Kaitiakan Ara Karenta ibukin te Maungatabu
Ngkai ara tai e aki mangao ma botaki ni kukurei aika a raka, ti kona n namakina te Tamnei riki ngkai ti ongoraa ni maungatabu ni kabuta.
Ririki aika a nako, ngke a uarereke natira ake onoman, ti iangoia bwa ti karekea te maungatabu bwa te bwai ae na nang kakawaki nakoira. Ti maroroakina kakawakin matakuakinan te maungatabu ma te iango ae e itiaki ao te rabwata ae motirawa raoi. Te maungatabu te tai ae kakawaki ibukin karekean reirei mairouia ara burabeti aika ngkai. Ngaia are e kawenei ara kouru n aki karaoi riki bwaai tabeua imwaain te maungatabu ke n te motirawa n te maungatabu. Ti na tuki boong akanne iaon ara karenta, ao ngaira n tatabemanira ti na motinnanoia bwa ti na aki karaoi riki waki ni kakukurei inanon boong akanne.
Ngkana ko rineia bwa ko na karaoa te waki ae titebo ma anne, e na bon onoti arona nakoia am utu ao am kanganga, ma ara utu e kabwarabwara “waki riki ni kakukurei” n aron iran ana waki ni kakukurei te reirei, tao n rokoia ataein rarikira, ni karaoi bwaai ma raraoia n raroa man te auti, karaoan te bobotaki ke te katairiki ke kain te utu, karaon mwakuri aika bubura ke te mwakuri irarikin te auti imarenan ke n tain te maungatabu, katukan bwaai n reirei nakon te kabanean tai, ao kariaiakan karaoan mwakuri riki n te tai ni mwakuri.
Inanon te wiki imwaain rokon te maungatabu, n tabetai e kanganga n taekinaki bwa e tau karaoan botaki ni kakukurei aikai, ma angin ara tai kain ara utu a kaungaira bwa ti na karaoa te rinerine ae tamaroa ni karokoira n ara kouru. Ti kunea bwa ara ataei ake a uarereke a tangiria ni kan riki bwa ngaia naba kain te maungatabu ni kabuta. I angoia bwa bukina ngkai ti maroro iaon kakawakin te maungatabu n taainako rinanon te wikente mai mwaaina.
I kukurei n ribotinna bwa kawakinan ara tai n ae bebete imwaain ao n tain te maungatabu e kona ni bita aron ara namakin n ara te utu. Nanora ao ara iango a na tauraoi imwaain te maungatabu. Ara tai e na aki mangao ma botaki riki ni kakukurei tabeua, n te aro bwa ti na kona n namakina te Tamnei ngkai ti tekateka ao n ongora nakon taekan n reirei mai irouia ara taan kairiri.
Ti reitinako ni kakoroa ara kouru man te maungatabu teuana nakon teuana ibukina bwa e kaona mweengara n te rau. E ngae ngke tabeman ara ataei aikoa manga mena ni mweengara, ti kaungaia bwa riai n teimatoa ni kaitiaka aia karenta tabeua te bong imwaain te maungatabu, ngkai ti karaoia ni mweengara. Ti kataia naba ni katauraoa ara tai ni mataku n tetetere ni kabaneia ara utu. Au kantaninga bwa ngkana a mare ara ataei ao ni karekei bon oin natiia, a na bon reitinako ni kaota aron kakawakin kateimatoan te namakin are a karekea man kaitiakan aia karenta.
Tamnei iroun Sarah Jenson