keitou sa dui navuca me kakua ni dua na ka me caka ena gauna oqori.
Kevaka mo na cakava vaka oqori, ena vinaka sara kina nomu matavuvale, ia na neitou matavuvale keitou tukuna ni” itaviqaravi” tale e so oqo me caka e wili kina na, soqo ni koronivuli, nodra dau lako mai na gone mai tuba ka mai qito e vale, qaravi ni soqo kei ira na itokani ena taudaku ni matavuvale, caka soqo vata kei ra na itokani se matavuvale, sasamaki e tautuba ni vale ena gauna ni koniferedi, qaravi ni cakacaka ni vuli ena iotioti ni miniti, kei na kena dau ciqomi na cakacaka mai vanua ni cakacaka.
Ni qai yaco mai na iotioti ni macawa ni bera na koniferedi, sa vaka e dau dredre me tukuni na sega kina itaviqaravi vakaoqori, ia ena levu sara na gauna meratou na digitaka na ka dodonu na lewe ni matavuvale me rawati kina na neitou lalawa. Keirau raica ni o iratou na luvei keirau gonelalai eratou sa dau vinakata sara ga na vakarorogo kina koniferedi. Au nanuma rawa o ya baleta ni keitou dau veitalanoataka sara ga na bibi ni koniferedi ena macawa ni bera na koniferedi.
Au marau meu tukuna ni kena rawarawa neitou ituvatuva ni bera na koniferedi kei na gauna ni koniferedi sa veisautaka sara ga na veika sa mai sotava tu oqo na neitou matavuvale. Sa vakarautaki sara ga na neitou vakasama kei na yaloi keitou kina koniferedi. Sa sega ni qai vakaosoosotaki tale na neitou ituvatuva ena so na itaviqaravi, ka sa rawa me keitou vakila na Yalotabu ni keitou dabe ka rogoca na ivakasala mai vei ira na noda iliuliu.
Keitou sa vakadeitaka saraga na ituvatuva oqo ena veikoniferedi kece sara baleta ni sa dau mai vakasinaiti na neitou matavuvale ena vakacegu. Dina ga ni levu vei ira na luvei keirau era sa sega ni tu e vale, keirau vakauqeti ira tikoga me ra vagalalataka tiko na macawa ni bera na koniferedi kei na gauna ni koniferedi me vaka ga e a dau caka tu mai vale. Keitou a tuvalaka talega e dua na gauna me keitou sarava vata kina vakamatavuvale edua na soqoni ni koniferedi. Au sa vakanuinui ni o iratou na luvei keirau, eratou na vakawatini ka vakaluveni, ia era na laki tomana tiko na kena vakabibitaki na gauna ni koniferedi ka vagalalataki ira kina.
Veitaba mai vei Sarah Jenson