Savali a le Au Peresitene Sili
O Le Ki e Tasi i se Aiga Fiafia
Sa amataina e le tusitala Rusia maoae o Leo Tolstoy lana tusi Anna Karenina i upu nei: “O aiga fiafia e tutusa uma lava; o aiga faanoanoa e eseese uma ia mafuaaga.”1 E ui ou te le o mautinoa pe moni le faamatalaga a Tolstoy e tutusa uma ia aiga fiafia, ae ua ou iloaina le mea e tasi e tutusa uma ai le toatele: o le auala latou te faamagalo ma faagalo ai ia ni faaletonu o isi ma vaavaai atu mo le lelei.
Ma le isi mea, o i latou ia e o mai mai aiga ia e le fiafia, e matele lava i le sailiili masei, i ai ni lagona ita, ma e le mafai ona faagaloina ni mea sese ua tuanai.
“Ioe, ae …” o tala amata ia a i latou o e le fiafia. “Ioe, ae e te le o iloaina lona faatiga tele ia te au,” o le tala lea a se tasi. “Ioe, ae e te le iloaina lona matautia,” o le tala mai lea a le isi.
Atonu e sao uma lava; atonu foi e le sao.
E tele ni ituaiga solitulafono. E tele ni ituaiga tiga. Peitai o le mea ua ou matauina, o le tele o taimi tatou te fetuunai ai mea tatou te feita ai ma faamalie o tatou mafaufau e ala i le faamatalaina ia i tatou lava o ni tala e uiga i faamoemoega o isi ma tauleaga a latou galuega faapea e le loto faamagalo ma manatu faapito ae, i lena lava taimi e tasi, e siitia o tatou lava faamoemoega e foliga mai e mama ma lē pisipisia.
O Le Taifau a le Perenise
E i ai se tala anamua mai Uelese mai le seneturi lona 13 e faatatau i se perenise o le na toe foi mai i le aiga ma maua ai o loo tafe toto foliga o lana taifau. Sa faataalise atu i totonu le tamaloa, ma i lona popole, sa ia iloa ai o loo misi lona atalii pepe ma o loo fao i lalo lona moega pepe. Sa sei i fafo e le perenise lana pelu i lona ita ma tape ai lana taifau. E lei leva, ae ia faalogoina le tagi mai o lona atalii—o loo ola le pepe! Ae o autafa o le pepe o loo taatia ai se luko ua pe. O le mea moni lava, sa puipui e le taifau le pepe a le perenise mai se luko feai.
E ui ina matautia lenei tala, ae o loo faapupula mai ai se manatu. E tatala ai le avanoa atonu o faamatalaga ia tatou te tauina ia i tatou lava i mafuaaga e ese ai foi uiga o isi ma e le faapea o le a ogatasi lava ma mea moni—o nisi foi taimi tatou te le fia iloaina lava le mea moni. E sili ai lo tatou lagona tauamiotonuina pe a tatou feita e ala i le taofiofi pea o lo tatou le fiafia ma le tetee. O nisi taimi e silia ma ni masina po o ni tausaga foi o i ai nei lagona le fiafia. O nisi foi taimi e tumau ai lava i le olaga atoa.
O Se Aiga ua Vaeluaina
Sa le mafai e se tasi tama ona faamagaloina lona atalii mai le aluese mai le auala sa aoaoina ai o ia. Sa i ai ni uo a le tama e le fiafia i ai le tamā, ma e tele ni mea sa ia faia e ese mai mea sa mafaufau le tamā e tatau ona ia faia. O lea sa tupu ai se feeseesega i le va o le tamā ma le atalii, ma o le taimi lava na mafai ai e le atalii, sa ia aluese ai loa mai lona aiga ma e lei toe foi mai lava. E seasea lava ona la toe talanoa.
Pe na manatu le tamā ua tauamiotonuina o ia? Atonu.
Pe na manatu le atalii ua tauamiotonuina o ia? Atonu.
Pau lava le mea sa ou iloa o lenei aiga sa vaeluaina ma ua faanoanoa ona e lei faamagaloina e le tama le atalii po o le atalii foi i le tama. Sa le mafai ona la faasopoloaina le manatua o mea sa le fiafia ai le tasi i le isi. Sa faatumuina o laua loto i le ita nai lo le alofa ma le faamagalo atu. Sa taofia e le tagata lava ia lona avanoa e faia ai se lelei i olaga o isi. O le feeseeseaiga i lo la va sa matuai loloto lava ma lautele ma sa faapagotaina faaleagaga ai le tagata lava ia i lona lava motu o faalogoga.
