Na Ka Eda Vakabauta

Bula Manini ena Vakarautaki Keda kina Veimataka

Na Yalododonu Edaidai e vakabauta na vakavakarau kei na bula-rawati koya. Eda vakabauta na vakavakarau ena vuli baleta na cakacaka, vakavakarau vakailavo baleta na leqa vakasauri, kei na vakavakarautaki ni bula baleta na leqa tubukoso se so tale na dredre e yaco mai. Na kena e bibi duadua, eda vakabauta na vakavakarau vakayalo baleta na iKarua ni Lesumai i Jisu Karisito, kei na laki bula vata tale kei na Tamada Vakalomalagi. Na ilakolako ni vakavakarau vakaoqo e vakatokai na bula manini.

Na maninitaki ni bula e vakaraitaka na noda ivakarau dina ni bula e vakalou: ka ni ra “na lewa na ka mera kitaka ka sega ni vakasaurarataki vei ira” (2 Nifai 2:26). Na Turaga e vinakata meda tudei ka lewai keda vaka ikeda (raica na V&V 78:14). O Koya e vinakata meda bula manini baleta na vanua eda na laki yacova ena noda bula: bula vakaivakarau, yaloyalovinaka, yalomatua, dauloloma. Na levu ni noda bula rawati keda, na levu ni noda rawa ni vukei ira na noda matavuvale kei ira eso. Eda na vakani ira vakacava na viakana kevaka meda viakana tiko mada ga o keda? Eda na wasea vakacava na vuku kevaka meda lecaika tiko mada ga o keda? Eda na tara cake vakacava na nodra vakabauta eso kevaka e lailai tu na noda vakabauta?

Na ivakavuvuli ni bula manini e wili kina na veika oqo:

• Vakavakarau. “Dou vakarau, dou vakarautaki kemudou ki na veika ena yaco, raica sa voleka ni lako mai na Turaga” (V&V 1:12).

• Daucakacaka. “Dou kakua ni vucesa” (V&V 42:42).

• “Dou gumatua sara mo dou kila ka, io ena vuli kei na vakabauta” (V&V 88:118).

Ni ra sa saga na lewe ni Lotu mera bula rawati ira, ia era sega tikoga ni sotava na nodra gagadre, mera na laki kerekere mada e liu vei ira na lewe ni nodra matavuvale. Kevaka e sega tiko ga ni rawa sa na qai veivuke na Lotu. O ira na bisopi kei na peresitedi ni tabana, e rawa ni ra vakayagataka na veivuke mai “na lololo ni Turaga” me vukei ira na lewenilotu (raica na V&V 82:18–19). Ni dua na veivuke e ciqomi mai na Lotu, e kena inaki me vukei ira na lewenilotu mera vukei ira vakataki ira, ka vakauqeta mera vaqara cakacaka.

E rawa ni da cakacaka meda bula rawati keda ena veivanua vakaoqo:

• Qaqaco vakayalo: Vakararavi vua na Turaga; talairawarawa kina ivunau; masu ka vulica na ivolanikalou ena veisiga; veiqaravi vei ira na tani.

• Bulabula Vakayago: Talairawarawa kina Vosa ni Vuku; vakaukauwa yago; moce ena kena gauna; bulataka na bula savasava kei na tiko bulabula.

• Vuli: Sasaga mo vuli vinaka; rawata na kila vakacakacaka; vuli mai na “ivola vivinaka” (V&V 88:118).

• Cakacaka: Cakacaka mo rawa ni qaravi iko kei ira na nomu matavuvale.

• Maroroi Kakana e Vale: Maroroya e so na wainigunu savasava kei na lololo ni kakana ko dou dau kania wasoma, kei na so me baleta na veigauna dredre me vaka na raisi kei na bini.

• Bula Vakailavo: Sauma nomu ikatini kei na ilavo ni lolo, kakua soti na dinau, tekivu binia e dua na umailavo.

Baleta e so tale na kena itukutuku, raica na Ai Vakatekivu 41; V&V 38:30.

“Sa noda icolacola meda vakarautaka na veika me baleti keda kei na noda matavuvale ena bula vakayago kei na bula vakayalo. Meda bula rawati keda, sa dodonu meda bulataka na ivakavuvuli ni bula manini, bula toka ga ena veika ko sa rawata tiko, vakavinavinaka ena ka eda sa bau rawata toka, kua soti na dinau, ka sasaga mo maroroi ilavo me baleta na veisiga ca ka dau yaco vakasauri.”

Elder Robert D. Hales ena Kuoramu ni iApositolo Le Tinikarua, “Meda Dauveiqaravi ena Veika Yaga ni Bula Vakayago ka Vakayalo,” Liaona, Me 2009, 8.

Saumi Taro

E so beka era na vakananuma ni o ira na Yalododonu Edaidai era dau bulu kakana. Na kena dina, ni o keda eda dau maroroi kakana kei na wai baleta na gauna e leqa kina na kakana kei na wai savasava ni gunu se ena gauna e leqa kina na bula vakailavo. Ena gauna ni leqa tubukoso, o ira era sa maroroi kakana tiko era na yalodei tu, ka rawa ni ra vukei ira na nodra matavuvale kei na nodra itokani ena gauna ni leqa.

Mai na imawi: Na iKarua ni Lesumai, mai vei Grant Romney Clawson © IRI; taba ivakaraitaki mai vei Craig Dimond, Christina Smith, John Luke, kei Robert Casey © IRI; itaba ni jeri mai vei David Stoker © 2008