Ko Hono Fakaʻataʻatā ʻEtau Tohimāhiná ki he Konifelenisí
Neongo naʻe ʻikai ke femoʻuekina homau taimí ʻi ha ngaahi ʻekitivitī lahi, ka ne mau lava ʻo ongoʻi lahi ange e Laumālié ʻi heʻemau fanongo ki he konifelenisi lahí.
ʻI he taimi ne kei iiki ai ʻema fānaú ʻi he ngaahi taʻu kuo hilí, ne ma pehē ke ʻai ke mahuʻinga mālie ange ʻa e konifelenisi lahí kiate kimautolu. Ne mau talanoa ki hono mahuʻinga ʻo e mamata he konifelenisí ʻaki ha ʻatamai tauʻatāina mo ha sino kuo mālōlō leleí. Ko e konifelenisí ko ha taimi mahuʻinga ia ke maʻu ai ha fakahinohino mei hotau kau palōfita lolotongá. Ko ia ne mau fokotuʻu leva ha taumuʻa, ʻo ʻikai palani ha meʻa lahi ki he ngaahi ʻaho siʻi kimuʻa he konifelenisí pe lolotonga e fakaʻosinga e uike ʻo e konifelenisí. Ne mau fakaʻilongaʻi e ngaahi ʻaho ko iá ʻi heʻemau tohimāhiná, pea ne mau takitaha tukupā ke ʻoua ʻe fokotuʻutuʻu ha ngaahi ʻekitivitī lahi ʻi he ngaahi ʻaho ko iá.
Kapau te ke fili ke fai ha meʻa tatau, ʻe makehe ia ki ho fāmilí mo ho tūkungá, ka naʻe fakaʻuhingaʻi ʻe homau fāmilí ʻa e “ngaahi ʻekitivitī lahí” ko e ʻalu ki he ngaahi ʻekitivitī fakaakó, ʻeva mai e fānau ʻa e kaungāʻapí, fai ha ngaahi meʻa mo e ngaahi kaungāmeʻá mavahe mei ʻapi, fai ha ngaahi meʻa fakafiefia pe kai efiafi mo e ngaahi kaungāmeʻá pe kāingá, fai ha ngaahi ngāue pe ngāue ʻi he ngoué ʻi he vahaʻa pe lolotonga e ngaahi fakataha konifelenisí, toki fai e ngaahi ngāue fakaakó ʻi he momeniti fakaʻosí, mo hono tali ha ngaahi ngāue kehe kuo vahe mai he ngāueʻangá.
ʻI he uike kimuʻa he konifelenisi lahí, naʻe faingataʻa he taimi ʻe niʻihi ke fakasītuʻaʻi e ngaahi ʻekitivitī ko ʻení, ka ko e taimi lahi naʻe fakahoko fiefia ʻe he kau mēmipa homau fāmilí ʻa e ngaahi fili totonu ke aʻusia ai ʻemau taumuʻá. Ne ma ʻilo ne fie maʻu ʻe heʻema fānau iiki angé ke nau kau ki he konifelenisí. Te u pehē naʻe hoko ʻeni he ne mau toutou talanoa kau ki he mahuʻinga ʻo e konifelenisí ʻi he kotoa ʻo e uike kimuʻá.
ʻOku ou fiefia ke fakahā atu naʻe liliu fakaʻaufuli e meʻa ne foua ʻe homau fāmilí ʻi hono tauhi ko ia ʻemau taimi-tēpilé ke faingofua ʻi he ngaahi ʻaho kimuʻa mo e lolotonga ʻo e konifelenisi lahí. Naʻe mateuteu homau lotó mo homau ʻatamaí ki he konifelenisí. Ne ʻikai ke femoʻuekina homau taimí ʻi ha ngaahi ʻekitivitī lahi, ko ia ne lava ke mau ongoʻi ʻa e Laumālié ʻi heʻemau tangutu mo fanongo ki he ngaahi akonaki mei hotau kau takí.
Kuo mau faipau ki heʻemau taumuʻá mei he konifelenisi ki he konifelenisi koeʻuhí he ʻokú ne fakafonu homau ʻapí ʻaki e melinó. Neongo kuo ʻikai ke kei nofo ha tokolahi ʻema fānaú ʻi ʻapi, ka ʻokú ma poupouʻi kinautolu ke kei fakaʻataʻatā ʻenau tohimāhiná he ngaahi ʻaho kimuʻa mo e lolotonga e konifelenisí, ʻo hangē ko ia ʻoku mau fai ʻi ʻapí. ʻOku mau feinga foki ke fokotuʻu ha taimi ke mau mamata fakataha ai ko ha fāmili kakato ʻi ha fakataha ʻo e konifelenisí. ʻOku ou ʻamanaki ko e taimi ʻe mali ai ʻema fānaú mo ʻi ai haʻanau fānaú, te nau hokohoko atu ke fakamahuʻingaʻi lahi hono pukepuke ʻenau aʻusia fakakonifelenisí ʻaki hono fakaʻataʻatā ʻenau ngaahi tohimāhiná.
Faitaaʻi ʻe Sarah Jenson