O le mea e sili ai, sa saunia e lo tatou Tama o i le Lagi Faavavau e alofa ma atamai ni auala e foia ai lenei va faasausili. O le Togiola le iu ma le maoae o se faatinoga aupito sili lea o le faamagaloga ma le toe faaleleiga. O lona taunuuga e le oo i ai lo’u malamalama, peitai ou te molimau atu ma lo’u loto atoa ma lo’u agaga atoa e uiga i le moni ma le malosi sili. Sa ofoina atu e le Faaola o Ia lava e totogi ai a tatou agasala. E ala mai ia te Ia ua tatou maua ai le faamagaloga.
E Leai se Aiga e Atoatoa
E leai se tasi o i tatou e leai se agasala. Tatou te faia uma lava ni mea sese, e aofia ai oe ma a’u. Sa faamanualiaina uma lava i tatou. Sa tatou faamanualiaina uma foi isi.
Ua mafai ona faaeaina i tatou ma maua le ola faavavau ona o le taulaga a lo tatou Faaola. Afai tatou te talia Ona ala ma aveese lo tatou faamaualuga e ala i le faamaluluina o o tatou loto, o le a tatou aumaia le malamalama ma le faamagaloga i totonu o tatou aiga faapea foi o tatou lava olaga. O le a fesoasoani mai le Atua ina ia faateleina lo tatou loto faamagalo, ma ia maua le loto malie e savali i maila e lua, ina ia e muai faatoese atu e tusa lava pe le o oe sa sese, ma ia aluese mai ni feeseeseaiga tuai ma aua nei toe manatuaina. Faafetai i le Atua, o le sa auina mai Lona Alo e Toatasi na Fanaua, ma le Alo, o le sa tuuina mai Lona ola mo i tatou.
Tatou te lagona i aso uma le alofa o le Atua mo i tatou. Pe le tatau ea ona tatou tuuina atu sina vaega itiiti o i tatou lava mo o tatou uso a tagata e pei ona aoaoina mai i le pese “Ona ua Maua Tele”?2 Ua tatalaina e le Alii le faitotoa ina ia faamagaloina i tatou. Pe le o le mea sao ea o le tuu ese o o tatou lava manatu ma lagona faamaualuluga ae ia amata ona tatala atu le faitotoa o le faamagaloga mo i latou ia o loo tatou tauivi—aemaise lava i tagata uma o o tatou lava aiga?
O le iuga, e le tupu le fiafia mai le tulaga atoatoa ae mai le faaaogaina o mataupu faavae paia, e tusa lava pe o ni laa laiti. Sa folasia mai e le Au Peresitene Sili ma le Korama a Aposetolo e Toasefululua faapea: “E maua le fiafia i le olaga faaleaiga pe a faavae i aoaoga a le Alii o Iesu Keriso.” O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.3
O le faamagaloga ua faatulagaina tonu lava i le ogatotonu o nei upumoni faigofie, ma o loo maua i le fuafuaga o le fiafia a lo tatou Tama Faalelagi. Ona o mataupu faavae e fesootai ma le faamagaloga, e fesootai ai foi ma tagata. O se ki, e tatalaina ia faitotoa o loo loka, o se amataga o se ala faamaoni, ma o se tasi o o tatou faamoemoega sili mo se aiga fiafia.
Tau ina ia fesoasoani mai le Atua ia i tatou ina ia maua atili le loto faamagalo i totonu o o tatou aiga, faamagalo atili atu i isi, ma faamagalo atili i tatou lava. Ou te tatalo ina ia tatou lagona o le loto faamagalo o se tasi lea o auala matagofie e tutusa ai le tele o aiga fiafia.
Aoao Atu mai Lenei Savali
“Ao e saunia ia lesona taitasi, ia e fesili ifo ia te oe lava pe faapefea ona avea se mataupu faavae e pei o se mea na oo i olaga o tagata o le aiga” (O Le Aoao Atu, E Leai Se Isi Valaauga e Sili Ai [1999], 180). Mafaufau e valaaulia tagata o le aiga e faasoa mai ni lagona lelei sa latou maua pe na matauina foi e uiga i le loto faamagalo. Talatalanoa e uiga i nei aafiaga, ma faamamafa atu ia faamanuiaga o le loto faamagalo. Faaiu i le tuuina atu o se molimau i le taua o le fefaamagaloai o le tasi ma le isi.
Ata na saunia e David Stoker