Dan Jones (1810–62)

Ua silia ma le tasi le miliona faifeautalai ua valaauina talu mai le faatulagaga o le Ekalesia, peitai o Dan Jones na sili atu nai lo le toatasi i se miliona. O le faifeautalai mai Uelese, na saunoa ai Peresitene Gordon B. Hinckley (1910–2008) e faapea, “I le itu e uiga i le aofai o tagata liliu mai, e tatau lava ona aofia ai Dan Jones i faifeautalai e toaono pe a e sili ona faamanuiaina a latou taumafaiga i le talafaasolopito o le Ekalesia.”¹

A o le’i avea o ia ma se faifeautalai, sa malaga ese mai Dan mai Uelese ma agai atu i le Iunaite Setete ma faigaluega ai i le Vaitafe o le Misisipi o se kapeteni i se vaa kalasini na faaigoa o le Maid of Iowa, lea na aumaia le toatele o le Au Paia o Aso e Gata Ai i Navu, Ilinoi. Na auai o ia i le Ekalesia i le 1843 ma sa avea ma se uo mamae a le Perofeta o Iosefa Samita.

O le misiona a Dan na faataunuuina ai le valoaga mulimuli na tusia e Iosefa Samita. O le po ao lumanai le fasiotiga o le Perofeta o Iosefa Samita, sa ia faalogo ai i le papa o fana i fafo atu o le faamalama o le Falepuipui o Karefasi, o lea na ia filifili ai e moe i luga o le fola. Sa i ona autafa ia Dan Jones. Sa fesili le Perofeta ia Dan pe fefe o ia e oti. Na ia tali atu, “E te manatu, ua oo mai lena taimi? I le i ai i se faamoemoega faapena, e leai so’u manatu e toatele nisi e fefefe i le oti.” Ona vavalo atu lea o Iosefa, “O le a e toe vaai ia Uelese, ma faataunuu le misiona ua tofia i ai oe ae e te lei oti.”²

Na faataunuuina le folafolaga a le Perofeta i le 1845, ina ua tofia Dan ma lona faletua o, Jane, e auauna atu i Uelese. Sa faaaoga e Dan lana taleni o le failauga e aoao atu ai le talalelei ma le talitonuga maumaututu. Sa lelei lana tautala i le gagana Uelese ma le Peretania, ma sa tusia e ni molimau e faapea, sa susua lana tautala o lea na mafai ai ona ia faagauai atu lana au faalogologo i ia gagana e lua mo le tele o itula.

Ao i ai Dan i Uelese, sa ia lolomiina ni mekasini, tamaitusi, ma tusi a le Au Paia o Aso e Gata Ai i le gagana Uelese. I lalo o le taitaiga a Dan Jones, sa faatuina ai e faifeautalai ni paranesi se 29 ma papatisoina le toeitiiti 1,000 o tagata i tausaga taitasi o lana misiona muamua. Sa valaauina o ia i se misiona lona lua i Uelese i le 1852, ma e ui i le faatupulaia o le sauaina o le Ekalesia, ae pe tusa ma le 2,000 tagata na papatisoina i totonu o le fa tausaga.

I lona toe foi mai i Iuta, na fesoasoani ai Dan i le aumaia i Iuta o le toatele o tagata Uelese na liliu mai i le ekalesia. Ina ua maliu o ia i le 51 o ona tausaga, ua ia fesoasoani e aumaia pe tusa ma le 5,000 o tagata i le itu i sisifo o le Iunaite Setete.

Mai le agavale: Ata o le faifeautalai Uelese o Dan Jones. O se vaa kalasini, e pei o le vaa na kapeteniina e Dan Jones, o loo agai atu e tuta i Navu, Ilinoi. Na fesoasoani Dan Jones i tagata na faimalaga mai Uelese.