O Tali a le Aoga Sa

Saunia e Emma Addams

E i ai sou faanaunauga o le saili o ni tali sili mo ou luitau—o le talosagaina o le fesoasoani a le Alii mo au ina ia maua le mea lea e tasi e mafai ona faaleleia mea uma. Ua ou iloa o lea ituaiga taumafaiga o le a faafaigata atili ai mea.

A o ou faiaoga i le vasega o le Mataupu Faavae o le Talalelei i lau uarota, sa ou naunau lava e tuu atu ni fesili loloto e manaomia ai le mafaufau loloto ma ni tali tetele, fou, ma malamalama. I nisi upu, sa ou manao e aloese mai le taulotoina o “tali [masani tuai] a le Aoga Sa” lea e tele lava ina tali mai ai tagata o le uarota i vaiaso taitasi.

A o ou suesue i le Feagaiga Fou i le taimi o au sauniuniga, sa taia au i le auala o loo faaaoga ai le upu tumau, lea na faaaoga soo mai. Mo se faataitaiga, fai mai le Ioane 15:10, “Afai tou te tausia a’u poloaiga, onatumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa” (faaopoopo le faamamafa).

I Lana Tatalo maoae Faa-Puluvaga, sa tatalo ai le Faaola mo Ona soo ina ia “tasi i latou uma; faapei o oe le Tama o i totonu ia te au o au foi o i totonu ia te oe, ina ia tasi i latou i totonu ia te i taua” ma “o au o i totonu ia te i latou, o oe foi o i totonu ia te au, ina ia faaatoatoaina i latou ia tasi” (Ioane 17:21, 23).

O le tele o mea sa ou sailia o le pe faapefea ona ou tasi ma le Alii, pe faapefea ona ou tumau i Lona alofa, ma pe faapefea, o se taunuuga, ona ou atiina ae se onosai faaopoopo—le onosai lea sa ou matuai manaomia lava e suia ai ou lagona ma mea na faavaivaia au ma o le a toe faamalosia ma faamamaina au.

Sa iloagofie, a o ou saili ina ia malamalama i le upu tumau ma tali i luitau faigata lea e feagai ma au i aso uma, na iu lava ina toe taitai atu au i tua i tali tonu o le Aoga Sa lea sa ou taumafai e aloese mai ai. Sa ou maua ni tali i ou luitau e ala i le faitauina o tusitusiga paia, tatalo i aso uma, auauna atu i lou aiga ma isi, ma auai i le malumalu faapea ma au sauniga o le Aso Sa. Sa ou iloa o na mea faigofie o le a faia se eseesega i le va o le tumau ai ma le tumau ai lelei faapea ma le onosai.

O tali o le Aoga Sa o ni tali e sili ona lelei.

Atinaeina o Lo Tatou Faatuatua

Ata

Elder Neal A. Maxwell

“O le auauna atu, suesue, tatalo, ma le tapuai atu o faavae ia e fa o le faaatoatoaina o mea ‘e lei atoa i lo [tatou] faatuatua.’ (1 Tesa. 3:10.) A tatou tuu le tausia o lo tatou faatuatua i soo se tasi o ia auala faapitoa e fa, o le a lamatia i tatou. …

“I se lalolagi o faigata, e mafai e le Alii ona tuia o tatou mafaufau i lona faaaoga ‘o le pelu a le Agaga, o le afioga lea a le Atua.” (Efe. 6:17; tagai foi i le Iaroma 1:12.) E ui i lea, e tatau ona ‘o faatasi le faatuatua’ (Epe. 4:2) ma le faalogo, faatasi ma galuega Kerisiano e pei ona tatou faalogo soo i ai.”

Elder Neal A. Maxwell (1926–2004) o le Korama a Aposetolo e Toasefululua, “Ne’i Faavaivai o Outou Loto ma Outou Le Lavatia,” Liahona, Iul. 1991, 96, 97.