Faaavanoa a Tatou Kalena mo le Konafesi
Talu ai o lo matou vaitaimi e lei i ai ni gaoioiga faaopoopo e fenumiai ai, o lea sa mafai ai ona matou lagonaina atili le Agaga pe a matou faalogologo i le konafesi aoao.
I tausaga ua mavae, ao laiti le ma fanau e toaono, sa matou filifili ai matou te fia mananao ia avea le konafesi aoao ma se mea e sili ona taua ia i matou. Sa matou talanoa e uiga i le taua o le matamata i le konafesi ma ni mafaufau manino ma ni tino maloloina. O le konafesi o se taimi taua lea e maua mai ai ni aoaoga mai o tatou perofeta o i ai nei. O lea sa matou faatuina ai se sini ia aua nei fuafuaina se mea mo ni nai aso ao lei faia le konafesi po o le faaiuga foi o le vaiaso lea e faia ai le konafesi. Sa matou polokaina na aso i la matou kalena, ma sa taitasi ma matou tautino ia aua nei faia nisi gaoioiga i na aso.
Afai e te filifili e faaaoga lea auala e tasi, o le a avea ma se mea fou i lou aiga faapea ma ou tulaga, peitai o “gaoioiga faaopoopo” lea e patino lava i o tatou aiga e pei o le auai i gaoioiga a le aoga, asiasi mai o tamaiti o le tuaoi, faifai mea faatasi ma uo i se nofoaga e ese mai le fale, pati pe fai ‘aiga ma uo po o tagata o le aiga, faia o ni galuega faatino po o le galulue i le fanua i le va po o le taimi foi o sauniga o le konafesi, tuu o galuega faatino o le aoga e fai i le taimi mulimuli, ma le taliaina o ni tiute faaopoopo o le galuega.
Pe a oo i le vaiaso ao lumanai le konafesi aoao, e faigata i nisi taimi ona fai atu leai i nei gaoioiga, peitai o le tele lava o le taimi e faia ai ma le fiafia e tagata o le aiga ni filifiliga sao ina ia ausia la tatou sini. Sa matou iloa e mananao a tatou fanau iti ina ia avea ma se vaega o le konafesi aoao. Ou te manatu ona sa matou talanoa pea lava pea e uiga i le taua o le konafesi i le aluga o le vaiaso ao lumanai le konafesi.
Ou te fiafia e tau atu o le faafaigofieina o le faatulagaina o o matou aso ao lei faia pe ua faagasolo foi le konafesi aoao na suia atoa ai lava ia lagona o lo matou aiga. Na saunia o matou loto ma mafaufau mo le konafesi. E lei lofituina o matou taimi i nisi gaoioiga faaopoopo, ma sa mafai ona matou lagonaina le Agaga ao matou saofafai ma faalogologo atu i upu o fautuaga mai o tatou taitai.
Sa faaauau pea le matou sini o le konafesi ina ua mavae le konafesi aua ua faatumulia ai lo matou fale i le filemu. E ui o le toatele o le ma fanau e le o toe nonofo i le aiga, ae ma te uunaia pea i latou ina ia faaavanoa a latou kalena i nai aso ao lumanai pe ua faagasolo foi le konafesi, e pei ona matou faia i le fale. Matou te taumafai foi ina ia seti se taimi matou te matamata faatasi ai o se aiga atoa se sauniga o le konafesi. Ou te faamoemoe faapea afai e faaipoipo le ma fanau ma maua ni a latou lava fanau, o le a latou faaauau pea ona tuuina i se tulaga taua maualuga o le malupuipuia o o latou aafiaga o le konafesi e ala i le faaavanoaina o a latou kalena.
Ata na pueina e Sarah Jenson