Manatuaina o Soifuaga Maoae

Newel K. Whitney (1795–1850)

Sa fanau Newel Kimball Whitney i Veremona, ISA, i le aso 5 o Fepuari, 1795. O ia o se alii faipisinisi talenia ma sa amataina ai se faigauo ma se paaga faapisinisi ma Sidney Gilbert. I le amataga o le la pisinisi, sa tele lava ina la feoai. I se tasi o na malaga faapisinisi, sa feiloai ai Newel ia Elisapeta Ana Samita i Katelani, Ohaio. E tolu tausaga o fai le faamasaniga a Newel ma Ana ma faaipoipo ai i le 1823.

Sa saili faatasi Newel ma Ana mo le upumoni ma, mo se taimi, na auai ai i le mau a le au Campbellite, lea sa latou folafolaina faalauaitele o i latou na toefuataiina mai le faa-Kerisiano anamua. I se tasi po na tatalo ai Newel ma Ana “ia iloa mai le Alii pe faapefea ona [la] maua le meaalofa o le Agaga Paia.” Na faamatalaina e Ana le faaaliga sa la mauaina o le tali i le la tatalo: “Sa oo mai le Agaga i o maua luga ma sa ufitia le fale i se ao. … Ona ma faalogoina lea o se leo mai le ao, ua faapea mai: ‘Ia sauniuni e talia le afioga a le Alii, aua o le a oo mai.’”¹

E lei leva ona maua lenei tali i le tatalo, ia Oketopa 1830, ae o mai ni faifeautalai o le Au Paia o Aso e Gata Ai i Katelani. O Novema, na papatisoina ai Newel ma Ana. Sa na o ni nai masina mulimuli ane, ae tuitui atu Iosefa ma Ema Samita i le faitotoa o le au Whitney. Ina ua faafeiloai atu e Iosefa ia Newel i lona igoa, sa le mafai ona fai atu Newel na ia iloaina le igoa o le Perofeta, o lea na tali atu ai Iosefa, “O a’u o Iosefa le Perofeta; o lau tatalo ua ou oo mai ai iinei, o le a se mea ua e manao ai ia te au?”² Ona nonofo faatasi ai lea o le au Whitney ma le au Samita mo nai vaiaso ma tuuina atu se fale mo i laua ia Setema 1832.

E le gata i le tuuina atu i le au Samita o se fale e nonofo ai, ae na tuuina atu foi e Newel e faaaogaina atoa e le Ekalesia le avanoa o le fogafale i luga o lona faleoloa. I le faleoloa o Whitney, sa fai ai e taitai o le Ekalesia ia fonotaga ma le Aoga a Perofeta.

Ia Tesema 1831, na valaauina ai Newel e avea ma epikopo lona lua o le Ekalesia ma na avea mulimuli ane o se pule i le faafoega o mea tautupe a le Ekalesia, e fesoasoani i le Ekalesia i le pulea o ana tupe ma aluese ai mai aitalafu. I le tautoulu o le 1838, na siitia atu ai le au Whitney i Sisifo Mamao, Misuri, lea na toe valaauina ai Newel o se epikopo, ma i le 10 tausaga mulimuli ane, na latou sopoia ai ma lona aiga ia laufanua valevalenoa e agai atu i le Aai o Sate Leki, lea sa ia auauna ai o se Epikopo Pulefaamalumalu o le Ekalesia.

Na maliu Newel i le aso 24 o Setema, 1850, i le Aai o Sate Leki ona o se tulaga afaina o māmā.

Faamatalaga

1. Elizabeth Ann Whitney, ta’ua i le Edward Tullidge, The Women of Mormondom (1877), 41–42.

2. Joseph Smith, ta’ua i le Elizabeth Ann Whitney, “A Leaf from an Autobiography,” Woman’s Exponent, 15 Aok., 1878, 51.

Lalo, itu tauagavale i totonu: O se ata vane o Newel K. Whitney. Lalo, itu taumatau i totonu: O le fogafale i luga o le faleoloa o Newel K. Whitney i Katelani, Ohaio, lea na faia ai sauniga o le Aoga a Perofeta ma le Ekalesia. Pito i lalo: O le faleoloa a Whitney.